БЬ МИЛЙОНА Мәсиһийа сафи кьрьнә, кӧ Щәжьна Рʹожа Буйина Иса дәрбаз нәкьн. Ле ԝана чьрʹа ӧса сафи кьрийә? Әԝана дьфькьрьн ԝәки тьштәки баш ӧнда дькьн? Ле гәло зарʹед ԝан дьфькьрьн, ԝәки тьштәки жь ԝан кем дькьн? Дина хԝә бьдьне, дәрһәԛа ве йәке Шәʹдед Йаһоԝа жь щурʹә-щурʹә ԝәлата чь дьбежьн.

Фькьрандьн дәрһәԛа Иса Мәсиһ: «Бәре әз тʹәне ԝәʹде Рʹожа Буйина Иса у әʹйда Пасхайе (Һекәсор) дьчумә дере. Ле һәла һьнге жи әз дәрһәԛа Иса Мәсиһ нәдьфькьрим. Ньһа әз Шәʹде Йаһоԝа мә у щәжьна Рʹожа Буйина Иса дәрбаз накьм. Ле һʹәфтийе дӧ щара әз дьчьмә щьвата, у һьм жи мәрьварʹа гьли дькьм, кӧ дәрһәԛа Иса Кʹьтеба Пироз чь һин дькә!» (ИВА, АВСТРАЛЙА).

Шабуна жь дайине: «Әз гәләк ша дьбьм, чахе һьнге пʹешкʹеша дьдьнә мьн, гава әз һивийе ниньм. Пʹешкʹешед ӧса гәләк мьн хԝәш тен! Ӧса жи гәләк мьн хԝәш те нәʹма бьньвисьм, шькла нәԛьш кьм у ча пʹешкʹеш бьдьмә мәрийа. Әв йәк һьм ԝана ша дькә, һьм жи мьн». (РУБЕН, ИРЛӘНДА БАКӦРЕ).

Аликʹари бона йед кӧ һʹәԝщә нә: «Мә хԝәш те, кӧ бона мәрьвед нәхԝәш хԝарьна чекьн. Щарна әм кӧлирка, ширьнайи йан пʹешкʹешәкә бьчʹук дьдьнә ԝана, сәва кӧ әԝана ша бьн. Әве йәке әм дькарьн бькьн нә кӧ сале щарәке ԝәʹде щәжьне, ле кʹәнге бьхԝазьн. Әв йәк дьле мә һеса дькә». (ЕМИЛИ, АВСТРАЛЙА).

Тʹопбуна тʹәви малбәте: «Чахе әм малбәтева тʹоп дьбьн, зарʹед мә, хԝә дьһа аза тʹәхмин дькьн тʹәви хал, ап, мәтʹ, хати, зарʹед ԝан у кальк пирькед хԝә у дәрһәԛа ԝан гәләк тьшта педьһʹәсьн. Әм борщдар ниньн тʹәне бона щәжьна тʹоп бьн, у мәрьвед мә заньн, ԝәки әм ԝана һʹьз дькьн ләма тʹоп дьбьн». (ԜЕНДИ, ГЬРАВЕД КАЙМАНЕ).

Әʹдьлайи: «Ԝәʹде Щәжьна Рʹожа Буйина Иса, шьхӧл ӧса зәʹф ә, кӧ һьндьк мәрьв дәрһәԛа әʹдьлайе дьфькьрьн. Ньһа ида әз заньм, ԝәки Кʹьтеба Пироз чь соз дьдә мәрьва, ләма жи дьле мьнда әʹдьлайи йә. Әз баԝәр ьм, ԝәки ахьрийа баш һивийа зарʹед мьн ә». (САНДРА, ИСПАНЙА).