БОНА ЩОТЕД ЗӘWЬЩИ
1: Борщдари
ӘW ЧЬ ТЕ ҺʹӘСАБЕ
Мер у жьн йед кӧ борщдарийа зәwаще тиньн сери, фәʹм дькьн кӧ һәләqәтийа wан гәрәке һәрһәйи бә, у әwана хwә бехофийеда тʹәхмин дькьн. Мер у жьн һьндава һәвда баwәр ьн, кӧ нава чәтьнайада жи wе һʹәму тьшти бькьн кӧ зәwаща хwә хwәй кьн.
Һьнәк щот мәщбур ьн тʹәви һәв бьминьн, чьмки һәвалед wан, wана дьдьнә зоре кӧ һәв нәqәтьн. Ле бь рʹасти борщдарийа зәwаще гәрәке ль сәр һʹиме qәдьргьртьне у һʹьзкьрьне бә.
ПРИНСИПА КʹЬТЕБА ПИРОЗ: «Мер жи бьра жьна хwә бәрʹнәдә» (1 Корьнтʹи 7:11).
Мерәк, наве кʹижани кӧ Микʹа йә, дьбежә: «Чахе тӧ борщдарийа хwә зәwащеда тʹәхмин дьки, тӧ зу нахәйиди. Тӧ дәрбера дьбахшини у бахшандьне жи дьхwази. Тӧ сәр чәтьнайа дьньһерʹи ча сәр проблемед бьчʹук, у нә кӧ ча сәр проблемед мәзьн, кӧ wе нәйенә сафикьрьне у бәрбь һәвqәтандьне дьбьн».
ЧЬМА ФӘРЗ Ә
Мер-жьнед кӧ зәwащеда борщдарийа хwә тʹәхмин накьн, гава рʹасти проблема тен дьфькьрьн: «Әм һәв найен». Әwана мәщала дьгәрʹьн кӧ жь һәв бьqәтьн.
Кʹӧлфәтәк, наве кʹижане кӧ Щен ә, дьбежә: «Гәләк мәрьв чахе дьзәwьщьн, дьфькьрьн кӧ һәрге һʹәму тьшт щәм wана баш дәрбаз нәбә, әwана wе бе проблем жь һәв бьqәтьн. Гава мәрьв дьзәwьщьн у сәрида дәрһәqа һәвqәтандьне дьфькьрьн, демәк әwана ида жь дәстпеке зәwаща хwә дькьнә бьн qәзийе».
ТӦ ЧЬ ДЬКАРИ БЬКИ
ХWӘ БЬЩЕРʹЬБИНӘ
Wәʹде шәрʹкьрьне бьфькьрә . . .
-
Тӧ пʹошман дьби кӧ тә әw мәрьв станд?
-
Тӧ дьфькьри кӧ тʹәви йәки дьн би?
-
Тӧ тьштед ӧса дьбежи «Әзе жь тә бьqәтьм», йан жи «Әзе һәрʹьм бал wи, йе кӧ qәдьре мьн занә»?
Һәрге тә сәр пьрсәке йан сәр чәнд пьрса щаба хwәда гот «Бәле», демәк wәʹдә йә, wәки сәр борщдарийа хwә рʹьнд бьфькьри кӧ пек бини у зәwаща хwә жи хwәй ки.
ТʹӘВИ МЕР ЙАН ЖЬНА ХWӘ ШЕWЬР КӘ
-
Тӧ тʹәхмин дьки кӧ кәсәк жь wә, борщдарийа хwә зәwащеда наqәдинә? Һәрге ӧса нә, ле чьма?
-
Тӧ чь дькари бьки сәва кӧ борщдарийа хwә зәwащеда бьqәдини?
ШИРӘТ
-
Мер йан жьна хwәрʹа чәнд гьлийед дьлгәрми бьньвисә
-
Сәр сьфьра хwәйә хәбате, шькьле жьн йан мере хwә дайнә, у бь wе йәке борщдарийа хwә зәwащеда бьдә кʹьфше
-
Чахе тӧ щийе хәбате йи, йан чуйи щики дьн, мер йан жьна хwәрʹа тʹелехә
ПРИНСИПА КʹЬТЕБА ПИРОЗ: «Әwед кӧ Хwәде кьрьнә йәк, бьра мәрьв жь һәвдӧ нәqәтинә» (Мәтта 19:6).
