តើអ្វីជាជំនឿ?
តើអ្វីជាជំនឿ?
តើលោកអ្នកនឹងបកស្រាយពាក្យជំនឿយ៉ាងណា? មនុស្សខ្លះគិតថាជំនឿជាការជឿដោយគ្មានទីសំអាង។ អ្នកនិពន្ធនិងអ្នកសារព័ត៌មានជនជាតិអាម៉េរិកម្នាក់ដែលមានទឹកមាត់ប្រៃ បានបកស្រាយពាក្យជំនឿថា «ជាការជឿដោយងងឹតងងុលទៅលើអ្វីដែលមិនអាចកើតឡើង» (H. L. Mencken)។
ខុសស្រឡះពីនេះ គម្ពីរមិនបានពិពណ៌នាជំនឿថាជាការជឿដែលគ្មានទីសំអាង ឬជឿដោយងងឹតងងុលទេ។ បណ្ដាំរបស់ព្រះចែងថា៖ «ជំនឿគឺជាការទុកចិត្តដោយមានទីសំអាងមាំមួនថា អ្វីៗនឹងកើតឡើងដូចសង្ឃឹម ហើយជាការឃើញភ័ស្តុតាងដែលនាំឲ្យជឿជាក់ថា អ្វីដែលភ្នែកមើលមិនឃើញពិតជាមានមែន»។—ហេប្រឺ ១១:១
ដូច្នេះ ដោយសារមនុស្សមានមតិខុសៗពីគ្នាអំពីជំនឿ សូមឲ្យយើងពិចារណាចម្លើយចំពោះសំណួរដែលមានដូចតទៅនេះ:
• របៀបដែលគម្ពីរពន្យល់និងអ្វីដែលមនុស្សគិតអំពីជំនឿ តើខុសគ្នាយ៉ាងណា?
• ហេតុអ្វីបានជាចាំបាច់ឲ្យយើងមានជំនឿដូចបានរៀបរាប់ក្នុងគម្ពីរ?
• តើអ្នកអាចពង្រឹងជំនឿទៅលើព្រះយ៉ាងដូចម្ដេច?
ប័ណ្ណកម្មសិទ្ធិនិងភ័ស្តុតាងជាក់ស្តែង
កាលដែលគេកំពុងសរសេរសៀវភៅគម្ពីរឈ្មោះហេប្រឺ នោះពាក្យភាសាក្រិចដែលបកប្រែថា«ការទុកចិត្តដោយមានទីសំអាងមាំមួន»បានត្រូវប្រើជាទូទៅ។ ជាញយដង ពាក្យនេះមាននៅវិក្កយបត្រ ហើយបង្កប់អត្ថន័យថា មានការធានារ៉ាប់រងដែលបុគ្គលម្នាក់នឹងទទួលអ្វីមួយនៅអនាគត។ ហេតុនេះហើយបានជាឯកសារយោងមួយបង្ហើបថា សៀវភៅហេប្រឺ ១១:១អាចបកប្រែថា៖ «ជំនឿគឺជាប័ណ្ណកម្មសិទ្ធិដែលបញ្ជាក់ថាអ្វីៗនឹងកើតឡើងដូចសង្ឃឹម»។
លោកអ្នកក៏ជឿដូចនេះដែរ បើលោកអ្នកធ្លាប់ទិញអីវ៉ាន់ពីហាង ហើយចាំឲ្យគេដឹកបញ្ជូនអីវ៉ាន់នោះដល់ផ្ទះ។ លោកអ្នកមានវិក្កយបត្រ ហើយនេះជួយឲ្យលោកអ្នកជឿថាហាងនោះនឹងបញ្ជូនអីវ៉ាន់ដែលលោកអ្នកបានទិញ។ បើនិយាយឲ្យចំទៅ វិក្កយបត្រគឺប័ណ្ណកម្មសិទ្ធិរបស់លោកអ្នក ដែលធានាថាលោកអ្នកនឹងទទួលអ្វីដែលបានទិញ។ ប្រសិនបើលោកអ្នកបាត់ឬបោះចោលវិក្កយបត្រ នោះលោកអ្នកបាត់ភ័ស្តុតាងដែលបញ្ជាក់ថាអីវ៉ាន់នោះជាកម្មសិទ្ធិរបស់លោកអ្នក។ ស្រដៀងគ្នាដែរ អស់អ្នកដែលមានជំនឿថាព្រះនឹងធ្វើតាមសេចក្ដីសន្យារបស់លោក មានការធានាថាអ្វីៗនឹងកើតឡើងដូចពួកគាត់បានសង្ឃឹម។ ផ្ទុយទៅវិញ អ្នកដែលគ្មានជំនឿឬអស់ជំនឿ មិនមានសិទ្ធិទទួលអ្វីដែលព្រះបានសន្យាឡើយ។—យ៉ាកុប ១:៥-៨
ប្រយោគទី២នៅសៀវភៅហេប្រឺ ១១:១ បានត្រូវបកប្រែថា«ការឃើញភ័ស្តុតាងដែលនាំឲ្យជឿជាក់»។ ប្រយោគនេះបង្កប់អត្ថន័យថា មានភ័ស្តុតាងជាក់ស្តែងដែលបញ្ជាក់ការពិត ខុសពីអ្វីដែលភ្នែកមើលឃើញ។ ជាឧទាហរណ៍ ព្រះអាទិត្យរះពីទិសខាងកើត ធ្វើដំណើរកាត់លំហមេឃរហូតដល់លិចបាត់នៅទិសខាងលិច។ ដូច្នេះ មើលទៅដូចជាព្រះអាទិត្យវិលជុំវិញផែនដី។ ក៏ប៉ុន្តែ ការសិក្សាស្រាវជ្រាវពីភពនិងផ្កាយ ហើយគណិតវិទ្យាបង្ហាញភ័ស្តុតាងថា អ្វីៗទាំងអស់មិនវិលជុំវិញផែនដីទេ។ ពេលដែលលោកអ្នកយល់និងព្រមទទួលស្គាល់ថាភ័ស្តុតាងនោះគឺពិត នោះលោកអ្នកមានជំនឿថាផែនដីវិលជុំវិញព្រះអាទិត្យ ទោះជាភ្នែកមើលខុសពីនេះក៏ដោយ។ ដូច្នេះ ជំនឿមិនបានន័យថាលោកអ្នកជឿទៅលើអ្វីដែលលោកអ្នកមិនយល់ទេ។ ផ្ទុយទៅវិញ ជំនឿជួយលោកអ្នកឲ្យមានសមត្ថភាពយល់ការពិត។
ហេតុអ្វីសំខាន់ឲ្យយើងមានជំនឿរឹងមាំ?
ជំនឿរឹងមាំដែលមានមូលដ្ឋានលើភ័ស្តុតាងជាក់ស្តែង គឺជាជំនឿដែលសៀវភៅគម្ពីរបំផុសទឹកចិត្តយើងឲ្យមាន ទោះជាតម្រូវឲ្យយើងប្ដូរអ្វីដែលយើងជឿពីមុនក៏ដោយ។ ជំនឿបែបនេះគឺសំខាន់ណាស់ ព្រោះសាវ័កប៉ូលបានសរសេរថា៖ «បើគ្មានជំនឿ មិនអាចធ្វើឲ្យព្រះពេញចិត្តបានឡើយ ព្រោះអ្នកដែលចូលទៅជិតព្រះ ត្រូវតែជឿថាមានព្រះ ហើយជឿថាលោកឲ្យរង្វាន់ដល់អ្នកដែលខំស្វែងរកលោកអស់ពីចិត្ត»។—ហេប្រឺ ១១:៦
ការបណ្ដុះឲ្យមានជំនឿរឹងមាំគឺមានការពិបាកជាច្រើន។ ប៉ុន្តែ បើលោកអ្នកធ្វើតាមជំហានបួនយ៉ាងដែលមាននៅទំព័របន្តបន្ទាប់នេះ នោះលោកអ្នកអាចទទួលជោគជ័យក្នុងការបណ្ដុះឲ្យមានជំនឿរឹងមាំ។