УСЬВЕ АРИМӘТЙАЙИ дьбәкә хԝәха жь хԝә әʹщебмайи ма, кӧ әԝ ча бь мерхаси незики сәрԝере Рʹоме бу. Пилато Понтийо әʹйан бу ча мәрьвәки кӧ сәр йа хԝә сәкьни. Ле сәва кӧ Иса бь ԛәдьр у лайиԛи бьһата дәфьнкьрьне, кәсәки гәрәке щьнйазе ԝи жь Пилато бьхԝәста. У дьбәкә Усьв нә жи дьфькьри кӧ Пилато ԝе һеса ԛайил бә хԝәстьна ԝи бинә сери. Ле гава Пилато жь әскәр пеһʹәсийа кӧ Иса мьр, әԝи изьн да Усьв кӧ щьнйаз һьлдә. Паши ве йәке Усьв дьлшькәсти ләзә-ләз вәгәрʹийа бәр щийе кӧ Иса мьр (Марԛ. 15:42-45).

• Ле гәло кʹе бу Усьве Аримәтйайи?

• Кʹе бу әԝ бона Иса?

• У сәрһатийа ԝи чь кʹар ә бона ԝә?

Кʹьтеба Марԛосда сәр Усьв те готьне кӧ әԝ «йәки хԝәйиԛәдьр у әндәме щьвина гьрәгьра бу». Һьнге щьвина гьрәгьра диԝана Щьһуйайә һәри бьльнд бу у һʹӧкӧме ве щьвине сәр сәрԝертийе, щьмәʹте у религийа һәбу (Марԛ. 15:1, 43). Усьв әндәме ве щьвине бу, у ләма әԝи дькарьбу һәрʹә щәм сәрԝере Рʹоме. У ӧса жи әʹщебмайи нинә кӧ Усьв мәрьвәки дәԝләти бу (Мәт. 27:57).

Щьвина гьрәгьра ча кʹом мьԛабьли Иса бу. У әндәмед ве щьвине тʹәвайи шеԝьр кьрьн, ԝәки Иса бьдьнә кӧштьне. Ле Кʹьтеба Пироз Усьв нав дькә ча «мәрьвәки ԛәнщи ширһʹәлал» (Луԛа 23:50). Бәле, әԝ мина гәләка жь ве щьвине нибу. Әԝ мәрьвәки дьлтʹәмьз, нав-намус бу у чьԛас дькарьбу тʹәмийед Хԝәде дьани сери. Әԝ ӧса жи «һивийа Пʹадшатийа Хԝәде бу», у әв йәк дьдә кʹьфше кӧ чьрʹа әԝ бу шагьрте Иса (Марԛ. 15:43; Мәт. 27:57). Жерʹа рʹасти у һәԛи гәләк фәрз бу, у дьбәкә ләма әԝи һинкьрьнед Иса ԛәбул кьр.

Йуһʹәнна 19:38-да те готьне кӧ Усьв «шагьрте Иса бу, ле жь тьрса щьһуйа хԝә әʹйан нәдькьр». Ле гәло Усьв жь чь дьтьрсийа? Әԝи заньбу кӧ Щьһу Исарʹа дьжмьнатийе дькʹьшиньн, у кӧ әԝана ԝе һәр кәси йе кӧ баԝәрийа хԝә Иса бинә жь кʹьниште дәрхьн (Йуһʹн. 7:45-49; 9:22). У әԝе кӧ жь кʹьниште бьһата дәрхьстьне, бәр чʹәʹве Щьһуйа ԝе рʹәш буйа, у ԝе бәри ԝи дана жь хԝә дурхьстана. Ләма Усьв дьтьрсийа әʹйан бежә кӧ әԝ баԝәрийа хԝә Иса тинә. Һәрге әԝи ӧса бькьра, наве ԝи бькʹәта у ԝе щийе хԝә жи ӧнда кьра.

