1, 2. Sooq inuit ilaasa figenit soqutigisarpaat?

FIGENIT mamaraagit? Itsaq Israelikkut figenit mamarisimavaat. (Nah 3:12; Luk 13:6-9) Ullumikkut figenit nunarpassuarni naatinneqartarput. Figenit peqqinnartuupput, inuit ilaat allaat oqartarput uummatigissaataasut.

² Jehovap inuit figeninut assersuunnikuuai. Jehovap figenit inuit uummataannut iluaqutaasinnaanerat eqqartunngilaa. Uummataat assersuutaasoq, tassa taakku qanoq uummammioqarnerat, eqqartorpaa. Oqaasii iluaqutigisinnaavavut aamma asasatta iluaqutigisinnaavaat. Oqaasiisa sammineranni uagut kristumiutut suut ilinniarfigisinnaanerivut eqqarsaatigikkit.

3. Jeremia kapitali 24-mi figenit allaatigineqartut sumut assersuutaappat?

³ Ukiumi 617-imi kr.in.si. Judakkut Jehovap uumigisaanik iliortarput. Jehovap Jeremia Judakkunnut qanoq pisoqarumaarneranik takorruuisippaa. Koorit marluk figeninik imallit, tassa inuiaqatigiinni immikkoortut marluk, pillugit allappoq. Figenit koorip aappaaniittut ‘pitsaalluinnartuupput’ koorillu aappaaniittut ‘ajorluinnartuullutik’. (Atuakkit Jeremia 24:1-3). Figenit ajortut tassaapput kunngi Sidkija allallu taassumatut ittut qanittukkut kunngimit Nebukadnesarimit taassumalu sakkutuuinit saassunneqartussat. Inoqarporli ajunngitsunik figenitut pitsaasutut ittunik. Taakkua ilaat tassaapput Ezekieli, Danieli taassumalu ikinngutai pingasut aamma allat Babylonimut aallarussaaqqasut. Kingusinnerusukkut juutit ilaat Jerusalemimut uteqqittussaapput naalaffillu qarmaqqillugu. — Jer 24:8-10; 25:11, 12; 29:10.

4. Sooq Guutip Judakkunni inuit ajunngitsut pillugit oqaasii uagutsinnut qiimmaallannarpat?

⁴ Jehova inuit ajunngitsut taakku pillugit ima  oqarpoq: “Tuniumaarpakka uummammik ilisimaleqqullunga paasillugulu uanga tassaasunga Naalagaq; taakku innuttarissavakka.” (Jer 24:7) Tamanna uagutsinnut qiimmaallannarpoq Guutimmi taassuminnga ‘uummammik ilisimannittumik’, tassa taassuminnga ilisimannilernissamut kajumissuseqarnermik innuttaanullu ilaanissamut kissaateqarnermik, tunerusukkamisigut. Qanoq ililluta ‘ilisimannittumik uummateqalersinnaagatta’? Biibilimik atuaqqissaartarnikkut ilikkakkatsinnillu maleruaanikkut. Taava allamik isumataartariaqarpugut ajortumillu inooriaaseqarunnaarluta. Piffissap ingerlanerani Guutimut tunniulluinnartariaqarpugut aamma Ataatap, Ernerup anersaallu illernartup aqqini kuisittariaqarluta. (Matt 28:19, 20; ApS 3:19, 20) Illit tamakku iliuuserereerpigit? Imaluunniit Jehovap Nalunaajaasuisa ataatsimiittarnerinut najuuttuaannarpit qulaanilu eqqaaneqartut iliuuserisalersimallugit?

5. Jeremiap allagai kikkunnut tunnganeruppat?

⁵ Eqqaaneqartut tamaasa iliuuserereersimagaluarutsigilluunniit eqqortumik isiginnittaaseqarniartariaqarpugut qanorlu pissusilersornerput sianigisariaqarlutigu. Sooq? Tamanna akissutissarsissavarput Jeremiap uummammik allaatiginninneranik misissuinitsinni. Allagaanilu kapitalit ilaanni Judakkut eqqaani najugaqartut aamma allaatigineqarput. Judamili kunngit tallimat naalakkersuineranni Judami qanoq pisoqarsimanera pingaarnerusumik allaatigineqarpoq. (Jer 1:15, 16) Jeremiap tusarliussassaa inunnut Jehovamut tunniulluinnarsimasunut tunngavoq. Mosesip nalaani inuit Jehovamut innuttanngornissartik akueraat. (2 Mos 19:3-8) Jeremiallu nalaani inuit ima oqarput: “Ilinnut orniguppugut, illit tassaagavit Naalagaq Guuterput.” (Jer 3:22) Kisianni ajunngitsumik uummateqarpat?

