ԜӘʹДЕ Шәрʹе Һʹәмдьнйайе йа Дӧда, офисерәки Натсиста, кʹомәкә Шәʹдед Йаһоԝарʹа ӧса гот: «Һәрге һун ԛәбул нәкьн кӧ мьԛабьли Франса йан Инглистане шәрʹ бькьн, әме ԝә гьшка бькӧжьн»! Незики ԝан, әскәред Натсиста бь чʹәкед хԝә һивийе сәкьни бун, ле диса жи бьред мә сьст нәбун. Ԝана мерхасикә чьԛас мәзьн да кʹьфше! Мәсәла ԝан ньһерʹандьна Шәʹдед Йаһоԝа рʹьнд нишан дькә: Әм шәрʹ накьн. Һәрге мәрьв мә бькӧжьн жи, йәкә әме тʹәв шәрʹед ве дьнйайе нәбьн.

1. ЩЬМӘʹТА ХԜӘДЕ ГЬШК МЬЛӘТӘК БУН

Ԝәʹде бәре, Йаһоԝа жь мьләтәки хԝәрʹа щьмәʹт тʹоп кьрьбу. Ләма жи, Әԝи ԝана ча мьлкʹе хԝәйи мәхсус һʹәсаб дькьр (Дәркʹәтьн 19:5). Ӧса жи Хԝәде әʹрдәки мәхсус дабу ԝан. Ләма жи гава Хԝәде Исраелийарʹа гот, кӧ әԝана тʹәви мьләтед дьн шәрʹ бькьн, нав дьжмьнед ԝанда хьзмәткʹаред Йаһоԝа тʹӧнә бун. *

Иро, хьзмәткʹаред Хԝәде «жь һәр мьләти, жь һәр бәрәке, жь һәр щьмәʹте у жь һәр зьмани» тен (Әʹйанти 7:9). Һәрге хьзмәткʹаред Хԝәде бьчуна шерʹ, ԝана ԝе тʹәви баԝәрмәндед хԝә жи шәрʹ бькьра у һәла һе ԝана бькӧштана жи.

 2. ЙАҺОԜА ФӘРМАН ДАБУ ИСРАЕЛИЙА КӦ ӘԜАНА ШӘРʹ БЬКЬН

Ԝәʹде бәре, Йаһоԝа сафи дькьр, кӧ гәрәке Исраели кʹәнге у чьма шәрʹ бькьн. Мәсәлә, Хԝәде жь ԝан хԝәст ԝәки әԝана тʹәви Кәнанийа шәрʹ кьн, чьмки ԝана щьнарʹа хьзмәт дькьр, бенамусийа гьран дькьрьн у зарʹ ԛӧрбан дькьрьн. Йаһоԝа жь Исраелийа хԝәст, ԝәки әԝана ве хьрабийе жь Әʹрде Создайи кʹӧта кьн (Ԛануна Кʹаһинтийе 18:24, 25). Чахе Исраели ԝедәре щиԝар бун, Хԝәде щарна изьн дьда ԝан, ԝәки әԝана һьмбәри дьжмьнед берʹәʹм шәрʹ бькьн (2 Самуйел 5:17-25). Ле Йаһоԝа тʹӧ щар изьн нәдьда Исраелийа ԝәки әԝана хԝәха сафи кьн кӧ һәрʹьнә шәрʹ. Чахе ԝана хԝәха сафи дькьр кӧ һәрʹьнә шерʹ, ахьрийа ве йәке гәләк щар пʹьр хьраб бу (Жьмар 14:41-45; 2 Дирок 35:20-24).

Иро, Йаһоԝа изьне надә мәрьва кӧ шәрʹ бькьн. Мьләтед дьнйайе бона кʹара хԝә шәрʹ дькьн у ньһерʹандьна Хԝәде һьлнадьн һʹәсаб. Әԝана щарна жь бо әʹрд, пʹәра, йан жи жь бо политикайе шәрʹ дькьн. Иро һьнә кәс дьфькьрьн, кӧ әԝана бь наве Хԝәде шәрʹ дькьн, ԝәки религийа хԝә бьпарезьн, йан жи дьжмьнед Хԝәде бькӧжьн. Гәло шәрʹед ӧса щайиз ьн? На. Йаһоԝа ԝе хьзмәткʹаред хԝәйә рʹаст ахьрийеда, демәк шәрʹе Һармәгәдонеда бьпарезә у дьжмьнед хԝә ԛьрʹ кә (Әʹйанти 16:14, 16). Һьнге, ордийа Хԝәде ԝе тʹәне жь әскәред рʹӧһʹани бә, нә кӧ жь хьзмәткʹаред ԝийә сәр әʹрде (Әʹйанти 19:11-15).

3. ИСРАЕЛИЙА КӘСЕД КӦ БАԜӘРИЙА ХԜӘ ХԜӘДЕ ДЬАНИН, САХ ДЬҺЬШТЬН

Ԝәʹде бәре, ордийа Исраели гәләк щар рʹәʹма хԝә дьданә кʹьфше һьндава ԝан мәрьва, йед кӧ баԝәрийа хԝә Хԝәде дьанин, у тʹәне ԝан мәрьва дькӧштьн, кʹижана кӧ Йаһоԝа сафи кьрьбу бькӧжә. Ԝәрә дина хԝә бьдьн ван дӧ мәсәла: Рʹаст ә Йаһоԝа сафи кьрьбу ԝәки бажаре Әриһайе бьһата ԝеранкьрьне, ле Исраелийа  Рʹәхаб у малбәта ԝе сах һьштьн, чьмки әԝе баԝәрийа хԝә Йаһоԝа ани (Йешу 2:9-16; 6:16, 17). Ԝәхт шунда бажаре Гибәоне жи нәһатә ԝеранкьрьне, чьмки Гибонийа тьрса бәр Хԝәде дьданә кʹьфше (Йешу 9:3-9, 17-19).

