Mbela ou shii vamwe vomEendombwedi daJehova? Vamwe vomufye otashi dulika ovashiinda shoye, ovanailonga vakweni ile ovanafikola vomongudu yeni. Ile tashi dulika twa kundafanene naave kombinga yOmbibeli. Ofye naanaa oolyelye, nomolwashike hatu udifa moipafi kombinga yeitavelo letu?

Otwa fa ovanhu aveshe. Otwa dja momaputuko e lili noku lili nomeenghalo da yoolokafana moulikumwe wovanhu. Vamwe vomufye ova li momalongelokalunga amwe e lili, ofimbo vamwe kava li va itavela muKalunga. Ndele fimbo inatu ninga Eendombwedi, atushe otwa konakona noukeka omahongo Ombibeli. (Oilonga 17:11) Otwa tambula ko osho twe lihonga nokuninga etokolo paumwene opo tu longele Jehova Kalunga.

Otwa mona ouwa mokukonakona Ombibeli. Ngaashi ovanhu aveshe, nafye ohatu shakeneke omaupyakadi notu na omaunghundi. Ndele eshi twa kendabala okutula moilonga omafinamhango Ombibeli mokukalamwenyo kwetu kwakeshe efiku, otwa ninga omalunduluko madidilikwedi monghalamwenyo yetu. (Epsalme 128:1, 2) Olo olo etomheno limwe molwaashi hatu udifile vamwe oinima iwa oyo twe lihonga mOmbibeli.

Ohatu dulika komafinamhango aKalunga. Ngaashi Ombibeli tai hongo, omafinamhango oo ohaa xumifa komesho onghalonawa yetu, ohae tu kwafele tu kale twa fimaneka vamwe notu kale ovanashili notu na olune nosho yo omaukwatya makwao amwe mawa. Ohae tu kwafele tu kale tu na oukolele muwa, tu kale ovalongi ovadiinini novaduliki, tu kale tu na oukumwe momaukwaneumbo notu kale twa koshoka paenghedi. Molwaashi otwa tomhwa kutya “Kalunga iha tale omunhu kombada,” otu li oumwainafana wopamhepo womounyuni aushe, noinatu tukaulwa koukwamuhoko ile kopolotika. Nonande otwa fa ovanhu aveshe, otu li oshiwana she likalekelwa. — Oilonga 4:13; 10:34, 35.

• Eendombwedi daJehova oda faafana ngahelipi novanhu vakwao?

• Eendombwedi ode lihonga omafinamhango elipi eshi da konakona Ombibeli?