6. Sooq Guutip uummat pillugu oqaasii soqutigisariaqarpavut?

⁶ Nakorsat atortorissaarutit atorlugit ilumiugut misissuiffigisinnaavaat aamma uummaterput peqqinnersoq takusinnaavaat. Jehovalli aamma uummaterput assersuutaasoq, imaluunniit inuttut ilorlikkut pissuserput, takusinnaavaa. Guuti ima oqarpoq: “Tamanit annerusumik uummat tatigisassaanngitsuuvoq. Katsorsagassaanngilaq; Kiammi inuup uummammiugisai ilisimasinnaavai. Uanga, Naalagaq, uummatit misissuiffigisarpakka . . . kinaluunniit pisassaanik pitikkumallugu inuuserisaa suliaalu missiliuutigalugit.” (Jer 17:9, 10) Guutip kissaativut, eqqarsaativut, misigissutsivut, isiginnittaaserput anguniakkavullu ilisimavai. Guutip illit uummatit misissuiffigisarpaa. Illilli qanoq uummammioqarnerit paasiniarlugu aamma iliuuseqarsinnaavutit.

7. Jeremia nalimini juutit amerlanersaasa uummataat pillugit qanoq allappa?

⁷ Uummaterput assersuutaasoq misissortariaqarparput. Jeremiap nalaani juutit assersuutaasumik uummataat Jehovap qanoq isumaqarfigai? Jeremiap akissutaa maluginiaruk: “[Israelikkut] tamarmik uummatimikkut kipineqanngitsuupput.” Inatsisini juutit angutit kipineqartarnissaannik piumasaqaataasoq matumani eqqarsaatiginngilaa. Sooq taamatut oqarsinnaavugut? Juutit angutit kipineqarsimagaluartut Jehovap ‘suli kipineqanngitsuunerarpai’, tassa ‘kipineqanngitsumik uummateqarnerarpai’. (Jer 9:25, 26, NW [9:24, 25]) Tamanna qanoq paasisariaqarpa?

8, 9. Jeremiap nalaani juutit amerlanerpaat qanoq iliortariaqarpat?

⁸ Juutit qanoq iliortariaqarnerannik Guutip oqaluttuuppai, tamannalu oqariartaatsimik “kipineqanngitsumik uummateqarneq”-mik paasinninnissatsinnut iluaqutigisinnaavarput. Oqarfigai uummammiutik  ajortut piiassagaat. Sooq? Ima nassuiaavoq: ‘Uumitsaleqqunanga iliornisi ajortut pillugit.’ Ajortumik uummateqaramik Jehovamut naalanngillat. (Atuakkit Markusi 7:20-23). Naalasseriitsumik pikitsitsiumatuumillu uummateqarput. Pissutiginiagaat eqqarsaataallu Jehovap isaani ajortuupput. (Atuakkit Jeremia 5:23, 24; 7:24-26). Guutip ima oqarfigai: “Kipineqartigitsi Naalakkamut uummatissilu kipineqanngissutaat peerlugu.” — Jer 4:4; 18:11, 12.

⁹ Jeremiap nalaani juutit uummatimikkut pilanneqartariaqarpullusooq. Mosesip nalaani Israelikkut tamatumunnga assingusumik ajornartorsiuteqarput. (5 Mos 10:16; 30:6) Juutit uummatimi “kipineqanngissutaat” qanoq peersinnaagamikku? Eqqarsaatitik, kissaatitik pissutiginiakkatilluunniit Jehovap peqqussutaanik sumiginnaassutigisinnaasatik peertariaqarpaat. — ApS 7:51.

10. Daavip uummatini assersuutaasoq qanoq misissuiffigaa, maligassiaalu qanoq ilaarsinnaavarput?

¹⁰ Uummatitta assersuutaasup paasinissaanut Guutimit ikiorneqarsimanerput qujamasuutigisariaqarparput. Jehovamut kiffaagaluarluta uummaterput ilumut ernumassutigisariaqarparput? Ilagiinni amerlanerit Jehovamut aalajaallutik kiffartorput minguitsumillu ileqqoqarlutik. ‘Figeniunngillat ajortut.’ Eqqaamassavalli Daavi naapertuilluartuutitaagaluarluni Jehovamut ima qinummat: “Misissuiffiginnga, Guuti, ilisimajullu uummatiga, misilinnga, eqqarsaatikka ilisimaniakkit. Alapernaasinnga guutipiluit aqqutaannik atuaanersunga.” — Tuss 17:3; 139:23, 24.

