Se u tata ua mu sasa munzagala, o kibhidi kiê kia dikota o ku zoka ni mon’ê—ku bhinga ku kala ni muanhu uavulu. Madiia mama ua mu sasa mona ua muhatu uala mu kitala 14 dia mivu ku ixi ia Brasil, uambe: “Kioso mon’ami ua muhatu kia kamba o ku ngi belesela, ngi kala ni njinda iavulu. Tu kala ni njinda iavulu anga tu kuata o ku zoka.” Carmela, mu ixi ia Italia ua mu dibhana ué ni maka enhá. Muéne u zuela: “O ku zoka ni mon’ami ua diiala kuene mu bheka mvunda iavulu, maji o maka a bhua ngó kioso muéne kia di jikila ku dixilu diê.”

Mukonda diahi saí minzangala a uabhela o ku zoka? O kuila tu tatela o makamba mâ? Nange kiene. O Bibidia i zuela kuila o makamba a muthu a tena ku lungulula o ukexilu ua muthu, mu ukexilu uambote mba ua iibha. (Jisabhu 13:20; 1 Kolindo 15:33) Itonokenu iavulu ia uabhela kiavulu o minzangala lelu, ilondekesa kuila ki kima kia iibha o minzangala ku xibhaka ni ku kamba ku xila o adiakimi.

Maji saí dingi ima ia mukuá i tua tokala o kuijiia—ima ki i bhonzo o ku dibhana na-iu, se u tendela ihi i bhanga o ima íii ku mon’ê ua munzangala. Tu mone.

O poxolo Phaulu ua soneka: “Ki nga kexile ngi mon’a ndenge, ngi zuela kia undenge, ngi  xinganeka kia undenge, ngi fika kia undenge. Kiki-phe ki ngeza ku uadiakime, imbamba ia undenge nga i eha.” (1 Kolindo 13:11) Kala kilondekesa o izuelu ia Phaulu, o adiakimi ni ana-ndenge kala ni kibanzelu kimoxi. Mu ukexilu uebhi?

O tuana ala ni ukexilu ua ku banza kuila ima ioso ia kidi mba ia makutu. Maji ki kiene ki banza o adiakimi, ene a xinganeka mu ima ia mesena o ku bhanga, ni ku xinganeka hanji ande dia ku batula maka mba ku sola kima. Mu kifika, o adiakimi ande dia ku bhanga kima, a xinganeka hanji kiebhi o athu kia-nda divua mu ima ia mu banza o ku bhanga. Kiene kia bhanga jinga ande dia ku bhanga kima. O minzangala, ka tena ku bhanga kala ki bhanga o adiakimi.

O Bibidia i suínisa o minzangala ku kala ni “kilunji.” (Jisabhu 1:4) O Bibidia i suínisa o Jikidistá ku kala ni ‘kilunji kia fuama.’ (Loma 12:1, 2; Jihebeleu 5:14) Maji saí ithangana, o ukexilu ua ku banza ua mon’ê u mu bhangesa ku zoka n’eie, katé muene mu ima iofele. * Mba u zuela kima ki kia tokala. (Jisabhu 14:12) Kiebhi ki u tena kuzuela nê sé ku zoka?

Maji aluka: Kioso ki u zuela ni mon’ê, kana ku banza kuila eie ua lungu mu ima i ua mu zuela. Né muene se muéne ka xikina mu ima i ua mu zuela, muéne ua-nda zoka n’eie. Kana ku diuana se mu ku bhita izuua, o mon’ê u xikina o kima ki ua zuela—nange ni kuzuela kuila o kibanzelu kia muene.

Kenji, mukua Japão uambe: “Eme ni mon’ami ua diiala, tua kexile mu zoka mu ima iofele—kala, mu maka alungu ni ku ngastala kitadi kiavulu, mba ia lungu ni ku beta phang’ê ia muhatu. Maji mu ithangana ia mukuá, nga mono kuila ua mesenene kuila ngi mu ibhula ihi ia kexile mu banza ni ku mu londekesa kuila nga mu tendela mu kuzuela: ‘Manhi kienhiki’ mba ‘kiki kiene ki ua mu banza.’ Mu ku xinganeka ia bhiti ku dima, ngi mona kuila se nga zuelele kiki, nange ki tueji zoka ithangana ioso.”

