«ព្រះស្រឡាញ់អ្នកដែលឲ្យដោយចិត្ដសប្បាយ»
ចូរចូលទៅជិតព្រះ
«ព្រះស្រឡាញ់អ្នកដែលឲ្យដោយចិត្តសប្បាយ»
តើអំណោយបែបណាដែលធ្វើឲ្យអ្នកដឹងគុណខ្លាំងបំផុត? ប្រាកដណាស់ យើងភាគច្រើនសប្បាយចិត្តទទួលអំណោយពីអ្នកដែលឲ្យដោយសេចក្ដីស្រឡាញ់ មិនមែនឲ្យដោយសារតែជាភារកិច្ចឬកាតព្វកិច្ចនោះទេ។ ពេលយើងឲ្យដោយផុសចេញពីចិត្ត នោះគឺសំខាន់ចំពោះយើង។ ជាងនោះទៅទៀត នេះគឺសំខាន់ចំពោះព្រះ។ សូមពិចារណាអំពីពាក្យដែលសាវ័កប៉ូលបានសរសេរក្រោមការដឹកនាំរបស់ព្រះនៅ កូរិនថូសទី២ ៩:៧។
ហេតុអ្វីប៉ូលបានសរសេរពាក្យទាំងនោះ? ពីព្រោះគាត់ចង់លើកទឹកចិត្តគ្រិស្តសាសនិកនៅក្រុងកូរិនថូសឲ្យផ្ដល់ជំនួយដល់បងប្អូនរួមជំនឿដែលមានសេចក្ដីត្រូវការនៅតំបន់យូឌា។ តើគាត់បានព្យាយាមបង្ខំគ្រិស្តសាសនិកនៅក្រុងកូរិនថូសឲ្យធ្វើដូច្នេះទេ? មិនមែនទេ។ ផ្ទុយទៅវិញ គាត់សរសេរថា៖ «ចូរអ្នករាល់គ្នាម្នាក់ៗធ្វើតាមការសម្រេចចិត្តរបស់ខ្លួនចុះ មិនមែនដោយទើសទាល់ឬដោយមានគេបង្ខំឡើយ ព្រោះព្រះស្រឡាញ់អ្នកដែលឲ្យដោយចិត្តសប្បាយ»។ សូមឲ្យយើងពិចារណាយ៉ាងដិតដល់នូវពាក្យដាស់តឿននោះ។
«តាមការសម្រេចចិត្តរបស់ខ្លួន»។ យោងតាមពាក្យរបស់ប៉ូល គ្រិស្តសាសនិកពិតឲ្យ ដោយសារនោះជា«ការសម្រេចចិត្តរបស់ខ្លួន»។ ដំណាលគ្នានោះ គ្រិស្តសាសនិកត្រូវគិតឲ្យបានហ្មត់ចត់អំពីសេចក្ដីត្រូវការរបស់បងប្អូនរួមជំនឿ។ បណ្ឌិតម្នាក់និយាយថាតាមភាសាដើម ពាក្យដែលបកប្រែថា«សម្រេចចិត្ត . . . បង្កប់អត្ថន័យថាការតាំងចិត្តទុកជាមុន»។ ដូច្នេះ គ្រិស្តសាសនិកម្នាក់គិតជាមុនអំពីសេចក្ដីត្រូវការរបស់បងប្អូនរួមជំនឿ ហើយគាត់ពិចារណានូវអ្វីដែលគាត់អាចធ្វើដើម្បីជួយបំពេញសេចក្ដីត្រូវការរបស់បងប្អូនទាំងនោះ។—យ៉ូហានទី១ ៣:១៧
«មិនមែនដោយទើសទាល់ឬដោយមានគេបង្ខំឡើយ»។ ប៉ូលបានបញ្ជាក់ចិត្តគំនិតពីរយ៉ាងដែលគ្រិស្តសាសនិកពិតមិនគួរមាន គឺឲ្យដោយទើសទាល់ និងដោយមានគេបង្ខំ។ អ្នកដែលឲ្យដោយបង្ខំ ដោយសារគាត់បានទទួលការបង្ខិតបង្ខំឲ្យធ្វើដូច្នេះ។ តើយើងពិតជាចង់ទទួលអំណោយមួយពីអ្នកដែលឲ្យដោយទើសទាល់ឬដោយបង្ខំទេ?
«ព្រះស្រឡាញ់អ្នកដែលឲ្យដោយចិត្តសប្បាយ»។ ប៉ូលបាននិយាយថា នៅពេលគ្រិស្តសាសនិកម្នាក់សម្រេចចិត្តឲ្យ នោះគាត់គួរឲ្យដោយចិត្តសប្បាយឬដោយអំណរ។ មែនហើយ ការឲ្យដោយមានបំណងចិត្តត្រឹមត្រូវ នោះនាំឲ្យមានសុភមង្គល។ (សកម្មភាព ២០:៣៥) អ្នកដែលឲ្យដោយចិត្តសប្បាយពិបាកនឹងលាក់នូវអំណររបស់ខ្លួន។ តាមពិត ពាក្យ«ចិត្តសប្បាយ»អាចពណ៌នាអំពីចិត្ត និងទឹកមុខរបស់អ្នកដែលឲ្យ។ ពេលអ្នកដែលឲ្យ ឲ្យដោយចិត្តសប្បាយ នោះធ្វើឲ្យយើងមានអារម្មណ៍កក់ក្ដៅខ្លាំង ហើយនេះក៏ធ្វើឲ្យព្រះមានអារម្មណ៍កក់ក្ដៅដែរ។ ការបកប្រែមួយទៀតថា«ព្រះស្រឡាញ់អ្នកដែលពេញចិត្តឲ្យ» (Contemporary English Version)។
ពាក្យដែលសាវ័កប៉ូលសរសេរក្រោមការដឹកនាំរបស់ព្រះ ជាគោលការណ៍សម្រាប់គ្រិស្តសាសនិកក្នុងការឲ្យ។ មិនថាយើងឲ្យពេលវេលា កម្លាំង ឬទ្រព្យសម្បត្ដិក្ដី សូមឲ្យយើងធ្វើដូច្នេះដោយស្ម័គ្រពីចិត្ត ហើយដោយសារយើងពិតជាសប្បាយចិត្តក្នុងការបង្ហាញចិត្តទូលាយចំពោះអ្នកឯទៀត ជាពិសេសអ្នកដែលមានសេចក្ដីត្រូវការ។ ការឲ្យបែបនោះមិនគ្រាន់តែធ្វើឲ្យយើងសប្បាយចិត្តប៉ុណ្ណោះទេ តែក៏ធ្វើឲ្យព្រះស្រឡាញ់យើងដែរ ព្រោះលោក«ស្រឡាញ់អ្នកដែលឲ្យដោយចិត្តសប្បាយ»។
លោកអ្នកអាចអាន:
[ឃ្លាអក្សរធំនៅទំព័រ១៣]
«ព្រះស្រឡាញ់អ្នកដែលពេញចិត្តឲ្យ»
