14-ساباق
قۇداي قانداي ماقساتپەن ۇيىم قۇردى؟
1. قۇداي ەجەلدە يسرايل حالقىن نە ٷشىن قۇردى؟
قۇداي اۋلەتباسى بولعان ىبىرايىمنىڭ ۇرپاعىنان حالىق قۇرىپ، ولارعا زاڭدار بەردى. ول بۇل حالىقتى يسرايل دەپ اتاپ، ولاردى شىنايى عيباداتتىڭ وشاعى ەتتى ٵرى ٶزىنىڭ ٴسوزى بولىپ تابىلاتىن كيەلى جازبالاردى اماناتتادى (ٴزابۇر 147:19، 20). ناتيجەسىندە، وزگە حالىقتاردىڭ بارلىعى يسرايل حالقى ارقىلى قۇدايدىڭ باتاسىنا يە بولۋعا مۇمكىندىك الدى. (مۇسانىڭ 1-جازباسى 22:18 وقىڭىز).
ەحوبا قۇداي يسرايل حالقىن ٶزى جايلى شىندىقتى پاش ەتەتىن كۋاگەرلەرى رەتىندە تاڭداعان بولاتىن. ولاردىڭ تاريحى قۇداي زاڭدارىنا مويىنسۇنۋدىڭ قانشالىقتى پايدالى ەكەنىن كورسەتەدى (مۇسانىڭ 5-جازباسى 4:6). وسى حالىق ارقىلى وزگە حالىقتار دا شىنايى قۇدايدى تانىپ بىلە الدى. (يشايا 43:10، 12 وقىڭىز).
2. شىنايى ماسىحشىلەر نە ٷشىن ۇيىم بولىپ قۇرىلدى؟
كەيىننەن يسرايل حالقى قۇدايدىڭ ىقىلاسىنان ايىرىلىپ قالدى. سوندىقتان ەحوبا قۇداي ولاردى ماسىحشىلەر قاۋىمىمەن الماستىردى (ماتاي 21:43؛ 23:37، 38). وسىلايشا بۇگىندە يسرايل حالقىنىڭ ورنىنا شىنايى ماسىحشىلەر ەحوبانىڭ كۋاگەرلەرى رەتىندە قىزمەت ەتەدى. (ەلشىلەردىڭ ىستەرى 15:14، 17 وقىڭىز).
يسا پايعامبار ٸزباسارلارىن قاۋىم رەتىندە ۇيىمداستىرىپ، ولارعا ۋاعىز ٸسىن اتقارۋدى ٵرى بارلىق حالىقتان شاكىرت دايىنداۋدى تاپسىرعان (ماتاي 10:7، 11؛ 24:14؛ 28:19، 20). بۇگىندە، وسى دۇنيەنىڭ اقىرى تاياعان ۋاقىتتا، بۇل ٸس ٶزىنىڭ شارىقتاۋ شەگىنە جەتتى. ادامزات تاريحىندا ەحوبا العاش رەت شىنايى عيبادات ارقىلى ٵرتۇرلى حالىقتان شىققان سان ميلليونداعان ادامنىڭ باسىن بىرىكتىرىپ وتىر (ايان 7:9، 10). سونداي-اق شىنايى ماسىحشىلەر ٴبىر-ٴبىرىن قولداپ، جىگەرلەندىرۋ ٷشىن دە ۇيىمداسقان. دۇنيەنىڭ ٴتورت بۇرىشىندا وتەتىن قاۋىم كەزدەسۋلەرىندە ولار كيەلى كىتاپقا نەگىزدەلگەن ٴبىر عانا باعدارلاما بويىنشا ٴتالىم الادى. (ەۆرەيلەرگە 10:24، 25 وقىڭىز).