O jitata a sasa o ana phala ku a pelepalala ni kuila kia-nda kula, a kala adiakimi a kilunji a tena ku batula kiambote maka a moneka ku muenhu. (Dimatekenu 2:24) O ulongelu iú u kuatekesa o minzangala ku dijiia kiambote—o ifua, o ima ia tokala ku xikina, ni ima i mu kuatekesa kuijiia se muéne nanhi. Kioso kia dibhana ni kijijidiku kia ku bhanga o kima kia iibha, o munzangala uejiia se muéne muthu ua kidifua kiahi, ka-nda xinganeka ngó mu ibhidi ijila mu ku bhanga o kima kia iibha. Ua-nda dibhuidisa uê: ‘Ngi muthu ua kidifua kiahi? Ídifua iebhi i nga beta o ku zola? Ihi ieji bhanga o muthu uala ni ídifua íii mu kithangana kiki?’—2 Phetele 3:11.

O Bibidia i zuela ia lungu ni Zuzé, munzangala uejidile kiambote o ídifua iê. Mu kifika, kioso o muhatu ua ngana iê Potifale ua jijidika ku zeka n’ê, Zuzé uambe: “Ngi tena kiebhi ku bhanga kuiibha kuos’uku ni ku ta kituxi kua Nzambi?” (Dimatekenu 39:9) Sumbala akua Izalaiele ka tambuile luua o kitumu kia fidisile o ku ta phánda, Zuzé uejidile o kitumu kia Nzambi kia lungu ni Maka enhá. Maji o izuelu, “Ngi tena kiebhi” ilondekesa kuila muéne ua kexile ni ibanzelu ia Nzambi—kiki kiexile o kídifua kiê.—Efezo 5:1.

O mon’ê ua mu sota ué ku kala ni kídifua kiê. Kiki kima kiambote, kia-nda mu kuatekesa ku dibhana ni kijijidiku kia athu ala mu kitala kiê. (Jisabhu 1:10-15) Maji o kídifua kiki kia-nda mu bhangesa ué ku zoka n’eie. Se kiki ki bhita n’eie, ihi i ua tokala o ku bhanga?

O ku kala ni kídifua—ni ifua ia mukuá—kima kia valolo phala o muthu. Mukonda o Bibidia i zuela kuila o Jikidistá ka tokala ku kala kala ana-ndenge a tu “takujula ku mabhuku, ni ku tu xinjijika kuala o kitembu kia ulongelu uengi.” (Efezo 4:14) Suínisa mon’ê kulondekesa o ídifua iê ni ifua ia mukuá.

“Kioso ki ngi londekesa ku an’ami a ahatu, kuila ngala polondo phala kuívua ioso ia mesena o kuzuela, ene a xikina o kibanzelu kiami, né muene se ki kiene kia mu banza ene. Ngi aluka phala ki ngi a jijidike ku xikina o ibanzelu iami, maji ng’ehela ene ku sola o kima kia tokala o ku xikina.”—Ivana, mukua República Tcheca.

Kala o ana-ndenge, saí minzangala a mona kuila o ku jijila mu ku bhinga ia mesena, ku bhangesa o jitata ku zoza mu izuelu iâ. Se kiki kiene mu bhita izuua ioso kubhata diê, di lange. Sumbala mu dimatekenu u mona kuila o ku xikina o ibanzelu ia mon’ê, ku ku tululukisa, maji ijiia-kiu kuma, kiki kia-nda mu longesa kuila phala o jitata ku bhana o ima ia mesena, muéne ua tokala ku jijila. Ihi i ua tokala o ku bhanga? Kaiela o ndunge ia bhana Jezú: ‘O kizuelu kiê kia tokala ki kala kia kidi kala, Kiene, Kiene; Kana; Kana.’ (Matesu 5:37) O minzangala ka zoka kiavulu ni jitata jâ se a mona kuila, o jitata a bhanga kala kia zuela

Kala u muthu ua lenduka. Eha mon’ê ku jimbulula, se mukonda diahi ua mesena kuila eie u lungulula o ola ia muéne ku bhixila kubhata. Kiki ki kilondekesa kuila eie u mu bhanga kiki mukonda a mu ku jijidika, maji ua mu kaiela ngó o milongi ia Bibidia, iambe: “Kalenu mu athu mua tetuluka, athu oso a m’ijiie na-kiu.”—Filipe 4:5.

Se-ku tata u kamba kuta kituxi. O Bibidia i zuela: ‘Etu oso tuene mu lueza veji javulu.’ (Tiiaku 3:2) Se u mona kuila eie uala ni kikuma mu ku zoka, bhinga muloloki ku mon’ê. O ku xikina o ikuma iê, kilondekesa kuila u muthu ua lenduka, ni ku bhangesa mon’ê ku kaiela o phangu iê.

“Kioso ki zubha o ku zoka, kioso ki ngi tululuka, nga kexile mu bhinga muloloki ku mon’ami mu kiluezu kiami. Kiki kia mu kuatekesele ué o ku tululuka, ni ku ngivua kiambote ioso i nga kexile mu zuela.”—Kenji, mukua Japão.