Kusota o Kidi
Kwijiya o kidi, ku tena kubhulula o mwenyu wetu. Mu kifika, xinganeka kyebhi o mwenyu wetu kya tena ku u funyisa mu itambwijilu ya ibhwidisu ya kayela: Kyebhi kya di mwange o mawuhaxi a sambukila?
Mu mazunda a mivu, se-ku muthu wejidile kutambwijila o kibhwidisu kiki. Mukonda dya kiki, mazunda a athu afu mukonda dya mawuhaxi a sambukila ni lusolo. O jingijiye a dilongo o kidi. Ene a mono kwila, o tubamba mba jibacteria jene ja kexile mu bheka dingi mawuhaxi. Kwijiya o kidi kimoxi kiki, kya kwatekesele o athu kudilanga ni kusaka mawuhaxi avulu. Kya bhangesa we o athu kukala ni sawidi yambote ni mivu yavulu ku mwenyu.
Ihi i twamba ya lungu ni ibhwidisu yéngi ya beta kota? Kusanga o kidi kya lungu ni itambwijilu ya ibhwidisu ya kayela, ku tena ku kukwatekesa kyebhi?
-
Nzambi nanyi?
-
Jezú Kidistu nanyi?
-
O Utuminu wa Nzambi ihi?
-
Ihi ya-nda bhita ku hádya?
Mazunda a athu ene mu sanga o itambwijilu ya ibhwidisu yiyi, ene mu kolesa dingi o kixikanu kyâ. Eye we u tena kukatula mbote mu itambwijilu yiyi.
O KWILA U TENA KUSANGA O KIDI?
Eye u tena ku dibhwidisa: ‘O kwila tu tena kusanga o kidi kya lungu ni kima?’ Kusanga o kidi kya lungu ni ima yavulu nange kubhonza lwavulu. Mukonda dyahi?
Athu avulu ka dyelela ku a tangela o kidi ku jinguvulu, akwa kusumbisa, mba mu mitelembe ni mu internete. Kubhonza phala o athu kwijiya se a mu a tangela o kidi mba makutu, se a mu a tangela o maka oso mba kana, mba-phe o muthu wa zwelé ngó o kixinganeku kyê. Kuma o athu ka dyelela dingi akwá, ni kwila kwene jinjimbu javulu ja makutu, o athu ka xikina dingi mu ima ya kidi, né mwene se ihi ilombolola phala ene o kidi kiki.
Sumbala ni ibhidi yoso yiyi, tu tena kusanga o itambwijilu ya kidi ya ibhwidisu ya beta kota ku mwenyu. Kyebhi ki tu tena ku i sanga? Mu kubhanga i wene mu bhanga kyá mu kizuwa ni kizuwa, phala kusanga o itambwijilu ya ibhwidisu ki yala ni valolo yavulu ku mwenyu.
EYE U TENA KUSANGA O KIDI
Nange wene mu sota kyá o kidi mu kizuwa ni kizuwa. Tala o musoso wa Jessica. Mwene wambe: “Monami wala ni uhaxi wa ku dyaza; se udya jinguba né mwene twofele, u tena kufwa.” Jessica wa bhingi kwijiya se o kudya kwa-nda sumba phala mon’ê, kwa tokala mba kana. “O kima kya dyanga ki ngi bhanga, o kutanga kyambote o ijimbwete phala kumona o ima ya te mu kudya. Mu kusuluka ngi tokwesa anga ngi zwela ni akwa ditenda mba kididi mwa bhange o kudya phala kwijiya se ka te-mu kima kyoso-kyoso kya lungu ni jinguba. Ngi tokwesa we ididi yengi phala kwijiya se ngi tena kudyelela mu ukexilu wâ wa kubhanga o kudya.”
O itambwijilu ya ibhwidisu i wa mu sota nange ki i bhonzo kyavulu kala kya bhiti ni Jessica. Maji u tena kukayela o jindunge ja kayela phala kusanga o itambwijilu ya ibhwidisu i wala na-yu.
-
Ijiya o kidi kyoso.
-
Tokwesa dingi.
-
Sota kwijiya se wa mu tokwesa mu ididi ya tokala.
O jindunge jiji ji tena ku kukwatekesa kusanga o itambwijilu ya kidi ya ibhwidisu ya beta kota ku mwenyu. Kyebhi ki u tena kubhanga kiki?
DIVULU DIMOXI DI TANGA O KIDI
Kyoso Jessica kya soto o kidi kya Bibidya, mwene wa kayela o jindunge ja te kyoso kya sota o kudya phala mon’ê wala ni uhaxi wa kudyaza. Mwene wambe: “Kutanga kyambote ni kubhanga nguzu phala kutokwesa, kwa ngi kwatekesa kusanga o kidi kya Bibidya.” Kala Jessica, mazunda a athu ene mu dilonga i zwela o Bibidya ya lungu ni ibhwidisu ya kayela:
-
Mukonda dyahi twala ku mwenyu?
-
Ihi i bhita kyoso muthu kya fwa?
-
Mukonda dyahi twene mu tala hadi?
-
Ihi ya mu bhanga Nzambi phala kuzubha o hadi yoso?
-
Kyebhi ki tu tena kuzediwa ku mwiji?
Eye u tena kusanga o itambwijilu ya kidi ya ibhwidisu yiyi ni ya mukwa, mu kutanga o Bibidya ni kutokwesa dingi mu sayite www.ps8318.com.