Иро, мьләтед кӧ шәрʹ дькьн, рʹәʹма хԝә һьндава мәрьвед баԝәрмәнд надьнә кʹьфше. У щарна, гәләк бьнәли жи кӧ нәһәԛ ниньн, тенә кӧштьне.

4. ИСРАЕЛИЙА ЛЬ ГОРА РʹЕБӘРИЙА ХԜӘДЕ ШӘРʹ ДЬКЬРЬН

Ԝәʹде бәре, Йаһоԝа дьхԝәст кӧ әскәред Исраели ль гора рʹебәрийа ԝи шәрʹ бькьн. Мәсәлә, Хԝәде щарна дьхԝәст, ԝәки әԝана тʹәви бажарәки дьжмьна, пәймана «әʹдьлайе» гьредьн (Ԛануна Дӧщари 20:10). Ӧса жи Йаһоԝа дьхԝәст кӧ әскәред Исраели хԝә у зома хԝә һьм физикида һьм жи рʹӧһʹанида тʹәмьз хԝәй кьн. (Ԛануна Дӧщари 23:9-14). Ордийед мьләтед дьн гәләк щар жьнед дьжмьна хьраб дькьрьн, ле Йаһоԝа ԛәдәхә дькьр ԝәки щьмәʹта ԝи ӧса бькә. У һʹәта кӧ мәһәк дәрбаз нәбуйа, изьна ԝан тʹӧнә бу ԝәки ԝан жьнарʹа бьзәԝьщьн, кʹижана кӧ ԝана чаԝа дил зәфт кьрьбун (Ԛануна Дӧщари 21:10-13).

Иро, гәләк ԝәлата ԛәбул кьрьнә кӧ ль гора пәйманед һʹәмдьнйайе шәрʹ бькьн. Ле йазьх кӧ әв пәйман бона парастьна мәрьвед нәнәһәԛ, щара тенә тʹәрʹьбандьне.

5. ХԜӘДЕ БОНА ЩЬМӘʹТА ХԜӘ ШӘРʹ ДЬКЬР

Ԝәʹде бәре, Йаһоԝа гәләк щар бона Исраелийа шәрʹ дькьр у щарна бь кʹәрәмәта али ԝан дькьр, кӧ әԝана сәркʹәвьн. Мәсәлә, Йаһоԝа али Исраелийа кьр ԝәки әԝана бажаре Әриһайе зәфт кьн. Гәло чаԝа? Гава Исраелийа ль гора фәрмана Йаһоԝа бь дәнге бьльнд кьрьнә ԛирини, диԝаред бажер һьлшийан, у орди һеса кʹәтә һӧндӧрʹ (Йешу 6:20). Щарәкә дьн, гава ԝана тʹәви Әморийа шәрʹ дькьр, Йаһоԝа тәйрокед мәзьн сәр ԝанда баранд. Кәсед кӧ жь тәйроке мьрьн, жь мәрьвед кӧ бь шуре Исраелийа һатьнә кӧштьне, зедәтьр бун (Йешу 10:6-11).

МӘСИҺИЙЕД РʹАСТ ӘʹДЬЛАЙИҺʹЬЗ ЬН

Чаԝа кӧ мә дит, дәрәща мә жь дәрәща Исраелийед бәре гәләк щӧдә йә. Хенщи ван фьрԛийа, мәʹнийед дьн жи һәнә, кӧ чьрʹа әм начьнә шерʹ. Мәсәлә, Хԝәде бәреда готьбу кӧ рʹожед ахьрийеда, кәсед кӧ жь алийе ԝива тенә һинкьрьне, ԝе «еди һини шәрʹ нәбьн» у шәрʹ нәкьн (Ишайа 2:2-4, ИМ). Ӧса жи шагьртед Иса «нә пʹара дьнйайе нә», ләма жи әԝана пьштгьрийа тʹӧ шәрʹа накьн (Йуһʹәнна 15:19).

Һьм жи Иса шагьртед хԝәрʹа гот, кӧ әԝана хԝә дур бьгьрьн жь тьштед ӧса, кӧ кʹин, һерс у шәрʹа пешда тиньн (Мәтта 5:21, 22). Әԝи ԝанрʹа готьбу кӧ әԝана «әʹдьлайийе» бькьн у «дьжмьнед хԝә һʹьз бькьн» (Мәтта 5:9, 44).

Әм чаԝа дькарьн ль гора ван ширәта бьжин? Һәмьки әм нахԝазьн шәрʹ бькьн, ле гәло әм дьле хԝәда дьжмьнатийе дькʹьшиньн, чь кӧ дькарә әʹдьлайа щьвате хьраб кә? Һәрге әре, ԝәрә әм һәр тьшти бькьн, ԝәки әве йәке жь дьле хԝә дәрхьн! (Аԛуб 4:1, 11)

Әм пьштгьрийа шәрʹед нава мьләтада накьн, ле әм әʹдьлайи у һʹьзкьрьне нава һәвдӧда пешда тиньн (Йуһʹәнна 13:34, 35). Һʹәта кӧ әԝ рʹож бе, гава Йаһоԝа һʹәму шәрʹа һʹәта-һʹәтайе бьдә сәкьнандьне, ԝәрә әм тʹәвнәбуйине хԝәй кьн! (Зәбур 46:9)