Ле Усьв тʹәне нибу кӧ ӧса дьтьрсийа. Йуһʹәнна 12:42-да те готьне: «Сәрԝера гәләка баԝәрийа хԝә ль ԝи [Иса] анин. Ле жь тьрса ферьсийа, ль хԝә мӧкӧрʹ нәдьһатьн, кӧ жь кʹьниште нәйенә дәрхьстьне». Диса әндәмәки щьвина гьрәгьра жи, жь бо тьрсе нькарьбу бьгота ԝәки әԝ Иса нас дькә. Наве ԝи мәрьви Никодемо бу (Йуһʹн. 3:1-10; 7:50-52).

Усьв шагьрте Иса бу, ле йәкә нькарьбу дәрһәԛа ве йәке әʹйан бежә. Әв йәк нәрʹаст бу, ль гора ԝан гьлийед Иса: «Кʹи кӧ мьн бәр мәрьва иԛрар кә, әзе жи ԝи бәр Баве хԝәйи әʹзмана иԛрар кьм. Ле кʹи кӧ мьн бәр мәрьва инкʹар кә, әзе жи ԝи бәр Баве хԝәйи әʹзмана инкʹар кьм» (Мәт. 10:32, 33). Бәле, Усьв әʹйан нәдьгот кӧ Иса нас накә, ле әԝи ӧса жи нәԝерьбу бьгота кӧ әԝ Иса ԛәбул дькә.

Кʹьтеба Пироз дьбежә кӧ чахе щьвина гьрәгьра шеԝьра хԝә мьԛабьли Иса дькьрьн, Усьв пьштгьрийа шеԝьра ԝан нәкьрьбу (Луԛа 23:51). Ӧса жи, чаԝа һьнәк дьбежьн, дьԛәԝьмә чахе диԝана Иса дькьрьн, Усьв ԝедәре нибу. Чь жи  һәбә, әԝ нәһәԛийа бехԝәдети бәр чʹәʹве Усьв рʹәш бу, ле сәд һʹәйф әԝи нькарьбу әв нәһәԛи бьдә сәкьнандьне!

Чахе Иса мьр, ча те кʹьфше Усьв тьрса хԝә тәмьранд у сафи кьр кӧ пьштгьрийа шагьртед Иса бькә. Әԝ йәк те кʹьфше жь Марԛос 15:43, кʹидәреда те готьне: «Ԝи тӧрӧш кьр, чу щәм Пилато, щьнйазе Иса же хԝәст».

Те кʹьфше кӧ чахе Иса мьр Усьв ԝедәре бу, чьмки әԝи пешийа Пилато заньбу кӧ Иса мьрийә. Кʹьтеба Пироз дьбежә кӧ чахе Усьв жь ԝи щьнйаз хԝәст, әԝ «әʹщебмайи ма» гава «бьһист кӧ Иса иди мьрийә» (Марԛ. 15:44). Һәрге Усьв хԝәха пе чʹәʹве хԝә мьрьна Иса сәр стуна щәфе дит, һьлбәт әԝе йәке ԝе сәр исафа ԝи һʹӧкӧм кьра у ахьрийеда фәʹм кьра ԝәки гәрәке әʹйан кә кӧ әԝ алийе рʹастийе дьгьрә. Дьбәкә ӧса жи бу, чьмки ида тьрса ԝи тʹӧнә бу у әԝи нәдьхԝәст вәшарта кӧ шагьрте Иса йә.

Ԛануна Щьһуйа дәʹԝа дькьр ԝәки мәрьвед кʹижан кӧ бь мьрьне һатьнә щәзакьрьне, пешийа кӧ рʹож бьчуйа ава гәрәке бьһатана дәфьнкьрьне (Ԛан. Дщр. 21:22, 23). Ве йәкеда хәма Рʹомайа нибу, чьмки ԝана щьнйазед ԛачаха йан сәр стуне дьһиштьн, йан жи дьавитьнә чʹәле. Ле Усьв нәһишт кӧ щьнйазе Иса жи ӧса бькьн. Незики щийе кӧ Иса мьр, тʹьрбәкә тʹәзә һәбу ԛәйеда кʹолайи, хԝәйе кʹижане Усьв бу. Әԝ  йәк кӧ ве тʹьрбеда тʹӧ щар кәсәк нәһатьбу данине, дьдә кʹьфше ԝәки Усьв тʹәзә жь Аримәтйайе * дәрбази Оршәлиме бьбу у әԝи хԝәстьбу әԝ тʹьрб щийе дәфьнкьрьна ԝи у малбәта ԝи бә (Луԛа 23:53; Йуһʹн. 19:41). Әԝ йәк кӧ Усьв тʹьрба хԝәда Иса дәфьн кьр, әʹйан дькә кӧ әԝ чьԛас мәрʹд у һʹәйф бу. Бь ве йәке ӧса жи пʹехәмбәртийа дәрһәԛа Мәсиһ һатә сери, кӧ әԝ ԝе тʹәви йе «дәԝләмәнд» бе дәфьнкьрьне (Иша. 53:5, 8, 9).

