សំណួរទី៥
តើជាការសមហេតុផលទេឲ្យជឿលើគម្ពីរ?
តើអ្នកធ្លាប់យល់ខុសអំពីបុគ្គលណាម្នាក់ទេ? ប្រហែលអ្នកធ្លាប់ឮអ្នកឯទៀតនិយាយមិនល្អអំពីគាត់។ ប៉ុន្តែក្រោយមក ពេលដែលស្គាល់គាត់ អ្នកឃើញថាអ្វីដែលពួកគេបាននិយាយអំពីគាត់គឺខុសតែម្ដង។ ដូចគ្នាដែរ មនុស្សជាច្រើនធ្លាប់យល់ខុសអំពីគម្ពីរ តែក្រោយមកពួកគេឃើញថាគម្ពីរមិនមែនដូចពួកគេធ្លាប់គិតនោះទេ។
ជាឧទាហរណ៍ មនុស្សជាច្រើនដែលទទួលការអប់រំខ្ពស់មិនចូលចិត្តគម្ពីរទេ។ តើអ្នកដឹងថាមកពីមូលហេតុទេ? គឺដោយសារមនុស្សខ្លះធ្វើឲ្យអ្នកឯទៀតគិតថាគម្ពីរមិនសមស្របនឹងវិទ្យាសាស្ត្រ មិនសមហេតុផល ឬមានការពន្យល់មិនត្រឹមត្រូវ។ ប៉ុន្តែតើនោះជាការពិតទេ?
ពេលដែលអ្នកអានសៀវភៅស្តើងនេះ តើអ្នកភ្ញាក់ផ្អើលទេដែលដឹងថា អ្វីដែលគម្ពីររៀបរាប់អំពីវិទ្យាសាស្ត្រគឺត្រឹមត្រូវ? មនុស្សជាច្រើនបានភ្ញាក់ផ្អើលដែលរៀនថា អ្វីដែលមាននៅក្នុងគម្ពីរគឺខុសគ្នាពីអ្វីដែលអ្នកដឹកនាំសាសនាជាច្រើនបង្រៀន។ ជាឧទាហរណ៍ អ្នកខ្លះនិយាយថា គម្ពីរបង្រៀនថាព្រះបានបង្កើតសកលលោកនិងជីវិតទាំងឡាយក្នុងរយៈពេល៦ថ្ងៃដែលក្នុងមួយថ្ងៃមាន២៤ម៉ោង។ តាមពិតគម្ពីរមិនបាននិយាយអ្វីប្រឆាំងនឹងការប៉ាន់ស្មានរបស់ពួកអ្នកវិទ្យាសាស្ត្រស្ដីអំពីអាយុកាលនៃផែនដីឡើយ។ *
ម្យ៉ាងវិញទៀត អ្វីដែលគម្ពីររៀបរាប់អំពីរបៀបដែលព្រះបានបង្កើតជីវិតនៅផែនដីនេះ ផ្ដល់ឱកាសឲ្យអ្នកវិទ្យាសាស្ត្រអាចស្រាវជ្រាវច្រើនបាន។ គម្ពីរប្រាប់ថាជីវិតទាំងឡាយបានត្រូវបង្កើតមក«តាមពូជ»។ (លោកុប្បត្តិ ១:១១, ២១, ២៤) ពាក្យនេះប្រហែលជាមិនស្របតាមទ្រឹស្ដីវិទ្យាសាស្ត្រខ្លះៗមែន ទោះជាយ៉ាងនោះក៏ដោយក៏ពាក្យនោះគឺស្របតាមភ័ស្តុតាងជាក់ស្ដែង។ ទ្រឹស្ដីផ្លាស់ប្ដូរជានិច្ច តែហេតុការពិតមិនដែលផ្លាស់ប្ដូរទេ។