3. بۇگىنگى تاڭداعى ەحوبا كۋاگەرلەرىنىڭ تاريحى قالاي باستالدى؟
1870-جىلدارى ٴبىر توپ ادام كيەلى كىتاپتى زەرتتەپ، سونداعى ۇمىت بولعان شىندىقتاردى قايتا اشا باستادى. ولار يسانىڭ ماسىحشىلەر قاۋىمىن ۋاعىز ايتۋ ماقساتىمەن ۇيىمداستىرعانىن ٴتۇسىندى، سوندىقتان دا پاتشالىق حابارىن ۋاعىزداۋ ٸسىن دۇنيەجۇزى بويىنشا جۇرگىزە باستادى. 1931-جىلدان باستاپ ولار ەحوبا كۋاگەرلەرى دەپ اتالاتىن بولدى. (ەلشىلەردىڭ ىستەرى 1:8؛ 2:1، 4؛ 5:42 وقىڭىز).
4. بۇگىندە ەحوبا كۋاگەرلەرى قالاي ۇيىمداسقان؟
ٴبىرىنشى عاسىردا تاجىريبەلى اقساقالدار توبى باسقارۋشى كەڭەستى قۇرايتىن. يسانى قاۋىمنىڭ باسى رەتىندە مويىنداعان بۇل كەڭەس جەر-جەردەگى ماسىحشىلەر قاۋىمىنا باسشىلىق بەرىپ وتىرعان (ەلشىلەردىڭ ىستەرى 16:4، 5). سول سياقتى، ٴبىزدىڭ كۇنىمىزدە دە تاجىريبەلى اقساقالداردان قۇرالعان باسقارۋشى كەڭەس دۇنيەنىڭ ٴتورت بۇرىشىنداعى ەحوبا كۋاگەرلەرىنە كومەكتەسۋدە. باسقارۋشى كەڭەس ەحوبا كۋاگەرلەرىنىڭ فيليالدارىنا جەتەكشىلىك ەتەدى. بۇل فيليالدار كيەلى كىتاپتى زەرتتەۋگە ارنالعان ادەبيەتتەردى 600 دەن اسا تىلگە اۋدارىپ، باسىپ شىعارىپ، تاراتادى. وسىنىڭ ارقاسىندا باسقارۋشى كەڭەس دۇنيەجۇزىندەگى 100000 نان اسا قاۋىمعا كيەلى كىتاپقا نەگىزدەلگەن باسشىلىعى مەن كومەگىن بەرەدى. ٵربىر قاۋىمدا لايىقتى ەر كىسىلەر اقساقالدار، ياعني باقىلاۋشىلار، رەتىندە قىزمەت اتقارادى. بۇل ادامدار قۇدايدىڭ «وتارىن» سۇيىسپەنشىلىكپەن قامقورلايدى. (پەتىردىڭ 1-حاتى 5:2، 3 وقىڭىز).
ەحوبا كۋاگەرلەرى ىزگى حاباردى ۋاعىزداۋ مەن شاكىرت دايىنداۋ ٸسىن اتقارۋ ٷشىن ۇيىمداسقان. ٴبىرىنشى عاسىرداعى ەلشىلەر سياقتى، ولار دا ۇيمە-ٷي ٴجۇرىپ ۋاعىز ايتادى (ەلشىلەردىڭ ىستەرى 20:20). سونداي-اق ولار شىندىقتى بىلگىسى كەلەتىن اقجۇرەك ادامدارعا كيەلى كىتاپتان ٴبىلىم الۋدى ۇسىنادى. الايدا ەحوبا كۋاگەرلەرى — جاي عانا ۇيىم ەمەس. ٴبىز سۇيىسپەنشىلىگى مول اكەسى بار وتباسى سياقتىمىز، سوندىقتان ٴبىر-بىرىمىزگە قامقورلىق كورسەتەتىن باۋىرلارداي قارايمىز (سالونيكالىقتارعا 2-حات 1:3). ەحوبا قۇدايدىڭ حالقى وعان ۇنامدى بولۋ ٷشىن ٵرى باسقالارعا كومەك كورسەتۋ ٷشىن ۇيىمداسقان، سوندىقتان دا ولار دۇنيەدەگى ەڭ باقىتتى وتباسى بولىپ تابىلادى. (ٴزابۇر 33:12؛ ەلشىلەردىڭ ىستەرى 20:35 وقىڭىز).
