តើសាសនាទាំងអស់គឺដូចគ្នា ហើយនាំឲ្យស្គាល់ព្រះឬទេ?

លេង

ចម្លើយក្នុងគម្ពីរ

សាសនាទាំងអស់គឺមិនដូចគ្នាទេ។ គម្ពីរមានឧទាហរណ៍ជាច្រើនអំពីសាសនាដែលព្រះមិនពេញចិត្ត។ សាសនាទាំងនេះមានពីរប្រភេទ។

ប្រភេទទី១: ការគោរពប្រណិប័តន៍ព្រះមិនពិត

គម្ពីរបានពណ៌នាអំពីការគោរពប្រណិប័តន៍ព្រះមិនពិតដោយប្រើពាក្យដូចជា«អសារឥតការ»និង«ឥតមានប្រយោជន៍»។ (យេរេមា ១០:៣-៥; ១៦:១៩, ២០) ព្រះយេហូវ៉ា aបានបង្គាប់បណ្ដាជនអ៊ីស្រាអែលពីសម័យបុរាណថា៖«កុំឲ្យមានព្រះឯណាទៀតនៅចំពោះអញឲ្យសោះ»។ (និក្ខមនំ ២០:៣, ២៣; ២៣:២៤) ពេលបណ្ដាជនអ៊ីស្រាអែលគោរពប្រណិប័តន៍ព្រះឯទៀត នោះ«សេចក្ដីខ្ញាល់របស់ព្រះយេហូវ៉ាក៏ឆួលឡើង»។—ជនគណនា ២៥:៣; លេវីវិន័យ ២០:២; ពួកចៅហ្វាយ ២:១៣, ១៤

ព្រះនៅតែមានចិត្តគំនិតដូចគ្នាចំពោះការគោរពប្រណិប័តន៍អ្នកណាឬអ្វីណាដែលគេ«ហៅថា‹ព្រះ›»។ (កូរិនថូសទី១ ៨:៥, ៦; កាឡាទី ៤:៨) លោកបង្គាប់ពួកអ្នកដែលចង់គោរពប្រណិប័តន៍លោកឲ្យឈប់សេពគប់ជាមួយនឹងអ្នកដែលកាន់សាសនាមិនពិត ដោយមានប្រសាសន៍ថា៖«ចូរចេញពីចំណោមពួកគេមក ហើយញែកខ្លួនចេញ»។ (កូរិនថូសទី២ ៦:១៤-១៧) បើសាសនាទាំងអស់គឺដូចគ្នា ហើយនាំមនុស្សឲ្យស្គាល់ព្រះ ហេតុអ្វីបានជាព្រះបង្គាប់ឲ្យយើងធ្វើដូច្នេះ?

ប្រភេទទី២: ការគោរពប្រណិប័តន៍ព្រះដ៏ពិតតាមរបៀបដែលលោកមិនពេញចិត្ត

ជួនកាល បណ្ដាជនអ៊ីស្រាអែលគោរពប្រណិប័តន៍ព្រះដោយផ្អែកលើជំនឿនិងការប្រព្រឹត្តដែលគេបានយកពីការគោរពប្រណិប័តន៍ព្រះមិនពិត តែព្រះយេហូវ៉ាមិនទទួលស្គាល់ជំនឿដែលលាយឡំសាសនាពិតជាមួយនឹងសាសនាមិនពិតឡើយ។ (និក្ខមនំ ៣២:៨; ចោទិយកថា ១២:២-៤) លោកយេស៊ូបានផ្ដន្ទាទោសពួកអ្នកដឹកនាំសាសនានៅសម័យលោក ដោយសាររបៀបដែលពួកគេគោរពប្រណិប័តន៍ព្រះ។ ពួកគេគោររពព្រះតែសម្បកក្រៅ ហើយជាមនុស្សមានពុត ពីព្រោះពួកគេ«មិនអើពើចំពោះគោលការណ៍ដែលសំខាន់ជាងក្នុងច្បាប់ គឺយុត្ដិធម៌ សេចក្ដីមេត្ដាករុណា និងសេចក្ដីស្មោះត្រង់»។—ម៉ាថាយ ២៣:២៣

