Davidi ua Bhânge ni Ngoliia—O Kuila Kiki Kia Bhiti Muene?
Saí athu ene mu dibhuidisa se o musoso ua Davidi ni Ngoliia, musoso ua kidi muene mba ua makutu. O kuila ua kexile ué ni phata kioso ki ua tange o mbandu ia bhiti? Se kiene, dilonge o ibhuidisu itatu íii.
1 | O kuila kuexile muene muthu ua kexile ni kitala kia metulu 2 ni 9?
O Bibidia i zuela kuila Ngoliia, “o kitala kiê kóvado jisamanu ni phalumu imoxi.” (1 Samuuele 17:4) O kóvado bhabha ia mu lombolola kifua 44 a jisentimetru ni 5 ia kulebha; o phalumu ilombolola 22 a jisentimetru ni 2. Se tu kondala tua-nda kala ni metulu 2 ni 9. Saí athu ka xikina kuila Ngoliia ua kexile ni kitala kiokio, maji xinganeka: Mu izuua ietu, saí divulu dia tange kuila, o muthu ua tundu oso mu kitala ua kexile ni metulu 2 ni 7. O kuila kubhonza kuxikina kuila Ngoliia ua mu tundile mu kitala? Muéne ua tokalele ku muiji ua Jilefaíme, o mala a tokalele ku muiji iú a lebhele kiavulu. Saí mukanda ua Ijitu ua muvu ua 13 kia hama A.K.K. uambe kuila kuexile mazonda mu ixi ia Kanana akexile ni metulu 2 ni 4 kia kitala. Mu kiki, sumbala kubhonza kuxikina, maji kidi muene Ngoliia ua kexile ni kitala kia dikota.
2 | O kuila Davidi uexile muthu ua kidi?
M’ukulu muexile athu akexile mu sota ndunge ia kutanga kuila o Sobha Davidi kexile muthu ua kidi, kifua sabhu ngó maji ka tena kulombolola o kidi. O jingijiie akua kukanda o ima k’oxi a mavu a sange isoneku iokulu iambe kiki: “o inzo ia Davidi.” Jezú Kristu ua tumbula ué Davidi kuila muthu ua kidi. (Matesu 12:3; 22:43-45) Jezú muéne o Mexiia. O Bibidia ilondekesa mu veji jiiadi kuila, Jezú ua tundu ku muiji ua Sobha Davidi. (Matesu 1:6-16; Luka 3:23-31) Sé phata, Davidi ua kexile muene ku muenhu.
3 | O kuila o kididi kua bhiti o musoso iú, kia kidi muene?
O Bibidia iamba kuila, o ita ia bhiti bhu honga ia Ela. Maji ilombolola kiambote o kididi. Iamba kuila akuâ Fidíxia a tele o kibângu kiâ ku mulundu mu kaxi ka mbanza jiiadi, o mbanza ia Soko ni mbanza ia Azeka. Akuâ Izalaiele akexile bhu honga, ni mu sambuá dia mulundu mua kexile akuâ Fidíxia. O kuila ididi íii ia kexile-ku muene?
Talesa ia tange o diiala uendele mu ididi íii, muéne uixi: “O muendexi uetu, kexile mukuá ngeleja, ua tuendesa katé bhu honga ia Ela. Tua bokuena mu njila ia tuendesa katé ku thandu’a mulundu. Kioso ki tua kexile mu tala o honga, muéne ua tu bhingi kutanga o divulu dia 1 Samuuele 17:1-3. Mu suluka ua londekesa o honga iu uambe: ‘Kunhá, ku mbandu ienu ia kiasu, mu sanga-ku o ibhéla ia mbanza ia Soko.’ Ua bhiluka iu uambe, ‘O koko, ku mbandu ienu ia kadilu, mu sanga-ku o ibhéla ia mbanza ia Azeka. Akuâ Fidíxia, a tele o kibangu kiâ mu kaxi ka mbanza jiiadi jiji, mu milundu i mua mu tala. Mu kiki, etu tuemana bhua kexile akuâ Izalaiele.’ Bhenhobho nga xinganeka Saulu ni Davidi emana bhu ng’emanene eme. Bhenhobho tua kulumuka etu tua zaúka o ngiji iezalele ni matadi, ki muexile menha avulu. Nga xinganeka Davidi ua mu bhetama phala kubonga matadi a tanu, bhua tundu o ditadi dia jibhile na-diu Ngoliia.” O mujitu iú kála o ajitu a mukuá, a diuanene kiavulu mu kumona kuila ioso i tanga o Bibidia kidi muene.
Sé-ku kima kilondekesa kuila o musoso iú ua makutu. O athu ni ididi iexile muene ia kidi. O kia beta-o-kota, o musoso iú uala mu Mak’â Nzambi, o Nzambi ia kidi, Ió ‘ka tena kutanga makutu.’—Tito 1:2; 2 Timote 3:16.