1, 2. Чьрʹа дӧакьрьн ԛәдрәки гәләк мәзьн ә сәва мә, у чьрʹа фәрз ә кӧ бьзаньбьн, чь һин дькә Кʹьтеба Пироз дәрһәԛа дӧакьрньне?

СӘВА Йаһоԝа «кӧ әʹрд у әʹзман әʹфьрандийә», һʹәму мьләт мина дьлопәкә жь аве нә (Зәбур 115:15; Ишайа 40:15). Дь Кʹьтеба Пирозда ӧса ньвисар ә: «Йаһоԝа незике һʹәму кәсед кӧ гази ль ԝи дькьнә; һʹәму кәсед, кӧ бь рʹастийе гази ль ԝи дькьн. Әԝ хԝәстәка кәсед кӧ жь ԝи дьтьрсьн, пек тинә у ԛиринед ԝанед жь бо аликʹарийе дьбьһизә» (Зәбур 145:18, 19, АБ). Тӧ тʹәне бьдә һʹәсабе хԝә, ԝәки Әʹфьрандаре һьмзор кӧ һәр тьшт әʹфьрандийә, незики мә йә у гӧһ дьдә мә, һәрге әм рʹаст гази ԝи дькьн. Бь рʹастийе жи сәва мә ԛәдрәки чьԛас мәзьн ә, кӧ әм дькарьн Хԝәдерʹа дӧа бькьн!

² Һәрге әм дьхԝазьн кӧ Йаһоԝа дӧайед мә бьбьһе, әм гәрәке ӧса ԝирʹа дӧа бькьн чаԝа әԝ дьхԝазә. Ле һәрге әм ньзаньн, чь һин дькә Кʹьтеба Пироз дәрһәԛа дӧакьрьне, әме ча бькарьбьн рʹаст дӧа бькьн? Ләма жи фәрз ә кӧ пебьһʹәсьн жь Кʹьтеба Пироз ча гәрәке дӧа бькьн, чьмки дӧакьрьн али мә дькә ԝәки әм незики Йаһоԝа бьн.

3. Чьрʹа әм гәрәке Йаһоԝарʹа дӧа бькьн?

³ Әм гәрәке Йаһоԝарʹа дӧа бькьн, чьмки әԝ хԝәха мә тʹәглиф дькә кӧ әве йәке бькьн. Дь Хәбәра Хԝәдеда  ньвисар ә: «Бона тʹӧ тьшти хәм нәкьн, ле хԝәстьна ԝә бьра бь дӧа-дьрозга, рʹазибунева тʹәвайи, Хԝәдева әʹйан бә. У әʹдьлайийа Хԝәде кӧ жь һәр һʹьш-аԛьли дәрбазтьр ә, ԝе дьл у фькьред ԝә йәктийа Мәсиһ Исада хԝәй кә» (Филипи 4:6, 7). Ләма жи әм нахԝазьн әве пешкʹеше, йа кӧ Сәрԝере һьмзор дайә мә, ӧнда кьн.

4. Чь щурʹәйи, дӧакьрьн һәләԛәтийа мә тʹәви Йаһоԝа ԛәԝи дькә?

