Nga ku dila mu sanzala iofele, mu mbanza ia portuária, ku Turku. Tat’etu ua kexile ni ufunu ua ku bhânga, o phange iami n’eme tua kaiela ué o ufunu iú ua ku bhânga. Mivu joso i nga kexile mu xikola, nga kexile mu bhânga ni jikoleka jami; mu unzangala uami, nga bhange ukamba ni kibuka kia jibandi, ia ngi bhangesa dingi ku di ta mu jimvunda javulu. Eme ué nga mateka o kuívua o muimbu ua iibha, heavy-metal, eme nga mesenene kiavulu ku kala ngimbidi ia fuma ia rock.

Nga sumbu ji batuke, eme nga bhange kibuka kiami kia kuimba. Eme nga kexile ku pholo dia kibuka mu kuimba. Nga uabhele kiavulu ku banda ku ditala kala ngi dilaji. Mukonda o kibuka kietu, kiexile kibuka kia iibha, kala tu malaji, tua kexile mu tambula fuma iavulu. Tua kexile mu xika bhu pholo ia mundu uavulu. Tua ngalavala dilonga dia muimbu, o mimbu ia sukina a i ximana kiavulu ku athu. Ku disukilu dia muvu ua 1980, tuai ku ixi ia Estados Unidos phala ku ijidisa o kibuka kietu. Tuembi ku mbanza ia Nova York ni ku mbanza ia Los Angeles, etu tua xisa o ijimbuete ietu ku matenda a mimbu ia katunda ande dia ku vutuka ku ixi ietu, ku Finlândia.

Sumbala nga sangulukile mu ku kala mu kibuka, maji ki ngi zediuile ku muenhu. Nga luualele kiavulu mu ku mona o ukexilu ua iibha ua matenda a mimbu. Nga zembele ué o ukexilu uami ua muenhu. Nga kexile mu di mona kala ngi muthu ua iibha, eme nga kexile ué ni uôma ua ku jokota mu túbhia tua ifernu. Eme nga kexile mu sota itambuijila mu madivulu oso-oso a jingeleja. Nga kexile ué mu samba kiavulu, mu ku bhinga o kikuatekesu kia Nzambi, sumbala nga kexile mu divua kuila, ki ngeji tena ku bhanga ima iambote bhu pholo iê.

Phala ku dikila o ibhindamu iami, nga kexile mu kalakala bhu kididi kia ku tambula mikanda, ni ku i tumikisa. Saí kizuua, nga mono kuila o koleka iami uexile Mbangi  ia Jihova. Nga mu bhange ibhuidisu iavulu. O itambuijilu iê iambote ia Bibidia ia ngi tula ku muxima, eme nga mateka ku di longa o Bibidia ni muéne. Mu ku di longa kiá semana javulu, o kibuka kiami a ki xana phala kuia mu ngalavala dilonga dimoxi dia muimbu ni ku i sumbisa ku ixi ia Estados Unidos. Nga mono kuila kiexile o kithangana kia ku kala mvuama.

Nga zuela ku Mbangi ia Jihova ua kexile mu ngi longa o Bibidia, kuila nga mesenene kiavulu ku ngalavala kiá ngó dilonga dimoxi dia muimbu, anga mu ku vutuka, nga-nda kumbidila o itumu ia Bibidia ku muenhu uami. Muéne ka ngi tangela kima; muéne ua ngi bhingi ngó phala ku tanga o izuelu ia Jezú mu divulu dia Matesu 6:24, diambe: ‘Kana muthu u tena ku bhikila ngana jiiadi.’ Nga diuanene kiavulu kioso ki nga mono o izuelu ia Jezú. Maji mu ku bhita izuua, o mesene iami ia Bibidia muéne ua diuana! Nga mu tangela kuila, kuma nga mesenene ku kaiela Jezú, nga xisa o kibuka!

O Bibidia iexile kala lumuenu phala eme, lua ngi londekesa o ifua iami ia bolo. (Tiiaku 1:22-25) Nga mono kuila ki ngi kexile ni ukexilu uambote: Nge xile ngi muthu ua iibha, nga kexile ni luímbi ku muxima. Nga kexile mu xinga, ku bhânga, ni kúnua kiavulu. Kioso ki nga mono kuila o ifua iami ki i lungile ni itumu ia Bibidia, njinda ia ngi kuata kiavulu. Sumbala kia ngi bhonzele kiavulu, nga mesenene ku lungulula o ukexilu ua muenhu uami.—Efezo 4:22-24.

Ku dimatekenu, nga kexile mu luuala kiavulu mukonda dia iluezu iami iokulu. Maji o Mbangi ia Jihova ia kexile mu ngi longa o Bibidia, ua ngi kuatekesa kiavulu. Muéne ua ngi longo ihi i longa o Bibidia mu divulu dia Izaia 1:18, diambe: ‘Né mbe ituxi ienu ia ku suka kala husu, ia-nda zela kala neve.’ O velusu íii ni jivelusu ja mukuá ja Bibidia ja ngi bhangesa o ku xikina kuila o Tata ietu ia diulu, muthu ua henda, iu ua mesena ku saka o jifidila ja ió a diela o ituxi iâ.

Kioso ki nga mateka kuijiia Jihova ni ku mu zola, nga mesenene ku bhakula o muenhu uami kua muéne. (Jisálamu 40:8) A ngi batizala ku muvu ua 1992 mu kiônge kia dikota kia mundu uoso kia Jimbangi ja Jihova ku mbanza ia St. Petersburg, ku ixi ia Rússia.

Nga bhange makamba avulu ni abhezi a Jihova. Lelu tuene mu xika kumoxi mimbu iambote, ujitu ua tu bhana Nzambi. (Tiiaku 1:17) Maji o dibesá dia dikota dia ngi bhana Nzambi, o ku kazala ni muhatu uami, Kristina. Ni muhatu uami, tuene mu bhanga ima iavulu—ku di kunda mahezu, ku sanguluka, ni ku di zola kiavulu.

Se ki ngi kexile ngi Mbangi ia Jihova, ki ngeji kala dingi ku muenhu lelu. M’ukulu nga kexile ni maka avulu. Maji lelu ngala ni ku zediua kua kidi.