Illit aamma uppertunngorsinnaavutit

Sarah Jayne 19-nik ukioqarluni illissamigut kræfteqalersimalluni paasivaa. Suliaritereerami ajoqutaarussorivoq siunissarlu isumalluarfigilerlugu. 20-nik ukioqarluni appassiartaarnissani katinnissaminullu piareersarnissani nangaanartoqartinngilaa. Ukiorli taanna kræfteqaqqilerpoq, sapaatip-akunnialuinnarnillu inuunissaminik paasitinneqarluni. Sarah Jayne 21-liingajalerluni Juunimi 2000-mi toquvoq.

SARAH Jayne napparsimavimmiitillugu pulaartut maluginngitsoorsinnaanngilaat siunissaq isumalluarfigigaa, nakimananilu Guuti oqaasialu Biibili upperilluinnarai. Naak nappaammik eqqugaagaluarluni, upperilluinnarpaa makititaaffeqartoq ikinngutinilu tamaasa takoqqikkumaarlugit. (Johannesi 5:28, 29) „Guutip silarsuassaani nutaami takussaagut,“ oqarpoq.

Inuit ilaasa upperneq taamaattoq imminut salloqittarnertut taavaat. „Toqup kingorna inuunermik upperinninneq suugami,“ Ludovic Kennedy aperaaq, „nalornisut upperisaraat, upperalugu qarlortaassuaq kingulleq tutsiuppat, kaageqarlunilu immiaaraqarumaartoq, allaat suaqarlunilu qarlortarfigineqarumaartut; Edenimi naggorissumi imminnik siulliullutik toqusimasut, imminnillu kingulliullutik toqusut nuannaaqatigiumaarlugit? Apeqqut illuaʹtungilertariaqarparput. Suna silatusaarnerussava? Kennedy-p isumaqarneratut, upperissallugu inuuneq tassa tamarmiusoq, tamannalu atorluarniarneqartariaqartoq, imaluunniit: Guuti, makiffissaqarumaarneranillu neriorsuutaa upperalugit? Sarah Jayne-p  kingulleq qinerpaa. Qanoq ililluni taama upperisaqalerpa?

‘Guuti ujarsinnaavat . . . nanillugulu’

Allat upperalugillu tatiginiaraanni ilisarisimasariaqarput, eqqarsariartaasiat suleriaasiilu ilisimallugit. Tamanna isummamik uummammillu pissuteqarpoq. Taamatuttaaq ippoq Guuti eqqortumik upperissagaanni. Ilisarisimaleqqaartariqarpoq, pissusii qanorlu issusia, oqaatsimigut iliuutsimigullu qanoq tutsuiginarsimatiginera paasiniarlugu. — Tussiaat 9:10; 145:1-21.

Inuit ilaat isumaqarput tamaattoqarsinnaanngitsoq. Oqarput Guuti ungasippallaartoq, paasisassaanngitsoq — Guuteqassappat. „Kristumiunut Guuti ima piviusuutigippat, soorlu Sarah Jayne-mut taamaattoq,“ qulartut ima aperipput, „soormiuna uagutsinnut ilisaritinngila?“ Guutili ima ungasitsigiva, ilisarisimaneqarsinnaanngivillunilu? Athenimi ilisimaqqissaarniartunut silassorissusilinnullu oqaluutsimini Paulusi oqarpoq ‘Guutip silarsuarmik taassumaniittunillu tamanik pinngortitsisuusup’, ‘Guuti ujaqqullugu’ pisariaqartitavut tamaasa saqqummersissimagai. Paulusi nangippoq Guuti ‘ilatsinnit kimilluunniit ungasinngilaq.’ — Apustilit Suliaat 17:24-27.

Qanoq Guuti ujarneqarsinnaava ‘nanillugulu’? Soorlu avataarsua qimerloorlugu. Amerlasuunut tamanna, pinngortitsisoqarneranik uppernarsaatigissallugu naammappoq. * (Tussiaat 19:1; Esaja 40:26; Apustilit Suliaat 14:16, 17) Paulusi ima oqartoq isumaqatigaat: „Takussaanngitsuunerami, ittuinnartumik pissaanera Guutiussusialu, silarsuup pinngortitaaneraniilli takussaagaluarput suliaasigullu ilisimaneqarlutik.“ — Romamiut 1:20; Tussiaat 104:24.