⁴ Дӧакьрьн ӧса жи али мә дькә, ԝәки һәләԛәтийа мә тʹәви Йаһоԝа һе бьшьдә. Мәсәлә, һәвалед рʹаст рʹасти һәв тен у тʹәви һәв хәбәр дьдьн нә тʹәне ԝи чахи гава ԝанарʹа тьштәк лазьм ә. Ԝанарʹа гәләк һʹәԝас ә тʹәви һәв ԝәʹдә дәрбаз кьн, чьмки әԝана дькарьн һеса дьле хԝә һәв дӧрʹа вәкьн, у дәрһәԛа проблемед хԝә у нет-фькьред хԝә һәврʹа бежьн. Әв йәк һәвалтийа ԝан гәләки дьшьдинә. Һәвалтийа мә тʹәви Йаһоԝа жи һәма ӧса дькарә бьшьдә. Бь аликʹарийа ве кʹьтебе тӧ гәләк тьшт пеһʹәсийайи, кӧ чь һин дькә Кʹьтеба Пироз дәрһәԛа Йаһоԝа, һʹӧнӧр-хәйсәтед ԝи у ӧса жи дәрһәԛа ԛьрара ԝи. Ньһа тӧ ида зани кӧ Йаһоԝа һәйә у әԝ йәки ча нә, у дькари һәләԛәтийа хԝә тʹәви ԝи ԛәԝи ки. Дӧакьрьн мәщале дьдә тә, кӧ дәрһәԛа нет-фькьред хԝә Баве хԝәйи әʹзманарʹа бежи. У бь ве йәке тӧйе һе незики ԝи би (Аԛуб 4:8).

5. Жь чь те кʹьфше, кӧ Йаһоԝа нә һʹәму дӧакьрьна дьбьһе?

⁵ Гәло Йаһоԝа һʹәму дӧа дьбьһе? Дина хԝә бьде кӧ ԝәʹде Ишайа пʹехәмбәр, Йаһоԝа чь готә щьмәʹта Исраели, чахе ԝана нәдьхԝәст гӧрʹа ԝи бькьрана: «Дәма һун зәʹф дӧа бькьн жи әзе гӧһдари нәкьм; дәстед ԝә бь хунева тʹьжи йә!» (Ишайа 1:15). Жь вьр те кʹьфше ԝәки кьред мәрийа дькарьн бьбьнә мәʹнийа ԝе йәке, кӧ Йаһоԝа гӧһ нәдә дӧайед ԝан. Һәрге әм дьхԝазьн кӧ дӧайед мә дьле Йаһоԝа хԝәш бен, әм гәрәке бьзаньбьн чәнд дәʹԝакьрьнед фәрз.

6. Сәва кӧ Хԝәде дӧайед мә бьбьһе, чь дәʹԝакьрьнәкә фәрз һәйә, у ча әм гәрәке нишан кьн кӧ әве дәʹԝакьрьне пек тиньн?

⁶ Дәʹԝакьрьнәкә фәрз әв ә, кӧ баԝәрийа хԝә нишан ки. (Бьхунә Марԛос 11:24.) Паԝлосе шанди ньвиси: «Бе баԝәри тʹӧ щар набә кӧ инсан ль Хԝәде хԝәш бе, чьмки әԝе кӧ незики Хԝәде дьбә, гәрәке баԝәр бькә, кӧ Хԝәде һәйә у ԝе ԝан хәлат кә, кʹижан кӧ ль ԝи дьгәрʹьн» (Ибрани 11:6). Бәле, сәва кӧ баԝәрийа рʹаст нишан ки, гәрә нә кӧ тʹәне бьзаньби ԝәки Хԝәде һәйә у кӧ әԝ дӧайед мә дьбьһе у щаба ԝан дьдә. Әм гәрәке баԝәрбуне бь кьред хԝә избат кьн. Демәк бь әʹмьре хԝәйи һәр рʹожи гәрәке бьдьнә кʹьфше, кӧ баԝәрбуна мә һәйә (Аԛуб 2:26).

7. (а) Чьрʹа әм гәрәке бь ԛәдьр Йаһоԝарʹа дӧа бькьн? (б) Ча әм дькарьн нишан кьн һʹәлали у мьлуктийа хԝә, чахе Хԝәдерʹа дӧа дькьн?