11, 12. (a) Sooq uummaterput misissortariaqarparput? (b) Jehova qanoq iliornavianngila?

¹¹ Jehovap kissaatigaa imminik ilisimannilissasugut, tassa tassannga akuerisaalissasugut akuerisaajuassasugullu. Jeremia allappoq Jehovap naapertuilluartuutitaasut misissuiffigisarai aamma “tartut uummatillu” nalunngikkai. (Jer 20:12) Jehovap allaat naapertuilluartuutitaasut uummataat misissuiffigisarmagit, tamatta qanoq uummammioqarnerluta misissortariaqarparput. (Atuaruk Tussiaat 11:5). Taamaaliorutta imaassinnaavoq paasigipput qamannga pisumik eqqunngitsumik isiginnittaaseqarluta, misigissuseqarluta anguniagaqarlutaluunniit uummatitsinnik misikkarinnginnerulersitsisumik. Imaassinnaavoq Jehovamut naalanniaasaartartugut. Uummatitsinnit taanna ajortoq peerumallugu uummatikkut assersuutaasumik pilanneqartariaqarsinnaavugut. Illit aamma taamatut isumaqaruit, taava uummatinni assersuutaasumi suna misissussaviuk? Qanoq allannguisinnaavit? — Jer 4:4.

¹² Jehovap allannguinissatsinnut pinngitsaalinavianngilaatigut. Oqarpoq ‘figenit pitsaasut’ ‘uummammik imminik ilisimannittumik tuniumaarlugit’. Uummamminnilli allannguinissaannut pinngitsaalinavianngilai. Guutimik ilisimannilernissaminnut piumassuseqartariaqarput, uaguttaaq taamaattariaqarpugut.

13, 14. Inuup uummammiuni qanoq navianartorsiulissutigisinnaavai?

¹³ Jiisusi oqarpoq inuup uummammiuni  pissutigalugit ‘eqqarsaatipiloqalersinnaasoq’, toqutsisinnaasoq, allasiorsinnaasoq imaluunniit kinguaassiuutitigut inuunerlulersinnaasoq. (Matt 15:19) Assersuutigalugu inuk uummammigut kissaatipiloqarnini pissutigalugu allasiorsinnaalluniluunniit kinguaassiuutitigut inuunerlussinnaavoq. Peqqissiminngikkuni Guutimit iluarisaaleqqinngisaannassaaq. Ingasattumilluunniit ajortuliunngikkaluarluni uummammigut kissaatipiloqarnini ineriartortilersinnaavaa. (Atuakkit Matthæusi 5:27, 28). Uummatitsinni kissaatipiloqannginnissatsinnik qulakkeerinissarput pingaaruteqarpoq. Angutaaguit arnamik arnaaguillu angummik isertorlutit Jehovap iluarinngisaatut eqqarsaatiginnittarpit? Uummammiugisatit allanngortittariaqarpigit?

¹⁴ Taamatuttaaq kristumiup qatanngutiminik kamaassinerminik ineriartortitsiguni qatanngunni uummammigut uumigilersinnaavaa. (3 Mos 19:17) Taamatut misigiunnaarnissani tamaviaarluni sulissutigisariaqarpaa. — Matt 5:21, 22.

15, 16. (a) Kristumiu qanoq ‘uummatimigut kipineqanngitsuusinnaagami’? (b) Sooq Jehovap ‘uummatikkut kipineqanngitsuuneq’ iluarinngilaa?

¹⁵ Kristumiut amerlanerit taama ittunik uummatimikkut kissaateqarusunnatillu misigissuseqarusunngillat. Taamaakkaluartoq Jiisusip “eqqarsaatipiluit” eqqartorpai. Assersuutigalugu isumaqarsinnaavugut ilaquttanut ilumoorfiginninneq sunit tamanit pingaarnerpaasoq. Soorunami kristumiut ullumikkut inuit “asanniuitsut” assiginagit ilaquttatik asavaat. (2 Tim 3:1, 3) Ilaquttatsinnulli ilumoorfiginninnitsinnut tunngatillugu ingasattajaalersinnaavugut. Inuppassuit tuluit ima oqariartaasiat isumaqatigaat: “Aak imermit kinerneruvoq.” Ilaquttatik ajuallatsinneqaraangata aamma namminneq ajuallatsinneqartutut misigisarput. Dina ajortumik pineqarmat qatanngutai kamarujussualerput. Tamatuma kingunerisaanik taakkua anguterpassuit toqorarpaat. (1 Mos 34:13, 25-30) Absalomip uummammigut misigissutsini ajortut pissutigalugit Amnoni toquppaa. (2 Sam 13:1-30) Aap, “eqqarsaatipiluit” ulorianangaarsinnaapput.