Һәр чар кʹьтебед пешьнә Мьзгинийе дьбежьн, кӧ чахе щьнйазе Иса жь стуне дахьстьн, Усьв щьнйаз һьлда, ԛәдәке кʹьтанийи паԛьжда кʹәфән кьр у дани нав тʹьрба хԝәйә ну (Мәт. 27:59-61; Марԛ. 15:46, 47; Луԛа 23:53, 55; Йуһʹн. 19:38-40). Тʹәне дәрһәԛа мәрьвәки те готьне кӧ аликʹари дайә Усьв, әԝ Никодемо бу, йе кӧ анәгори әʹдәте дәфьнкьрьне бьһарәт ани. Әԝ һәрдӧ мер навдар бун, ләма жи дьбәкә ԝана щьнйаз ԝе хԝәха нәбьрана. Дьԛәԝьмә ԝана бәрдәстийед хԝәрʹа готьн кӧ щьнйаз һьлдьн у дәфьн кьн. Һәрге жи әԝ йәк ӧса бу, йәкә әԝ шьхӧләкә бьчʹук нибу. Һәр кәсе кӧ дәсте хԝә бьда щьнйаз, ԝе һʹәфт рʹожа нә паԛьж бьһата һʹәсабе, у ԝана дәсте хԝә бьдана чь жи, ԝе нә паԛьж буйа (Жьмар 19:11; Һаг. 2:13). Хенщи ве йәке, ве һʹәфтийе Щәжьна Дәрбазбуне бу, у ԝана ԝе нькарьбуна щәжьн дәрбаз кьрана у гәрәке нә жи незики мәрьва буна (Жьмар 9:6). Һьн жи Усьв заньбу кӧ сәва дәфьнкьрьна Иса, әԝ ԝе алийе әндәмед гьрәгьрада бьбә пекʹәни. Бәле, Усьв әԝ йәк заньбу, ле йәкә һазьр бу һәр тьшти тәйах кә сәва дәфьнкьрьна Иса лайиԛи бә, у ԝәки хԝә әʹйан кә кӧ әԝ шагьрте Иса йә.

Хенщи дәфьнкьрьна Иса кӧ һәр чар кʹьтебед пешьнә Мьзгинийеда те гьликьрьне, дәрһәԛа Усьве Аримәтйайи Кʹьтеба Пирозда тьштәк найе готьне. Гәло һʹале ԝи ча бу? Әм тьштәки ньзаньн дәрһәԛа ве йәке. Ле чь кӧ мә шеԝьр кьр, жь ве йәке те кʹьфше, кӧ әԝи дьбәкә хԝә әʹйан кьр ча Мәсиһи. Чахе әԝ кʹәтә щерʹьбандьне у чәтьнайе, баԝәрийа ԝи у мерхасийа ԝи һе зедә бу, нә кӧ кем бу. Әԝ нишанәкә баш бу.

Сәрһатийа ԝи пьрсәкә ӧса пешда тинә, кӧ ԝе баш бә һәр кәс жь мә сәр ве пьрсе бьфькьрә: Гәло һәйә тьштәки ӧса, бәʹса хәбәре, навәки баш, һәбук, һʹьзкьрьн һьндава нәфәра йан жи азайа мә, кӧ жь һәләԛәтийа мә тʹәви Йаһоԝа һе фәрзтьр ә?