Ihi ia Banzele Jezú ia Lungu ni Jinguvulu?

O ASONEKI, Matesu, Marku, Luka ni Nzuá a soneka izulukutu iavulu ia lungu ni ukunji ua Jezú, kia dibhana ni maka a jinguvulu. Kioso kia zubha o ku mu batizala, mu 30 a mivu, Diabhu ua mu bhana o ujitu ua ku kala nguvulu ia ku tumina o mundu. Mu ku bhita kithangana, o athu a mesenene kuma muéne u kala sobha iâ. A mesene kuila muéne u zuela bhu kididi kiá mu di ta mu maka a jinguvulu. Ihi ia bhange Jezú? Tu di longe o maka enhá.

Nguvulu ia mundu. O Bibidia izuela kuila Diabhu uidikisa kua Jezú o “maungana moso mu ngongo.” Ua xinganeka kiá o mbote ioso ieji bhanga Jezú, phala ku zubha o hadi ia kexile mu tala o athu, se ua xikinine ku kala nguvulu ia mundu! Nanhi o muthu ueji dituna o ujitu iú ua dikota ua ku tumina o mundu? Maji Jezú ua ditunu o ku u tambula.—Matesu 4:8-11.

Sobha. Athu mu izuua ia Jezú a bhindamene kiavulu unguvulu ueji tena ku zubha o maka oso akexile mu bhita. Mu ku mona o mauhete a Jezú, athu a mesenene kuila Jezú u kala nguvulu phala ku a kuatekesa. Ihi ia bhange Jezú? Nzuá ua soneka: “Jezú kia mono kuma andala kuiza ku mu ambata mu nguzu ni ku mu bhanga sobha, u tunda-bhu, anga uia ku mulundu k’ubheka uê.” (Nzuá 6:10-15) Maji, Jezú ua ditunu ku di ta mu maka a jinguvulu.

Disoladi mba muzokedi ua jinguvulu. Xinganeka ngó ihi ia bhiti ande dia ku jibha Jezú. O maxibulu a Jifalizeu, akexile mu kuatekesa o utuminu ua Loma, a di bhongolola ni akaiedi a Helode, akexile mu kuatekesa nguvulu ia Loma a zukamene kua Jezú. Ene a mesenene ku jijidika Jezú ku kuatekesa ué mu maka a jinguvulu. Ene a mu ibhula se mu kidi o Jijudé a tokalele ku futa lubhaku ku unguvulu ua Loma.

Marku ua zuela kiebhi Jezú kia tambuijila: “‘Mu ngi bhombela-hi, phala ku ngi kuata mu kizuelu kiami eme-muene?’ Ngi tambuisienu kitadi, ngi ki mone. Anga a mu tambuisa-kiu. Ua ambela, uixi: O kídifua kiki, ni kidimbu kiê, kia nanhi? Exi: Kia ‘Sézalu.’ Bhenhobho Jezú ua ambela: ‘Bhanenu-phe Sézalu, kia tokala kua Sézalu; bhanenu kua Nzambi, kia tokala kua Nzambi.’” (Marku 12:13-17) Mu kuzuela ia lungu ni kitambuijilu kia Jezú, o divulu, Igreja e o Estado —The Story of Two Kingdoms, dizuela: “Jezú ka mesenene ku kala nguvulu ia mundu iú, muéne ua londekesa kuila, saí itumu ia jinguvulu ki i difu ni itumu ia Nzambi, tua tokala ku i belesela ni itumu ia Nzambi i tua tokala o ku i belesela.”

O ku dituna Jezú, ku di ta mu maka a jinguvulu, ki kilombolola kuila muéne ka kexile mu mona o hadi ia kexile mu tala o athu kála o uadiama, o ku kamba kufundisa, ni kathombo. Mu kidi, o Bibidia izuela kuila muéne ua kexile ni henda ia athu a mu kondolokele. (Marku 6:33, 34) Né kiki, Jezú ka di tele ku pholo mu kikalakalu kia ku zubha o hadi ia mundu, sumbala saí athu akexile ku mu jijidika ku di ta mu maka a jinguvulu.

Kala ki tua mono kiá, Jezú ua ditunu ku di ta mu maka a jinguvulu. Ihi i tuamba ia lungu ni Jikidistá lelu? Ihi ia tokala o ku bhanga?