បើខ្ញុំអធិដ្ឋាន តើព្រះនឹងជួយខ្ញុំឬទេ?
ចម្លើយពីគម្ពីរ
មែនហើយ ព្រះជួយអស់អ្នកដែលអធិដ្ឋានសុំដោយចិត្តស្មោះ ហើយសុំអ្វីដែលស្របតាមបំណងប្រាថ្នារបស់លោក។ ទោះជាលោកអ្នកមិនធ្លាប់អធិដ្ឋានក៏ដោយ ក៏គំរូផ្សេងៗក្នុងគម្ពីរអំពីអ្នកដែលបានអធិដ្ឋានថា‹សូមព្រះជួយខ្ញុំ› អាចលើកទឹកចិត្តលោកអ្នកបាន។ ជាឧទាហរណ៍:
«ឱព្រះយេហូវ៉ាជាព្រះនៃទូលបង្គំអើយ សូមជួយទូលបង្គំផង ឱសូមជួយសង្គ្រោះទូលបង្គំ តាមសេចក្ដីសប្បុរសនៃទ្រង់»។—ទំនុកតម្កើង ១០៩:២៦
«ទូលបង្គំ. . .ក្រីក្រ ហើយទុគ៌ត ប៉ុន្តែព្រះអម្ចាស់ទ្រង់នឹកដល់ទូលបង្គំដែរ ទ្រង់ជាជំនួយ» ។—ទំនុកតម្កើង ៤០:១៧
ពិតមែនតែ អ្នកសរសេរពាក្យទាំងនោះ ជាអ្នកដែលមានជំនឿមាំមួនលើព្រះ ប៉ុន្តែព្រះក៏ស្ដាប់មនុស្សទាំងអស់ដែលអធិដ្ឋានទៅលោកដោយមានចិត្តគំនិតត្រឹមត្រូវ ដូចជា អស់អ្នកដែល «មានចិត្តសង្រេង» ឬអារម្មណ៍«ទន់ទាប»ជាដើម។—ទំនុកតម្កើង ៣៤:១៨
លោកអ្នកមិនចាំបាច់ភ័យខ្លាចថា ព្រះយេហូវ៉ានៅឆ្ងាយពីអ្នក ឬមិនចាប់អារម្មណ៍ពីបញ្ហារបស់អ្នកឡើយ។ គម្ពីរចែងថា៖«ព្រះយេហូវ៉ាទ្រង់ខ្ពស់ គង់តែទ្រង់យល់ដល់ពួកអ្នករាបសាដែរ តែឯមនុស្សឆ្មើងឆ្មៃ ទ្រង់ស្គាល់គេពីចំងាយហើយ»។ (ទំនុកតម្កើង ១៣៨:៦) លោកយេស៊ូធ្លាប់មានប្រសាសន៍ទៅអ្នកកាន់តាមរបស់លោកថា៖«សូម្បីតែចំនួនសរសៃសក់នៅលើក្បាលអ្នករាល់គ្នា ក៏លោកជ្រាបដែរ»។ (ម៉ាថាយ ១០:៣០) ព្រះស្គាល់ព័ត៌មានល្អិតល្អន់អំពីលោកអ្នក ដែលលោកអ្នកមិនទាំងស្គាល់ផង។ ចុះទម្រាំតែ អ្នកអធិដ្ឋានទៅលោក នោះលោកប្រាកដជាស្ដាប់អ្នក នឹងជួយអ្នកឲ្យធូរស្រាយពីទុក្ខកង្វល់របស់អ្នកជាមិនខាន!—ពេត្រុសទី១ ៥:៧