Jimidi ni jimidi ja athu ku mundu uoso, a dielela ku Utuminu ua Nzambi. Ene a kaiela Jezú, ua longo o akaiedi’ê ku samba: “Utuminu ué uize. Vondadi ié a i bhange bhoxi.”—Matesu 6:10.

Sumbala athu avulu ku mundu a uabhela kiavulu o Utuminu ua Nzambi, maji jingeleja javulu ka u bhana valolo. Ia lungu ni maka enhá, o mukua musoso H. G. Wells ua londekesa kuila, Jezú ua “bhana valolo ia dikota . . . ku ulongelu ua Utuminu ua diulu,” maji o ulongelu iú “ki uene ni valolo ia dikota . . . ku ilongesu ia jingeleja javulu.”

Maji o Jimbangi ja Jihova, a bhana valolo ia dikota ku Utuminu ua Nzambi. Mu kifika: O kadivulu ku ua mu tanga kindala, a ka lungulula mu 220 a madimi. Kala kadivulu a ka katula 46 a jimidi ja ji kopia; kaka o kadivulu a beta ku ka bhana ku athu ku mundu uoso. Iebhi o njimbu ia kadivulu kaka? Tala o diambu diê: O Mulangidi U Bhana Ngolokela Ia Utuminu Ua Jihova.  *

Mukonda diahi o Jimbangi ja Jihova a bhanga nguzu iavulu phala ku boka mba kuijidisa o Utuminu ua Nzambi? Mukonda etu tu xikina kuila, o Utuminu ua Nzambi, o diambu dia beta-o-kota dia divulu dia beta o kota ku mundu uoso—o Bibidia. Tu xikina ué kuila o Utuminu ua Nzambi, uene ngó ua-nda tena ku batula o maka oso u tua mu dibhana nau lelu.

Ia lungu ni Utuminu ua Nzambi, o Jimbangi ja Jihova ene mu bhanga ioso phala ku kaiela o phangu ia Jezú. Kioso kia kexile mu ixi, muéne ua beta ku bhana valolo ku Utuminu ua Nzambi. (Luka 4:43) Mukonda diahi o Utuminu ua Nzambi ua kexile ni valolo ia dikota phala Jezú? O Utuminu iú ulombolola ihi phala eie? Ijiia o itambuijilu ia Bibidia mu ku tanga o milongi ia kaiela.