⁷ Йаһоԝа ӧса жи дьхԝазә кӧ әм бь мьлуктийе у һʹәлалийе ԝирʹа дӧа бькьн. У әԝ һежа йә, ԝәки әм бь мьлуктийе тʹәви ԝи хәбәр дьн. Мәсәлә чахе мәри бәр ԝәзир йан жи бәр сәроке ԝәлат дьсәкьнә, тʹьме бь ԛәдьр тʹәви ԝан хәбәр дьдә, чьмки әԝ занә кӧ фьрԛийа ортʹа ԝи у ԝан чь йә. Ле чьԛас һе зедә әм гәрәке бь ԛәдьр тʹәви Йаһоԝа хәбәр дьн! (Зәбур 138:6). Чьмки әԝ «Хԝәдейе Һәри» Зор ә (Дәстпебун 17:1, ПКʹМ). Чахе әм дӧа дькьн, әм гәрәке бь мьлуктийе бьдьнә кʹьфше, ԝәки заньн кӧ әм һьмбәри Хԝәде кʹи нә. Мьлукти ԝе али мә бькә  кӧ дӧайед мә пʹьрʹхәбәр йан жи бь әзбәри нибьн, дәԝсе әме бь һʹәлали у бь дьл у щан ԝирʹа дӧа бькьн (Мәтта 6:7, 8).

8. Ча әм дькарьн анәгори дӧайед хԝә бьжин?

⁸ Сәва кӧ Хԝәде мә бьбьһе, әм ӧса жи гәрәке анәгори дӧайед хԝә шьхӧл бькьн. Йаһоԝа һивийе йә кӧ әм ԛәԝата хԝә гьшки бьдьн хәбате, ԝәки анәгори дӧайед хԝә бьжин. Мәсәлә, чахе әм дӧа дькьн у дьбежьн: «Нане мәйи рʹоже, рʹож бь рʹож бьдә мә», демәк әм гәрәке бьхәбьтьн у хәбатһʹьз бьн (Мәтта 6:11; 2 Тʹесалоники 3:10). Һәрге дь тьштәкида сьстбуна мә һәйә, у дәрһәԛа ве йәке әм Хԝәдерʹа дӧа дькьн у аликʹарийе жь ԝи дьхԝазьн, әм хԝәха жи гәрәке жь ԝан һʹәму тьшта хԝә дур бьгьрьн, чь кӧ дькарә мә бьдә шашкьрьне (Колоси 3:5). Хенщи ван йәка диса һьнә пьрс дәрһәԛа дӧакьрьне һәнә, у әм гәрәке бьзаньбьн щаба ван пьрса.

9. Кʹерʹа әм гәрәке дӧа бькьн у бь наве кʹе?

⁹ Кʹерʹа әм гәрәке дӧа бькьн? Иса Мәсиһ шагьртед хԝә һин дькьр дӧа бькьн: «Баве мәйи әʹзманарʹа» (Мәтта 6:9). Ләма жи әм гәрәке тʹәне Йаһоԝарʹа дӧа бькьн. Йаһоԝа дьхԝазә ԝәки әм бь наве Кӧрʹе ԝи, Иса Мәсиһ ԝирʹа дӧа бькьн. Гәло чьрʹа? Чьмки ча әм жь сәре 5 пеһʹәсийан, Иса Мәсиһ һатә ль сәр әʹрде сәва кӧ әʹмьре хԝә бьдә ча кʹьрʹин у мә жь гӧнә у мьрьне хьлаз кә (Йуһʹәнна 3:16; Рʹомайи 5:12). Әԝ һәйә сәрәккʹаһине кʹьфшкьри, кӧ дькарә шашийед у гӧнед мә бьбахшинә. Әԝ ӧса жи һатә кʹьфшкьрьне ча Һʹакьм (Йуһʹәнна 5:22; Ибрани 6:20). Аһан чьрʹа Кʹьтеба Пироз мә һин дькә, кӧ бь наве Иса Мәсиһ Хԝәдерʹа дӧа бькьн. Дәрһәԛа хԝә Иса гот: «Әз ьм, рʹе, рʹасти у жийин. Тʹәне пе мьн йәк дькарә бе щәм Баве» (Йуһʹәнна 14:6). Һәрге әм дьхԝазьн кӧ дӧайед мә бенә бьһистьне, әм гәрәке тʹәне Йаһоԝарʹа дӧа бькьн у бь наве Кӧрʹе ԝи Иса Мәсиһ.

