Omudo keshe, ovalongi vefimbo li yadi ve likalekelwa vonhumba ohava shivwa va ye kofikola yaGilead, oyo hai ningilwa koPatterson, moNew York. a Kofikola oko ohava hongwa nghee tava dulu okukala ovalongi ovanekeka moilonga yavo oyo va pewa mehangano laJehova. Edeulo la tya ngaho ohali va kwafele opo va ka pameke omaongalo noitaimbelewa mounyuni aushe.

Gilead oi li ofikola yopaiwana. Pashihopaenenwa, ondodo onhi-147 oyo ya li ko mo 2019, opa li ovahongwa 56 va dja moilongo 29. Ovanafikola ovo hava i koGilead ova kala moilonga yefimbo li yadi ve li Ovabetele, ovapashukilishikandjo, ovatumwa ile ovakokolindjila ve likalekelwa.

Ohaku ningwa omalongekido ofimbo nokuli ofikola ya tya ngaho inai hovela. Pashihopaenenwa, Oshikondo shOmalweendo kEembelewa Da Kula ohashi lande outekete vaavo va shivwa kofikola. Eshi ongudu onhi-147 ya li ya shivwa, osha li sha pula eedola daNamibia 16 506.62 momunhu keshe oo ta di kondje yoshilongo okuya nokudja koPatterson. Ovanafikola ovo va dile koSolomon Islands ova li ve na okulongifa eedila nhee molweendo lavo, opo va fike koPatterson, nokulongifa natango nhatu mokushuna, va enda oshinano sheekilometa di dulife po 35 400! Olweendo olo ola pula eedola daNamibia 35 316.50 momunafikola keshe. Opo ehangano li xupife oshimaliwa, Oshikondo shOmalweendo kEembelewa Da Kula ohashi longifa eekombiyuta, opo shi tale outekete ovo va tulwa kofandifa. Nokuli nokonima eshi va mona outekete vonhumba, natango oprograma oyo hava longifa ohai twikile nokutala ngeenge ondado youtekete oya wa pedu moule woivike, ile eemwedi da landula ko. Oshikondo osho shOmalweendo ohashi longifa yo eepende odo ovamwatate hava mono eshi hava tuka luhapu mokulanda outekete.

Ovanafikola vahapu ohava kala va pumbwa ee-visa opo ve uye moUnited States. Oshikondo shOkuungaunga nOinima yoPaveta keembelewa detu da kula ohashi va kwafele va mone ee-visa. Okulishangifa nokumona o-visa ohashi pula eedola daNamibia 7 831.05 momunhu.

Ouwa ulipi hatu mono konima eshi ovanafikola ovo va deulwa? Hendra Gunawan, oo e li omukulunhuongalo wokoushilolukadi laAsia, oku li meongalo omo mu na ovalihomboli va dja kofikola yaGilead. Okwa ti: “Nale, meongalo letu kamwa li ovakokolindjila vondjikilile. Ashike konima eshi ovalihomboli ovo ve uya mo, oshihopaenenwa shavo shouladi osha kwafela vamwe navo va hovele okukokola ondjila. Lwanima, omumwameme umwe womeongalo letu naye okwa ka ya kOfikola yOvaudifi vOuhamba.”

Sergio Panjaitan oha longo pamwe naavo va dja kofikola yaGilead kObetel, koushilolukadi waAsia. Okwa ti: “Edeulo olo va mona kali fi ashike enangekonoupuna kuvo, ndele oli li yo enangekonoupuna kufye. Ove lihonga oinima ihapu neenghono! Ponhele yokukala ve wete va fimana ve tu dule, ova tukulilafana nafye owino oo va mona. Osho sha li she tu twa omukumo atushe.”

Ehangano ohali ungaunga ngahelipi neefuto dofikola oyo? Ohali longifa omayambidido oilonga yomounyuni aushe, mwa kwatelwa oo haa yandjwa okupitila ko donate.ps8318.com. Ohatu mu pandula omolwomayambidido eni ehalo liwa, oo haa kwafele ovanafikola vaGilead.