Biibili pisariaqartipparput

Pinngortitsisumut upperneq eqqortoq ineriartortissagaanni, saqqummersissimasaa alla pisariaqarpoq. Suna? Biibili, Guutip oqaasia isumassarsiarititaq, piumasaminik siunertaminillu saqqummiussiffigisaa. (2 Timotheusi 3:16, 17) „Qanorli Biibili upperineqarsinnaava, kristumiuunerartut suliaat ajorluinnartut isigalugit?“ immaqa aperivutit. Oqaluttuarisaanerup uppernarsarsinnaavaa kristumiuunerartuni peqquserlunneqangaartarlunilu peqqarniisaartoqangaartarlunilu ileqqorluttoqangaartartoq. Kristumiuuneraqatigiit Biibilimik malinnittuusaaginnarnerat takuneq ajornanngilaq. — Matthæusi 15:8.

Allaat Biibilimi mianersoqqussutigineqarpoq, Guutimik pallorfiginninneraraluartorpassuarnit, ‘Naalagaq akiliussilluni iperagaatitsisoq miserratigineqarumaartoq.’ Apustili Petrusi oqarpoq ‘sallusuissummut aqqutaasoq tusagaanerlulerumaartoq taakku pissutaallutik.’ (2 Petrusi 2:1, 2) Taakku pillugit Jiisusi oqarpoq ‘inatsisinik unioqqutitsisuusut’ suliaasigullu ilisarineqarsinnaasut. (Matthæusi 7:15-23) Kristumiuunerartut tusaamanerlunneqarnerat pissutigalugu Guutip oqaasia itigartikkaanni, assigiinnassavaa ikinngutip allagai atuarumanagit aatsisup tusaamanerlunneqarnera piinnarlugu.

Guutip oqaasia atornagu upperluartoqalersinnaanngilaq. Biibilimiinnaq nassuiaanneqarpugut Jehovap pissutsit qanoq isiginerai. Paasitippaatigut sooq anniaatit ajussuserlu atuutitinnerlugit, oqaluttuuppaatigullu tamanna qanoq iluuseqarfigissanerlugu. (Tussiaat 119:105; Romamiut 15:4) Sarah Jayne-p, Guutip oqaasia isumassarsiarititaasoq, Biibili upperilersimavaa. (1 Thessalonikamiut 2:3; 2 Petrusi 1:19-21) Qanoq ililluni? Angajoqqaami ajoqersuinerinnaatigut upperilinngilaa, aammali nammineq unneqqarilluni uppernarsaatinik misissuinermigut upperilerpaa Biibili tassaasoq atuagaq nalissaqanngitsoq, Guutimit oqaaserineqartoq. (Romamiut 12:2) Assersuutigalugu maluginiarpaa najoqqutassanik maleruaasunut Biibilip qanoq sunniuteqarluarsinnaatiginera. Atuakkat soorlu Bibelen — Guds ord eller menneskers? * iluaqutigalugit, ilumut Guutimit isumassarsiarititaasimaneranut takussutissat misissoqqissaarpai.

 „Upperneq tusakkanit pilersinneqartarpoq“

Biibiliiteqarneq — imaluunniit isumassarsiarititaasimaneranik upperinninnerinnaq naammanngillat. „Upperneq tusakkanit pilersinneqartarpoq,“ Paulusi allappoq. (Romamiut 10:17) Biibilimuna oqariartuutaanik tusarnaarneq uppilersitsisartoq, Biibiliiteqarnerunngitsoq. Guutip oqaasianik „tusartoqartarpoq,“ oqaasiata atuaqqissaarneratigut. Inuusuttut allaat taamaaliorsinnaapput. Paulusi allappoq, Timotheusi ‘meeraaneraniilli’ ‘allakkanik illernartunik’ anaanaminit aanaaminillu ilinniartinneqarsimasoq. Isummamik aqutsiniarnerua? Naamik. Timotheusi salloqittarneqaraniluunniit uukapaasiarineqanngilaq. Tusarsimasani atuarsimasanilu pillugit qularunnaarsinneqarpoq. — 2 Timotheusi 1:5; 3:14, 15.

