DIAMBU DIA KAPA
Mukonda Diahi ua Tokala Kuijiia Kiambote o Bibidia?
“O Bibidia divulu diene mu tanga o athu mu jingeleja. Maji o athu ku ixi ia China ka dijiia, kene mu di bhana ué valolo.”—LIN, CHINA.
“O madivulu a ngeleja iami ia Hindu, a bhonzo kiavulu. O kuila o Bibidia ki i bhonzo ué?”—AMIT, INDIA.
“Ngi xila o Bibidia mukonda divulu diokulu, ngene mu kuivua ué kuila, diene o divulu dia beta ku di sumbisa ku mundu uoso. Maji nuka nga muene o Bibidia.” —YUMIKO, JAPÃO.
Athu avulu ku mundu uoso ene mu bhana valolo ia dikota ku Bibidia. Maji kejiia kiambote o milongi iala mu Bibidia. Kiki ki kia mu bhita ngó mu ixi ia Ásia, maji kia mu bhita ué ni athu a tungu mu jixi mu tu sanga ji Bibidia javulu.
Maji nange u dibhuidisa, ‘mukonda diahi nga tokala kuijiia o Bibidia?’ Se uijiia kiambote o Bibidia ua-nda tena:
-
Kuzediua ku muenhu
-
Ku batula kiambote o maka ku muiji
-
Ku di bhana ni maka
-
Ku di bhana kiambote ni akuenu
-
Ku langa kiambote o kitadi
Xinganeka Yoshiko, muhatu ku ixi ia Japão. Muéne ua kexile mu dibhuidisa ihi i longa o Bibidia, mukonda dia kiki, muéne ua mateka ku i tanga. Mbote iahi ia katula? Muéne uambe: “O Bibidia ia ngi kuatekesa kusanguluka ni kudielela ima iambote ku hádia. Lelu eme nga sanguluka kiavulu.” Amit, tua mu tange kiá ua mateka ué ku di longa o Bibidia ubheka ué. Muéne uambe: “Nga diuana. Mbé o Bibidia iala ni milongi iambote phala o athu oso.”
O Bibidia iene mu lungulula o muenhu ua athu avulu. Mukonda diahi ku di longe o Bibidia ni u mone o mbote i u tena kukatula?