10. Чьрʹа әʹсәйи нинә, кӧ чахе Хԝәдерʹа дӧа дькьн бьсәкьньн йан рʹунен?

 ¹⁰ Гәло чахе Хԝәдерʹа дӧа дьки, фәрз ә хәм бьки һәла тӧ ча дьсәкьни йан рʹудьнейи? На. Йаһоԝа жь мә дәԝа накә кӧ ԝәʹде дӧакьрьне әм әʹсәйи гәрәке бь щурʹәки бьсәкьньн, йан жи рʹунен, йан жи дәсте хԝә һьлкʹьшиньн. Кʹьтеба Пироз мә һин дькә, кӧ чахе мәри дӧа дькә, әв дькарә рʹуньшти дӧа бькә, йан ль сәр пʹийа бьсәкьнә, йан сәре хԝә бәржер кә, йан жи ль сәр чока дӧа бькә (1 Дирок 17:16; Нәһәмийа 8:6; Данийел 6:10; Марԛос 11:25). Фәрз нинә, мәри чаԝа сәкьнийә гава Хԝәдерʹа дӧа дькә, фәрз ә кӧ әԝ бь дьле хԝә дӧа бькә. Әм кʹидәре жи бьн, һәр рʹож чахе әм шьхӧл дькьн йан жи чахе ньшкева рʹасти чәтьнайа тен, әм дькарьн дьле хԝәда дӧа бькьн. Дьбә тʹӧ кәс һаш пе тʹӧнә бә кӧ әм дӧа дькьн, ле Йаһоԝа дӧайед ӧса жи дьбьһе (Нәһәмийа 2:1-6).

11. Дәрһәԛа чь әм дькарьн дӧа бькьн?

¹¹ Дәрһәԛа чь әм дькарьн дӧа бькьн? Дь Кʹьтеба Пирозда ньвисар ә: «Һәгәр әм тьштәки ль гора хԝәстьна . . . [Йаһоԝа] же бьхԝазьн, әԝ дәнге мә дьбьһе» (1 Йуһʹәнна 5:14). Демәк чь кӧ мьԛабьли ԛьрара Хԝәде начә, әм дькарьн дәрһәԛа ԝан һʹәму тьшта дӧа бькьн. Ле гәло һәрге әм дәрһәԛа чәтьнайед хԝә ԝирʹа дӧа бькьн, әв жи ԝе ль гора ԛьрара Хԝәде бә? Бәле, ԝе ль гора ԛьрара ԝи бә! Дӧакьрьн әв мина хәбәрдана тʹәви һәваләки незик ә. Әм дькарьн бь дьлсахи Хԝәдерʹа дӧа бькьн у «дьле хԝә ль бәр ԝи вәкьн» (Зәбур 62:8, АБ). Әм гәрәке рʹӧһʹе пироз жь Хԝәде бьхԝазьн, чьмки бь сайа ве йәке әме хьрабийе нәкьн (Луԛа 11:13). Әм ӧса жи дькарьн рʹебәрийе жь ԝи бьхԝазьн, сәва кӧ һʹәму тьшти бь аԛлайи сафи кьн у сәва кӧ ԛәԝате бьдә мә, ԝәки дь чәтьнайада тәйах кьн (Аԛуб 1:5). Һәрге әм гӧнә бькьн, әм гәрәке ль сәр һʹиме ԛӧрбанбуна Иса Мәсиһ бахшандьне жь Хԝәде бьхԝазьн (Әфәси 1:3, 7). Ле фәʹмдари йә, ԝәки әм нә тʹәне гәрәке дәрһәԛа хԝә дӧа бькьн. Әм  ӧса жи гәрәке дәрһәԛа нәфәред мала хԝә у дәрһәԛа хушк-бьред хԝәйә рʹӧһʹани, дӧа бькьн (Кʹаред Шандийа 12:5; Колоси 4:12).