Taamatuttaaq Sarah Jayne qularunaarsinneqarpoq. Ukiuni hundredilinni siullerni Berøamiut assigalugit, [angajoqqaaminit ilinniartitsisunillu allanit] ‘oqaaseq kajumeqaluni ilassivaa.’ Soorunalimi meeraangallarami angajoqqaaminit ilikkakkani upperai. Peroriartornerminili ilikkakkani tamaasa soqutiginagit maleruuffiginiaannanngilai, ‘ullulli tamaasa Allakkat misissuiffigisarpai paasiniarlugu ilumut taamaannersut.’ — Apustilit Suliaat 17:11.

Ilumoortumik uppilersinnaavutit

Illittaaq uppilersinnaavutit — uppernermik apustilip Paulusip kristumiunut allakkamini eqqartugaatut ittumik. (Hebræerit 11:1) Upperneq taammaattoq tassaavoq ‘neriugisamik tatiginnilluinnarneq, takunngisamik qularuteqannginneq.’Taamaattumik upperisaqaruit, qularinngilluinnassavat neriugisatit ilimagisatillu, allaat Guutip makiffissamik neriorsuutaa piviusunngorumaartut. Qularutigiunnaassavat neriuut eqqarsaataannaanani qulakkiivinneqarsimasoq. Paasissavat Jehova neriorsuutiminik unioqqutitsinngisaannartuusoq. (Josva 21:45; 23:14; Esaja 55:10, 11; Hebræerit 6:18) Guutip silarsuassaa nutaaq ilinnut ima piviutigissaaq soorlulu-sooq piviusunngorreersoq. (2 Petrusi 3:13) Uppernerullu isaanik takulluarsinnaassavatit Jehova Guuti, Jiisusi Kristusi Guutillu naalagaaffia ilumut piusut imminullu salloqittarnerunngitsoq.

Uppissuseqalerniarninni ilaginnagaanngilatit. Soorlu Jehovap oqaatsini atuariaannaasunngortissimagaa, tamatuttaaq inuit ilumoorusuttut  Guutimik upperisaqalernissaannik ikiorumallugit silarsuaq tamakkerlugu ilagiit kristumiut pilersissimavai. (Johannesi 17:20; Romamiut 10:14, 15) Peqatigiiffini aqqutigalugu Jehovap ikiorsiissutai ilassiniakkit. (Apustilit Suliaat 8:30, 31) Upperneq Guutip anersaavata illernatup inerititarimmagu, pingaaruteqarpoq anersaaq taanna uppissuseqalernissannut ikioqqullutit qinnutigissallugu. — Galatiamiut 5:22.

Qulartunit, Gutimik oqaasianillu upperinnittunut mitallersunit qunulersitaaqinak. (1 Korinthimiut 1:18-21; 2 Petrusi 3:3, 4) Misilinneqarnerup nalaani aalajaannissamut, upperneq pingaarutilerujussuuvoq. (Efesosimiut 6:16) Sarah Jaynep tamanna misigaa. Napparsimmavimmiitilluni pulaartini kajumissaartuartarpai uppissuseqangaaleqqullugit. „Sallusuissut nammineq pigiliuguk“ oqarpoq. „Guutip oqaasii atuaqqissaakkit. Guutip peqatigiiffia qanimut attaveqarfigiuk. Qinuneq atorluaruk. Jehova kiffartuullugu ilungersortuarit.“ — Jaaku 2:17, 26.

Guutimut makiffissamillu upperisaqarnera niviarsiat ilaata malugaa oqarlunilu: „Ilumut upperilluinnarpatit!“ Siunissamut suup taama isumallualersikkaani aperineqarami, allaat napparsimanermini, oqarpoq: „Jehovamut uppernerma. Ikinngutigaara asangaarlugulu.“ (wE 10/1 01)

[Quppernerup ataani ilanngussat]

[Qupp. 6-mi assiliartaq]

Timotheusi ‘meeraanerminiilli’ anaanaminit aanaaminillu ‘allakkanik Illernartunik’ ilinniartinneqarpoq

[Qupp. 6-mi assiliartaq]

Berøamiut nersorneqarput ullut tamaasa Allakkat misissortaramikkit

[Suminngaanneernera]

„Skabelsens Fotodrama,“-miit 1914-mi

[Qupp. 7-mi assiliartaq]

Uppissuseqalerniaraanni biibiliiteqarneq naammanngilaq; tusarnaartariaqarlunilu peqqussutai maleruartariaqarput

[Qupp. 7-mi assiliartaq]

„Guutip silarsuassaani nutaami takussaagut“