តើលោកយេស៊ូជាព្រះដែលមានអំណាចខ្លាំងក្លាបំផុតឬ?
តើលោកយេស៊ូជាព្រះដែលមានអំណាចខ្លាំងក្លាបំផុតឬ?
គេនិយមឆ្លើយថា:
◼ «មែន! លោកយេស៊ូជាព្រះដែលមានអំណាចខ្លាំងក្លាបំផុត»។
◼ «ព្រះបានបង្ហាញខ្លួនជាលោកយេស៊ូ»។
តើលោកយេស៊ូមានប្រសាសន៍ថាអ្វី?
◼ «ប្រសិនបើអ្នករាល់គ្នាស្រឡាញ់ខ្ញុំ នោះអ្នករាល់គ្នានឹងត្រេកអរដោយសារខ្ញុំទៅឯបិតាដែលនៅស្ថានសួគ៌ ពីព្រោះបិតានៅស្ថានសួគ៌គឺធំជាងខ្ញុំ»។ (យ៉ូហាន ១៤:២៨) លោកយេស៊ូបានទទួលស្គាល់ថាលោក និងបិតារបស់លោកដែលនៅស្ថានសួគ៌មិនមានភាពស្មើគ្នាឡើយ។
◼ «ខ្ញុំនឹងឡើងទៅឯបិតារបស់ខ្ញុំនិងបិតារបស់អ្នករាល់គ្នា ហើយទៅឯព្រះរបស់ខ្ញុំនិងព្រះរបស់អ្នករាល់គ្នា»។ (យ៉ូហាន ២០:១៧) លោកយេស៊ូមិនបានរៀបរាប់អំពីខ្លួនជាព្រះទេ តែបាននិយាយអំពីព្រះថាជាបុគ្គលផ្សេងដាច់ដោយឡែកពីលោក។
◼ «ខ្ញុំមិនបាននិយាយចេញពីចិត្តរបស់ខ្ញុំទេ ប៉ុន្តែបិតានៅស្ថានសួគ៌ដែលបានចាត់ខ្ញុំឲ្យមក បានឲ្យបញ្ញត្ដិមួយមកខ្ញុំដោយផ្ទាល់ ស្តីអំពីអ្វីដែលខ្ញុំត្រូវប្រាប់ និងអ្វីដែលខ្ញុំត្រូវនិយាយ»។ (យ៉ូហាន ១២:៤៩) សេចក្ដីបង្រៀនរបស់លោកយេស៊ូមិនបានមកពីលោកផ្ទាល់ទេ តែមកពីបិតានៅស្ថានសួគ៌វិញ។
លោកយេស៊ូពោលថាលោកជាបុត្ររបស់ព្រះ មិនមែនជាព្រះដែលមានអំណាចខ្លាំងក្លាបំផុតឡើយ។ ប្រសិនបើលោកយេស៊ូជាព្រះ តើលោកកំពុងអធិដ្ឋានដល់នរណាពេលលោកស្ថិតនៅផែនដី? (ម៉ាថាយ ១៤:២៣; ២៦:២៦-២៩) ប្រសិនបើលោកជាព្រះមែន លោកយេស៊ូប្រាកដជាមិនធ្វើពុតអធិដ្ឋានដល់បុគ្គលផ្សេងទៀតទេ!
ពេលអ្នកកាន់តាមលោកយេស៊ូពីរនាក់សុំលោកឲ្យពួកគេមានឋានៈពិសេសក្នុងរាជាណាចក្ររបស់លោក នោះលោកឆ្លើយថា៖ «មិនមែនខ្ញុំទេដែលសម្រេចឲ្យអង្គុយនៅខាងស្ដាំឬខាងឆ្វេងខ្ញុំ តែគឺជាកន្លែងរបស់អ្នកដែលបិតារបស់ខ្ញុំបានរៀបចំកន្លែងនោះទុកឲ្យ»។ (ម៉ាថាយ ២០:២៣) តើលោកយេស៊ូបានកុហកពួកគេពេលលោកឆ្លើយថាលោកមិនមានសិទ្ធិដើម្បីសម្រេចតាមសំណូមពររបស់ពួកគេទេ? មិនមែនទាល់តែសោះ! ផ្ទុយទៅវិញ ដោយចិត្តរាបទាបលោកទទួលស្គាល់ថាមានតែព្រះទេដែលមានសិទ្ធិដើម្បីធ្វើការសម្រេចចិត្តបែបនោះ។ លោកយេស៊ូក៏បានពន្យល់ដែរថាមានអ្វីខ្លះៗដែលលោកឬបណ្ដាទេវតាមិនបានជ្រាបឡើយ តែមានតែបិតានៅស្ថានសួគ៌ប៉ុណ្ណោះដែលជ្រាប។—ម៉ាកុស ១៣:៣២
តើលោកយេស៊ូទាបជាងព្រះដោយសារលោកជាមនុស្សនៅផែនដីតែប៉ុណ្ណោះឬ? មិនមែនទេ។ សូម្បីតែក្រោយពេលដែលលោកទទួលមរណភាពនិងត្រូវបានប្រោសឲ្យរស់ឡើងវិញក្ដី គម្ពីរបានពិពណ៌នាថាលោកយេស៊ូស្ថិតនៅក្រោមបង្គាប់ព្រះយេហូវ៉ា។ សាវ័កប៉ុលបានរំលឹកយើងថា៖ «ប្រមុខរបស់គ្រិស្តគឺព្រះ»។ (កូរិនថូសទី១ ១១:៣) គម្ពីរបានរៀបរាប់ថានៅថ្ងៃអនាគត«ក្រោយពីព្រះបានធ្វើឲ្យអ្វីៗទាំងអស់ចុះចូលចំពោះបុត្ររបស់លោក បុត្រនោះនឹងចុះចូលចំពោះព្រះដែលបានធ្វើឲ្យអ្វីៗទាំងអស់ចុះចូលចំពោះបុត្រនោះ ដើម្បីឲ្យព្រះធ្វើជាអ្វីៗទាំងអស់ដល់មនុស្សទាំងអស់»។—កូរិនថូសទី១ ១៥:២៨
គឺច្បាស់ហើយ លោកយេស៊ូមិនមែនជាព្រះដែលមានអំណាចខ្លាំងក្លាបំផុតឡើយ។ ហេតុនេះហើយបានជាលោកនិយាយអំពីបិតារបស់លោកថា «ព្រះរបស់ខ្ញុំ»។—ការបើកបង្ហាញ ៣:២, ១២; កូរិនថូសទី២ ១:៣, ៤ *
[កំណត់សម្គាល់]
^ វគ្គ 12 ដើម្បីទទួលព័ត៌មានថែមទៀតអំពីរឿងនេះ សូមមើលទំព័រ២៣២-២៣៤នៃសៀវភៅតើព្រះគម្ពីរពិតជាបង្រៀនយ៉ាងណា? ដែលបានបោះពុម្ពដោយសាក្សីព្រះយេហូវ៉ា។
[ឃ្លាអក្សរធំនៅទំព័រ៦]
លោកយេស៊ូមានប្រសាសន៍ថា មានអ្វីខ្លះៗដែលលោកឬបណ្ដាទេវតាមិនបានជ្រាបឡើយ តែមានតែបិតានៅស្ថានសួគ៌ប៉ុណ្ណោះដែលជ្រាប