មនុស្សជាច្រើនស្ទាក់ស្ទើរក្នុងការពិនិត្យមើលគម្ពីរ ដោយសារពួកគេខកចិត្តនឹងសាសនា។ ពួកគេឃើញការលាក់ពុត អំពើពុករលួយនិងការចូលចិត្តធ្វើសង្គ្រាមនៅក្នុងអង្គការសាសនា។ ប៉ុន្តែ តើសមហេតុផលទេដែលអ្នកធ្វើការសន្និដ្ឋានអំពីគម្ពីរដោយមើលការប្រព្រឹត្តរបស់អង្គការសាសនា? អ្នកវិទ្យាសាស្ត្រដែលមានចិត្តគំនិតស្មោះត្រង់បានខឹងយ៉ាងខ្លាំង ដោយសារអ្នកប្រកាន់ពូជសាសន៍បានប្រើទ្រឹស្ដីនៃការវិវត្តន៍ដើម្បីគាំទ្រគំនិតប្រឆាំងពូជសាសន៍របស់ពួកគេ។ តើជាការត្រឹមត្រូវទេដែលវិនិច្ឆ័យទ្រឹស្ដីនៃការវិវត្តន៍ដោយផ្អែកលើរឿងនេះ? គឺល្អជាងឲ្យយើងពិនិត្យមើលការអះអាងរបស់អ្នកវិទ្យាសាស្ត្រ ហើយប្រៀបធៀបនឹងភ័ស្តុតាង។
យើងលើកទឹកចិត្តអ្នកឲ្យធ្វើដូចគ្នាជាមួយគម្ពីរ។ អ្នកប្រហែលជាភ្ញាក់ផ្អើលពេលឃើញថាសេចក្ដីបង្រៀនក្នុងគម្ពីរគឺខុសគ្នាឆ្ងាយពីអ្វីដែលសាសនាផ្សេងៗបង្រៀន។ ជាជាងគាំទ្រសង្គ្រាមនិងការប្រកាន់ពូជសាសន៍គម្ពីរបង្រៀនរាស្ត្ររបស់ព្រះឲ្យបដិសេធមិនធ្វើសង្គ្រាម អំពើឃោរឃៅគ្រប់យ៉ាង និងការស្អប់គ្នា។ (អេសាយ ២:២-៤; ម៉ាថាយ ៥:៤៣, ៤៤; ២៦:៥២) ជាជាងគ្រាន់តែជឿដោយគ្មានភ័ស្តុតាង គម្ពីរបង្រៀនថាភ័ស្តុតាងគឺសំខាន់ដើម្បីមានជំនឿ នេះជាអ្វីដែលយើងត្រូវការចាំបាច់ដើម្បីបម្រើព្រះ។ (រ៉ូម ១២:១; ហេប្រឺ ១១:១) គម្ពីរក៏លើកទឹកចិត្តយើងឲ្យពិនិត្យមើលសំណួរសំខាន់ៗនិងគួរឲ្យចាប់អារម្មណ៍ដែលមនុស្សធ្លាប់ឆ្ងល់។
ជាឧទាហរណ៍ តើអ្នកធ្លាប់ឆ្ងល់ទេថា បើសិនជាមានព្រះមែន‹ហេតុអ្វីលោកអនុញ្ញាតឲ្យមានអំពើអាក្រក់កើតឡើង?›។ គម្ពីរមានចម្លើយចំពោះសំណួរនេះ និងចម្លើយចំពោះសំណួរជាច្រើនឯទៀតដែរ។ ចម្លើយពីគម្ពីរធ្វើឲ្យអ្នកអស់ចម្ងល់។ * យើងលើកទឹកចិត្តឲ្យអ្នកស្វែងរកចម្លើយចំពោះសំណួរនេះ។ អ្នកអាចស្វែងរកចម្លើយដែលគួរឲ្យរំភើបចិត្ត សមហេតុផលនិងធ្វើឲ្យអស់ចម្ងល់ ដែលមានមូលដ្ឋានច្បាស់លាស់។
^ វគ្គ 5 សម្រាប់ព័ត៌មានបន្ថែមសូមមើលសៀវភៅស្តើង តើជីវិតទាំងឡាយមានអ្នកបង្កើតឬទេ? បោះពុម្ពផ្សាយដោយសាក្សីព្រះយេហូវ៉ា។
^ វគ្គ 9 សូមមើលជំពូកទី១១ក្នុងសៀវភៅតើគម្ពីរអាចបង្រៀនយើងអំពីអ្វី? បោះពុម្ពផ្សាយដោយសាក្សីព្រះយេហូវ៉ា។
លោកអ្នកក៏ប្រហែលជាចូលចិត្តដែរ
សំណួរនិងចម្លើយពីគម្ពីរ
តើគម្ពីរស្របគ្នានឹងវិទ្យាសាស្ត្រឬទេ?
តើគម្ពីរមានភាពខុសគ្នាខាងវិទ្យាសាស្ត្រឬទេ?
