Nalunngiliuk?
Qarmasissiat Babylonniusimasumi nassaat Biibilimi allassimasunut qanoq naapertuuppat?
ILLUKUSIORTUT Babylonniusimasumi qarmasissiarpassuit nassaarisimavaat. Illukusiortoq Robert Koldewey naapertorlugu qarmasissiat taama ittut illoqarfiup silataani marraqarluartumi qisussaqarluartumilu uutsivinni sanasarsimavaat.
Aamma uppernarsineqarsimavoq Babylonnimi pisortat uutsiviit ajorluinnartumik atortarsimagaat. Paul-Alain Beaulieu, Torontomi Universitetimi itsaq Assyriamiut oqaluttuarisaanerannik oqaasiinillu ilisimatooq, oqarpoq: “Babylonnimiut allagaataanni atuarneqarsinnaavoq kunngi peqqusisartoq imminut naalanngitsut Babylonnimiullu guutiinik ataqqinninngitsuliortut uutsivimmut igineqassasut ikuallanneqarlutillu.” Assersuutigalugu allakkiami kunngip Nebukadnesarip nalaaneersumi ima allassimasoqarpoq: “Suujunnaarsissigit, ikuallassigit, … uutsivimmut … qummuinnaq pujoorlik, innerinnarmut miloriullugit toqussigit.”
Danielimik allakkani kapitali 3-mi assingusumik pisoqarsimanera Biibilimik atuartartut eqqaassagunarpaat. Tassanimi allassimavoq kunngip Nebukadnesarip inuusaliarujussuaq kuultiusoq Durap qooruani – illoqarfiup Babylonnip silataani – nappartikkaa. Angutit hebræerit inuusuttut pingasut, Shadraki, Meshaki aamma Abed-Nego, inuusaliamut pallorusunngimmata Nebukadnesari kamangaalerpoq ‘naalakkiillunilu aatsitsivik kissatsittarnerata arfineq-marloriaataanik kissatsinneqassasoq’ ‘aatsitsivimmullu aamaannaasumut iginneqassasut’. Inngilip pissarsuup angutit pingasut taakku annaappai. – Dan 3:1-6, 19-28.
Qarmasissiat Babylonnimi nassaat aamma Biibilip ilumoortuuneranut uppernarsaataapput. Qarmasissiat kigartukkat ilarpassui kunngimik nersorinninnermik imaqarput. Ilaat ima kigartorneqarsimavoq: “Nebukadnesari, Babylonnip kunngia … illussaarsuaq uanga pissaanersuakkut nammineq sanaara … qanortoq kinguaakka kinguaassakkalu naassaanngitsumik tassani naalakkersuigilik.” Kigartukkat taakku Danielimik allakkat 4:27-mi allassimasunut ukununnga eqqaanarput: “Ilumut tassa Babyloni angingaaqisoq uanga pissaanikkut artorsajuitsukkut kunngimut najugassiara uanga ataqqinaatissannik!”