¹⁶ Inuit ilaat ilaquttatik ajortumik pineqaraangata, imaluunniit ajortumik pineqarsorigaangamikkit, kamarujussuartarput. Ajuallatsitsisimasuusorisartik qanoq pisarpaat? Imaassinnaavoq peqatigiumasanngikkaat imaluunniit angerlarsimaffimminnut qaaqqorusunneq ajoraat. (Hebr 13:1, 2) Kristumiuli qatanngumminik asannittoq taamatut pissusilersornavianngilaq. Jehovap qanoq uummammioqarnersugut nalunngilaa.  Misigissutsit ajortut taakku uummammiugigigut takuguniuk oqassagaluarpoq ‘uummatikkut kipineqanngitsuusugut’. (Jer 9:24, 25) Jehovali ima oqarpoq: ‘Uummatissi kipineqanngissutaat peersiuk.’ — Jer 4:4.

17. Sooq Jehovamik mianerinnikkutta uummatitsinnik allannguinissarput ajornannginnerulissava?

¹⁷ Uummatit assersuutaasoq misissoreerlugu imaassinnaavoq paasigit Jehovap maleruaqqusaatut iliuuseqarniaasaartarlutit. Imaassinnaavoq allaat ilaatigut ‘uummatikkut kipineqanngitsutut’ ittartutit. Imaassinnaavoq allat illit pillutit qanoq eqqarsarnersut annilaangagisarit. Imaassinnaavorluunniit tusaamasanngorusuttutit imaluunniit pisuunngorusuttutit. Immaqa ilaannikkut naalasseriittarputit imaluunniit nammineq isummat malillugu iliuuseqarusuttartutit. Allat taamatut misigisimapput. (Jer 7:24; 11:8) Jeremia allappoq nalimini juutit ilumuunngitsut “naalasseriitsunik saqitseriitsunillu” uummateqartut. Jehovamit asaneqaraluarlutik pisariaqartitaminnillu pilersorneqaraluarlutik taassuminnga ‘mianerinninngillat’. (Jer 5:23, 24) Jehovamik mianerinnikkutta, tassa taassuminnga ataqqinnikkutta, uummatitsinnit ajortut piissavavut. Taamaaliornitsigut uummatitsinnik allannguinissarput Jehovallu peqqusineratut iliornissarput ajornannginnerulissaaq.

18. Angerutsimut nutaamut ilaasut Jehovap qanoq neriorsorpai?

¹⁸ Taamatut iliuuseqarniartuarutta Jehovap imminik ‘uummammik ilisimannittumik’ tunissavaatigut. Taamaaliornissani tanitanut, angerutsimut nutaamut ilaasunut, neriorsuutigaa ima oqarami: “Inatsisinnik ilumiulissavakka uummataannullu allallugit, taakkualu Guutigissavaannga, uangalu innuttarissavakka.” Imalu nangippoq: “Nunaqqatigiit qatanngutigiilluunniit imminnut ilinniartittarunnaassapput oqarlutik: ‘Naalagaq ilisimajuk!’ — tassa tamarmik minnernit annernut ilisimammannga . . . iluanngitsuliaannik isumakkeerfigissagakkit ajortuliaallu eqqaaqqinnagit.” — Jer 31:31-34. *

19. Suna qilanaarisinnaavarput?

¹⁹ Guutip neriorsuutaasa eqquunnissaat qilanaaraarput. Tamatta Jehova ilisarisimalerusuttariaqarparput taassumalu innuttaanut ilaarusuttariaqarluta. Taamaallaalli Kristusip utertitsissutitut pilliutaa tunngavigalugu ajortitsinnik isumakkeerfigineqarnikkut Jehova naassaanngitsumik ilisarisimalersinnaavarput. Isumakkeerfigineqarsinnaanerput pissutigalugu allat isumakkeerfigerusuttariaqarpavut, aamma allaat taamaaliornissaq sapernaraluarpat. Allanik kamaassinnginnissarput uumissuinnginnissarpulluunniit sapinngisarput tamaat sulissutigisariaqarparput. Taamaalilluta ersersissavarput Jehovamik kiffartorfiginnikkusulluta aamma taassuminnga ilisarisimanninnerulerusulluta. Uaguttaaq Jehovamit ima oqarfigineqarusuppugut: “Ujarussinga nanissavassinga; uummatissigut iluunngarlusi ujarussinga ilissinnut nanisassaatikkumaarpunga.” — Jer 29:13, 14.