Xe i tena. Ilongesu i uana ia Bibidia i tena ku ku kuatekesa ku di bhana ni maka alungu ni kitadi ni makongo:

1.   Kiebhi ki ua-nda ngastala o kitadi. O Bibidia i zuela: ‘Mukua muanu, o ixinganeku iê i bhangela ku vudisa nzungule ia jimbote; maji o ixinganeku ia mukua dimuámua ni lusolo-lusolo, i mu xila ngó uadiama.’ (Jisabhu 21:5) Kana ku sumba ima ioso i u mona mu kitanda. Xinganeka kiambote se ihi i ua bhindamena ni ki kuxi ki ua tokala o ku ngastala mu ima íii.

2.   Kana ku di ta mu makongo. “Mukua ku sobha muene selevende ia ió mukua kusobhesa.” (Jisabhu 22:7) Eie se ua te dikongo ni kuila ku tena ku di futa, sota ku di kunda ni ió ua ku sobhesa o kitadi, kiebhi ki ua mu banza ku futa o dikongo. Kana ku bhuila. Londekesa o ukexilu ua muthu a mu tange mu divulu dia Jisabhu 6:1-5, diambe: “Mukonda eie ua di bhale kiá bhu lukuaku lua mukuenu muenhó, mesu’é kua ehele kuia ku kilu, o ibhebhetelu ié ku i ehele kunhoha.” Nê muene se mu dimatekenu muéne ka ku xikina, kolokota mu ku mu tangela kuila ua-nda bhanga ioso phala ku mu futa o kitadi kiê-muene.

3.   Kala ni ibanzelu iambote ia lungu ni kitadi. “Muthu kia kala ni diesu dia iibha, dia luímbi, u di ta mazulu mu kuata jimbongo; ka k’ijiia-phe kuila uadiama ua mu kinga ku pholo ku aia.” (Jisabhu 28:22) O luímbi ki lu bhekesa ngó uadiama maji lu bhekesa ué maka mu nzumbi.

4.   Sanguluka ni ima i uala na-iu. “Kala kiki, se tua mono-phe kia kudia ni kia kudivunga, ima ienhi’ii i tu soke.” (1 Timote 6:8) O kitadi ki ki tena ku bheka ku sanguluka. O athu a beta ku sanguluka ku mundu, ki jimvuama kana. Maji o ima iene mua sangulukisa, o ku a zola kuala o muiji uâ, makamba ni ku kala ni ukamba uambote ni Nzambi.—Jisabhu 15:17; 1 Phetele 5:6, 7.