សព្វថ្ងៃនេះក៏ដូចគ្នាដែរ មានតែសាសនាដែលមានមូលដ្ឋានលើសេចក្ដីពិត នាំមនុស្សឲ្យស្គាល់ព្រះ។ យើងអាចរកឃើញសេចក្ដីពិតនេះនៅក្នុងគម្ពីរ។ (យ៉ូហាន ៤:២៤; ១៧:១៧; ធីម៉ូថេទី២ ៣:១៦, ១៧) សាសនាដែលបង្រៀនអ្វីដែលផ្ទុយនឹងគម្ពីរ តាមពិតនាំមនុស្សឲ្យចេញពីព្រះ។ មានសេចក្ដីបង្រៀនជាច្រើនដែលមនុស្សគិតថាជាសេចក្ដីបង្រៀនក្នុងគម្ពីរ។ តែតាមពិតសេចក្ដីបង្រៀនទាំងនោះមកពីពួកអ្នកដែលគោរពប្រណិប័តន៍ព្រះមិនពិតវិញ នោះមានដូចជាសេចក្ដីបង្រៀនដែលថា ព្រះគឺបីអង្គរួមជាព្រះតែមួយ មនុស្សមានព្រលឹងអមតៈ និងមនុស្សអាក្រក់ទទួលទារុណកម្មជារៀងរហូត។ ការគោរពប្រណិប័តន៍ដែលលើកស្ទួយសេចក្ដីបង្រៀនបែបនេះគឺ«ឥតប្រយោជន៍» ពីព្រោះសាសនាបែបនោះមិនអើពើនឹងតម្រូវការរបស់ព្រះទេ ហើយបែរជាយកទំនៀមទម្លាប់សាសនាជាធំវិញ។—ម៉ាកុស ៧:៧, ៨

ព្រះស្អប់ខ្ពើមសាសនាដែលលាក់ពុត។ (ទីតុស ១:១៦) ដើម្បីជួយមនុស្សឲ្យចូលទៅជិតព្រះ សាសនាមួយត្រូវជះឥទ្ធិពលទៅលើជីវិតប្រចាំថ្ងៃរបស់អ្នកកាន់តាម មិនមែនគ្រាន់តែជាពិធីឬទំនៀមទម្លាប់ប៉ុណ្ណោះឡើយ។ ជាឧទាហរណ៍ គម្ពីរចែងថា៖«ប្រសិនបើអ្នកណាចាត់ទុកខ្លួនជាអ្នកគោរពប្រណិប័តន៍តាមរបៀបត្រឹមត្រូវ តែមិនទប់អណ្ដាតខ្លួន ប៉ុន្តែចេះតែបញ្ឆោតចិត្តខ្លួន នោះរបៀបដែលអ្នកនោះគោរពប្រណិប័តន៍គឺគ្មានប្រយោជន៍ទេ។ តាមទស្សនៈរបស់លោកដែលជាព្រះនិងជាបិតារបស់យើង របៀបគោរពប្រណិប័តន៍ដែលស្អាតស្អំនិងឥតសៅហ្មងនោះគឺ៖ ថែរក្សាកូនកំព្រានិងស្ត្រីមេម៉ាយដែលកំពុងរងទុក្ខវេទនា ហើយរក្សាខ្លួនមិនឲ្យប្រឡូកប្រឡាក់នឹងពិភពលោកនេះ»។ (យ៉ាកុប ១:២៦, ២៧) សេចក្ដីបកប្រែឃីងជេម្ស បានប្រើពាក្យ«សាសនាពិត» សម្រាប់ការគោរពប្រណិប័តន៍ដែលស្អាតស្អំនិងឥតសៅហ្មងដូចនេះ។

a ព្រះយេហូវ៉ាគឺជានាមរបស់ព្រះពិតដូចបានកត់ទុកក្នុងគម្ពីរ។