12. Пешийе әм гәрәке дәрһәԛа чь дӧа бькьн?

¹² Йа пешьн, әм гәрәке дәрһәԛа ԝан тьшта дӧа бькьн чь кӧ Йаһоԝа Хԝәдева гьредайи йә. Бал мә гәләк мәʹни һәнә, жь бо чь жи әм гәрәке бь зарʹе хԝә Хԝәде рʹумәт кьн у сәва һәр ԛәнщийа ԝи, рʹазибуна хԝә ԝирʹа әʹйан кьн (1 Дирок 29:10-13). Дь кʹьтеба Мәтта 6:9-13-да, те гьликьрьне кӧ Иса һин дькьр дӧа бькьн, ԝәки наве Хԝәде пироз бә. (Бьхунә.) Ӧса жи Иса һин кьр кӧ әм гәрәке дӧа бькьн ԝәки Пʹадшатийа Хԝәде бе, у ԝәки ԛьрара ԝи пек бе чаԝа ль әʹзман ӧса жи ль сәр әʹрде. У тʹәне паши ван пьрсед фәрз, Иса дәстпедькә бежә дәрһәԛа проблемед гәнди. Һәрге әм жи ӧса дӧа бькьн, демәк пешийе сәва пьрсед кӧ Хԝәдева гьредайи нә дьшьрмиш бьн, әме нишан кьн кӧ әм нә тʹәне дәрһәԛа һʹалхԝәшийа хԝә дьшьрмиш дьбьн.

13. Чь те готьне дь Кʹьтеба Пирозда, дәрһәԛа ве йәке кӧ чьԛас ԝәʹдә әм гәрәке дӧа бькьн?

¹³ Дӧайед мә чьԛас ԝәʹдә гәрәке бькʹьшинә? Фьрԛи тʹӧнә әм тʹәви мәрийед дьн дӧа дькьн, йан жи хԝәха хԝәрʹа, дь Кʹьтеба Пирозда найе ньвисаре чьԛас ԝәʹдә әм гәрәке дӧа бькьн. Мәсәлә, пешийа хԝарьне дькари кьн дӧа бьки, ле чахе дьле хԝә Хԝәдерʹа вәдьки, дькари һе дьреж ԝирʹа дӧа бьки (1 Самуйел 1:12, 15). Иса Мәсиһ сущдар дькьр мәрьвед хԝәрʹази у кʹӧбар, йед кӧ бәрбь һʹәмуйа дьсәкьнин дӧа дьреж дьготьн, сәва кӧ дӧайед ԝан бенә кʹьфше (Луԛа 20:46, 47). Дӧайед ӧса дьле Хԝәде хԝәш найен. Сәва ԝи фәрз ә, ԝәки әм бь дьл у щан дӧа бькьн. Ча те кʹьфше әм дькарьн һаԛас Хԝәдерʹа дӧа бькьн, чьԛас дьхԝазьн у кʹәнге дьхԝазьн, әв дәрәщева у мәщалева гьредайи йә.

14. Чь те һʹәсабе «һәр гав дӧа бькьн» у ча әв йәк мә дьл ша дькә?

 ¹⁴ Рʹоже чьԛас щара гәрә дӧа бькьн? Дь Кʹьтеба Пирозда ньвисар ә кӧ әм гәрәке «һәр гав дӧа бькьн» (Рʹомайи 12:12; 1 Тʹесалоники 5:17). Ле әв найе һʹәсабе кӧ әм гәрәке 24 сьһʹәта Хԝәдерʹа дӧа бькьн. Һәйнәсәр, Кʹьтеба Пироз мә һелан дькә, кӧ һәр рʹож дӧа бькьн, тʹьме рʹазибуна хԝә ԝирʹа әʹйан кьн бона рʹәʹмтийа ԝи, ӧса жи рʹебәрийе у аликʹарийе жь ԝи бьхԝазьн. Бь рʹастийе жи шабунәкә чьԛас мәзьн ә бьзаньби кӧ дькари Хԝәдерʹа дӧа бьки, кʹәнге дьхԝази у чьԛас дьхԝази! Һәрге әм бь рʹастийе әв пʹешкʹеша жь Хԝәде, демәк дӧакьрьне ԛимәт дькьн, әме әʹсәйи ԝәʹдә бьбиньн, сәва кӧ Баве хԝәйи әʹзманарʹа хәбәр дьн.

