សំណួរពីអ្នកអាន
តើលោកយេស៊ូចង់មានន័យយ៉ាងណាពេលលោកបានមានប្រសាសន៍ថា៖ «កុំគិតស្មានថាខ្ញុំបានមក ដើម្បីនាំយកសន្តិភាព»ឡើយ?
លោកយេស៊ូបានបង្រៀនមនុស្សឲ្យមានសន្តិភាពជាមួយគ្នា។ ប៉ុន្តែ នៅពេលមួយ លោកបានប្រាប់ពួកសាវ័ករបស់លោកថា៖ «កុំគិតស្មានថាខ្ញុំបានមក ដើម្បីនាំយកសន្តិភាពមកឲ្យផែនដីឡើយ។ ប៉ុន្តែ ខ្ញុំបានមកដើម្បីនាំឲ្យមានទំនាស់ មិនមែនដើម្បីនាំឲ្យមានសន្តិភាពទេ។ ព្រោះខ្ញុំបានមកដើម្បីនាំឲ្យកូនប្រុសទាស់នឹងឪពុក កូនស្រីទាស់នឹងម្ដាយ ហើយកូនប្រសាស្រីទាស់នឹងម្ដាយក្មេក»។ (ម៉ាថ. ១០:៣៤, ៣៥) តើលោកយេស៊ូចង់មានន័យយ៉ាងណា?
លោកយេស៊ូមិនចង់បំបែកបំបាក់ក្រុមគ្រួសារទេ ប៉ុន្តែលោកដឹងថាសេចក្ដីបង្រៀនរបស់លោក អាចធ្វើឲ្យក្រុមគ្រួសារខ្លះទាស់ទែងគ្នា។ ដូច្នេះ ពួកអ្នកដែលចង់ធ្វើជាអ្នកកាន់តាមលោកយេស៊ូគ្រិស្តនិងទទួលការជ្រមុជទឹក ត្រូវដឹងថាជួនកាលសមាជិកក្រុមគ្រួសារមិនពេញចិត្តនឹងការសម្រេចចិត្តនេះរបស់ពួកគេទេ។ បើគូដែលមិនមែនជាអ្នកជឿ ឬសមាជិកឯទៀតក្នុងក្រុមគ្រួសារប្រឆាំងពួកគេ នេះអាចធ្វើឲ្យពួកគេពិបាកកាន់ខ្ជាប់តាមសេចក្ដីបង្រៀនរបស់គ្រិស្តយ៉ាងស្មោះត្រង់។
គម្ពីរលើកទឹកចិត្តគ្រិស្តសាសនិកឲ្យ«មានសន្តិភាពជាមួយនឹងមនុស្សទាំងអស់»។ (រ៉ូម ១២:១៨) ប៉ុន្តែ សេចក្ដីបង្រៀនរបស់លោកយេស៊ូអាចប្រៀបដូចជា«ដាវ»ក្នុងក្រុមគ្រួសារខ្លះ។ នេះកើតឡើងពេលដែលសមាជិកណាម្នាក់ក្នុងក្រុមគ្រួសារទទួលយកសេចក្ដីបង្រៀនរបស់លោកយេស៊ូ កាលដែលសមាជិកឯទៀតបដិសេធឬប្រឆាំងសេចក្ដីបង្រៀននោះ។ ក្នុងករណីនេះ សាច់ញាតិឬពួកអ្នកដែលនៅក្នុងផ្ទះ ទៅជា«សត្រូវ»របស់បុគ្គលដែលរៀនសេចក្ដីពិត។—ម៉ាថ. ១០:៣៦
ពួកអ្នកកាន់តាមគ្រិស្តដែលរស់នៅក្នុងក្រុមគ្រួសារដែលមានជំនឿខុសៗគ្នាប្រហែលជាត្រូវធ្វើការសម្រេចចិត្តនៅពេលខ្លះថា តើពួកគេនឹងផ្គាប់ចិត្តព្រះយេហូវ៉ានិងលោកយេស៊ូ ឬក៏សាច់ញាតិ។ ជាឧទាហរណ៍ សាច់ញាតិដែលមិនមែនជាអ្នកជឿនឹងព្យាយាមបង្ខំពួកគេឲ្យចូលរួមក្នុងពិធីបុណ្យសាសនា។ ពេលមានការល្បងលបែបនេះ តើពួកគេនឹងធ្វើឲ្យអ្នកណាពេញចិត្ត? លោកយេស៊ូបានមានប្រសាសន៍ថា៖ «អ្នកណាដែលស្រឡាញ់ឪពុកឬម្ដាយជាងស្រឡាញ់ខ្ញុំ អ្នកនោះមិនសមនឹងធ្វើជាអ្នកកាន់តាមខ្ញុំទេ»។ (ម៉ាថ. ១០:៣៧) លោកយេស៊ូមិនមែនចង់មានន័យថាដើម្បីទៅជាអ្នកកាន់តាមលោក ពួកគេត្រូវស្រឡាញ់ឪពុកម្ដាយតិចជាងទេ។ ផ្ទុយទៅវិញ លោកចង់បង្រៀនថាពួកគេត្រូវដឹងថាអ្នកណាសំខាន់បំផុតក្នុងជីវិតរបស់ពួកគេ។ បើសាច់ញាតិដែលមិនមែនជាអ្នកជឿប្រឆាំងយើង មិនឲ្យគោរពប្រណិប័តន៍ព្រះយេហូវ៉ា យើងនៅតែស្រឡាញ់ពួកគេ ប៉ុន្តែយើងស្រឡាញ់ព្រះខ្លាំងជាង។
ច្បាស់ណាស់ ការប្រឆាំងពីក្រុមគ្រួសារអាចធ្វើឲ្យយើងឈឺចិត្តខ្លាំងណាស់។ ប៉ុន្តែ ពួកអ្នកកាន់តាមលោកយេស៊ូចាំអំពីប្រសាសន៍របស់លោកដែលថា៖ «អ្នកណាដែលមិនព្រមលីបង្គោលទារុណកម្មរបស់ខ្លួនមកតាមខ្ញុំ អ្នកនោះមិនសមនឹងធ្វើជាអ្នកកាន់តាមខ្ញុំទេ»។ (ម៉ាថ. ១០:៣៨) និយាយឲ្យស្រួលយល់ គ្រិស្តសាសនិកចាត់ទុកថាការប្រឆាំងពីក្រុមគ្រួសារជាការរងទុក្ខមួយដែលពួកអ្នកកាន់តាមគ្រិស្តសុខចិត្តទទួល។ នៅពេលដំណាលគ្នា ពួកគេសង្ឃឹមថាការប្រព្រឹត្តល្អរបស់ពួកគេ នឹងជំរុញចិត្តសមាជិកក្រុមគ្រួសារដែលមិនមែនជាអ្នកជឿឲ្យផ្លាស់ប្ដូរគំនិតនិងចង់រៀនដំណឹងពីគម្ពីរ។—១ពេ. ៣:១, ២