Үй болған соң ыдыс-аяқ сылдырламай тұрмайтыны белгілі. Бұған ерлі-зайыптылардың пікірі, сезімі мен өмірге деген көзқарасының әртүрлілігі себеп болуы мүмкін. Кейде қиындықтар сырттан, күтпеген жағдайлардың салдарынан туындап жатады.

Сондай кездері қиындықтардан қашып кеткіміз келетін шығар, бірақ Киелі кітап оларды шешуге кеңес береді (Матай 5:23, 24). Киелі кітаптағы кеңестерді қолданар болсаңыз, кез келген түйінді шеше аласыз.

КИЕЛІ КІТАПТА НЕ ЖАЗЫЛҒАН? Онда “сөйлейтін уақыттың” бар екені айтылған (Уағыздаушы 3:1, 7). Туындаған мәселенің бетін ашып алуға жеткілікті уақыт бөліңіз. Жұбайыңызға бұған қатысты не сезінетініңізді, не ойлайтыныңызды ашық білдіріңіз. Оған әрдайым “шындықты айтыңыз” (Ефестіктерге 4:25). Жағдай ушығып жатқан күнде де, ұрыс-керіске жол бермеңіз. Биязы жауап қырық пышақ болып қырылысудан сақтайды (Нақыл сөздер 15:4; 26:20).

Жарыңыздың айтқандарымен келіспеген жағдайда да, ізеттен озбай, сүйіспеншілік пен сый-құрмет танытыңыз (Қолостықтарға 4:6). Қиындықтарды қолдан келгенше тез шешіп алуға тырысыңыз және сөйлеспей қоюдан аулақ болыңыз (Ефестіктерге 4:26).

ПАЙДАЛЫ КЕҢЕС

• Мәселенің бетін ашып алу үшін қолайлы уақыт таңдаңыз.

• Жұбайыңыз сөйлеп жатқанда, сөзін бөлмеңіз. Сіздің де сөйлейтін кезегіңіз келеді.

КИЕЛІ КІТАПТА НЕ ЖАЗЫЛҒАН? Онда: “Бір-біріңді туған бауырлардай жақсы көріңдер. Бір-біріңе бірінші болып құрмет көрсетіңдер”,— делінген (Римдіктерге 12:10). Жұбайыңызды қалай тыңдайтыныңызға мән бергеніңіз аса маңызды. Оның көзқарасын түсіну үшін сезіміне ортақтасып, кішіпейіл болыңыз (Петірдің 1-хаты 3:8; Жақып 1:19). Тыңдап жатқандай сыңай танытпай, мұны шын көңілден істеңіз. Мүмкін болса, істеріңізді ысырып қойып, жұбайыңызға бар зейініңізді аударыңыз, я болмаса кейінірек әңгімелесуді ұсынып көріңіз. Оны жауыңыз емес, жан досыңыздай көрсеңіз, оған “ренжуге асықпайсыз” (Уағыздаушы 7:9).

ПАЙДАЛЫ КЕҢЕС

• Естіп жатқандарыңыз құлағыңызға жақпаса да, кең көзқараспен қарауға тырысыңыз.

• Жарыңыздың сөздерінің артында не тұрғанына мән беріңіз. Оның ым-ишараты мен дауыс сарынына көңіл аударыңыз.

КИЕЛІ КІТАПТА НЕ ЖАЗЫЛҒАН? “Әр бейнеттің зейнеті бар, құр сөз жоқшылыққа ұшыратар”,— делінген Құдай Сөзінде (Нақыл сөздер 14:23). Қабылданған шешіммен келісіп қоя салу жеткіліксіз, оны бірге іске асырғандарыңыз жөн. Бұл көп еңбектеніп, көп күш салуды талап етер, алайда берер нәтижесі соған тұрарлық (Нақыл сөздер 10:4). Егер бірлесе әрекет етсеңіздер, күш салғандарыңыздың “игі жемісін көресіздер” (Уағыздаушы 4:9).

ПАЙДАЛЫ КЕҢЕС

• Қиындықты шешу үшін әрқайсысыңыз не істейтіндеріңізді анықтап алыңыздар.

• Қол жеткізген жетістіктеріңізді арагідік саралап отырыңыздар.