15. Чьрʹа әм гәрәке бежьн «Амин» паши дӧакьрьна хԝә, йан жи чахе дӧайед кәсәки дьбьһен?

¹⁵ Чьрʹа хьлазийа дӧакьрьне әм гәрәке бежьн «Амин»? Хәбәра «амин» те һʹәсабе «бәле», йан «бьра ӧса бә». Ча жь мәсәлед Кʹьтеба Пироз те кʹьфше, ԝәʹде бәре мәрийа паши дӧакьрьне тʹьме дьготьн «Амин» (1 Дирок 16:36; Зәбур 41:13). Чахе әм жи паши дӧакьрьне дьбежьн «Амин», бь ве йәке әм нишан дькьн кӧ гьлийед мә һʹәлал бун. Ле чахе кәсәк дӧа дькә у хьлазийе әм бь дәнге бьльнд йан дьле хԝәда дьбежьн «Амин», бь ве йәке әм дьдьнә кʹьфше кӧ әм ԛайил ьн бь ван гьлийа, чь кӧ готьн (1 Корьнтʹи 14:16).

16. Чь әм дькарьн баԝәр бькьн чахе дӧа дькьн?

¹⁶ Гәло Йаһоԝа бь рʹастийе щаба дӧайед мә дьдә? Бейи шьк, бәле! Әм дькарьн бь тʹәмамийа дьле хԝә баԝәр бькьн, кӧ Хԝәде «йе кӧ дӧа дьбьһизә», щаба милйона мәрийа дьдә, йед кӧ бь һʹәлали ԝирʹа дӧа дькьн (Зәбур 65:2). Йаһоԝа дькарә щаба мә бьдә бь сайа щурʹә-щурʹә тьшта у кәса.

17. Чьрʹа әм дькарьн бежьн, кӧ Хԝәде щаба дӧайед мә бь сайа мьлйакʹәта у ԛӧльхкʹаред хԝә дьдә?

¹⁷ Йаһоԝа бь сайа мьлйакʹәтед хԝә у ӧса жи бь сайа ԛӧльхкʹаред хԝә, дькарә щаба дӧайед мә бьдә (Ибрани 1:13, 14). Һәнә гәләк ԛәԝьмандьн, чахе мәрийа Хԝәдерʹа  дӧа дькьр, аликʹари жь ԝи дьхԝастьн сәва кӧ Кʹьтеба Пироз рʹьнд фәʹм бькьн, у һьнә ԝәʹдә шунда әԝана рʹасти Шәʹдед Йаһоԝа дьһатьн. Жь мәсәлед ӧса те кʹьфше, кӧ шьхӧле даннасинкьрьне мьлйакʹәт рʹебәри дькьн (Әʹйанти 14:6). Йаһоԝа ӧса жи сәва кӧ щаба дӧайед мә бьдә, дькарә ԛӧльхкʹаре хԝә һелан кә, ԝәки әԝ дь ԝәʹде гьранда аликʹарийе бьдә мә (Мәтʹәлок 12:25; Аԛуб 2:16).

18. Ча Йаһоԝа бь аликʹарийа рʹӧһʹе хԝәйи пироз у бь аликʹарийа Кʹьтеба Пироз, щаба дӧайед ԛӧльхкʹаред хԝә дьдә?

¹⁸ Йаһоԝа ӧса жи щаба дӧайед мә, бь аликʹарийа рʹӧһʹе  хԝәйи пироз у бь Кʹьтеба Пироз, дьдә. Мәсәлә, әв дькарә бь рʹӧһʹе пироз рʹебәрийа мә бькә у дь чәтьнайада мә ԛәԝи кә (2 Корьнтʹи 4:7). Щарна әме щаба дӧайед хԝә жь Кʹьтеба Пироз бьстиньн. Бь сайа ве кʹьтебе Йаһоԝа рʹебәрийе дьдә мә, сәва кӧ сафикьрьнед мә бь аԛлайи бьн. Рʹезед кӧ ԝе али мә бькьн, әм дькарьн бьбиньн ԝәʹде һинбуна Кʹьтеба Пирозә хԝәха у чахе әм әʹдәбйәта дьхуньн, йед кӧ ль сәр һʹиме Кʹьтеба Пироз ьн, мәсәлә ча әв кʹьтеб. Фькьред жь Кʹьтеба Пироз йед кӧ ԝе али мә бькьн, әм дькарьн ль сәр щьвата бьбьһен, жь хушк-бьра дь щьватеда йан жи жь рʹуспийа, йед кӧ хәм дькьн дәрһәԛа һʹалхԝәшийа мә (Галати 6:1).

19. Чь әм гәрәке тʹьме биньн бира хԝә, һәрге мә тʹьре кӧ Йаһоԝа щаба дӧайед мә дәрәнги дьхә?

¹⁹ Һәрге мә тʹьре кӧ Йаһоԝа щаба дӧайед мә дәрәнги дьхә, әв найе һʹәсабе кӧ Хԝәдерʹа чәтьн ә щаба мә бьдә. Фәрз ә ԝәки тʹьме дь бира мәда бә, кӧ Йаһоԝа щаба дӧайед мә дь ԝәʹдәда у ль гора ԛьрара хԝә ԝе бьдә. Әԝ рʹьнд занә һʹәԝщед мә, у жь мә четьр занә кӧ ча али мә бькә. Щарна әԝ мәрʹа мәщала дьдә, ԝәки әм бь кьред хԝә нишан кьн кӧ дьԛәдиньн ширәтед жь Кʹьтеба Пироз, кʹидәре кӧ те готьне ԝәки әм гәрәке нәсәкьньн, демәк «бьхԝазьн . . . бьгәрʹьн . . . дәри хьн» (Луԛа 11:5-10). Һәрге әм әве ширәте пек биньн, әме нишан кьн баԝәрийа хԝә у бьдьнә кʹьфше, кӧ әв йәк чь кӧ әм жь  ԝи дьхԝазьн, мәрʹа гәләк фәрз ә. Дькарә бьԛәԝьмә кӧ Йаһоԝа щаба дӧайед мә ӧса нәдә, чаԝа әм һивийе нә. Мәсәлә чахе әм рʹасти щерʹьбандьна тен, дьбә Йаһоԝа перʹаперʹа мә жь щерʹьбандьна хьлаз нәкә, ле ԝе ԛәԝате бьдә мә ԝәки әм бькарьбьн тәйах кьн. (Бьхунә Филипи 4:13.)

20. Чьрʹа әм гәрәке пʹешкʹеша жь Хԝәде, демәк дӧакьрьне ԛимәт кьн?

²⁰ Бь рʹастийе жи, әм чьԛас бәхтәԝар ьн кӧ Әʹфьрандаре әʹрде незики ԝан һʹәму мәрийа дьбә, йед кӧ дь рʹастийеда ԝирʹа дӧа дькьн. (Бьхунә Зәбур 145:18). Ԝәрен әм тʹьме ԛимәт кьн әве пʹешкʹеша жь Хԝәде, демәк дӧакьрьне. Әв йәк ԝе али мә бькә, ԝәки әм һе незики ԝи Хԝәдейи бьн, йед кӧ дӧа дьбьһе.