ПʹАРА 4
Хԝә Сущдаркьрьн; «Мьн Паԛьж кә жь Гӧнәйед Мьн»
«Жь бо хәбата мьнә тʹәзә малбәта мьнда ида кемасийа пʹәрә тʹӧнә бу. Ле мьн дәстпекьр шьхӧлед ӧсава мьжул бьм, чь кӧ нәрʹаст бу. Мьн дәстпекьр әʹйд-ԛәйда дәрбаз кьм, дькʹәтьмә нав шьхӧлед политики у һәла һе дьчумә дера жи. Ԝәкә 40 сала әз рʹӧһʹанида сьст бум у мьн әԝ йәк нәдькьр чь кӧ Шәʹдед Йаһоԝа дькьрьн. Чьԛас ԝәʹдә дәрбаз дьбу, һаԛас һе зедә әз дьфькьрим, ԝәки Йаһоԝа ԝе нәбахшинә мьн. Һәла һе мьн хԝәха жи нькарьбу бьбахшанда хԝә. Чьмки һʹәта кӧ мьн әԝ тьшт бькьрана, мьн рʹийа рʹаст заньбу» (Мартʹа).
ХԜӘ СУЩДАРКЬРЬН дькарә бьбә баре гьран. Даԝьд Пʹадша гот: «Нәһәԛийед мьн жь сәре мьн бьльндтьр бунә, мина баре гьран әԝ ль сәр мьн гьран бунә» (Зәбур 38:4). Һьнә Мәсиһи гәләк дьлтәнг бунә, чьмки әԝана дьфькьрьн, ԝәки Йаһоԝа ԝе тʹӧ щар ԝана нәбахшинә (2 Корьнтʹи 2:7). Ле гәло әԝ йәк рʹаст ә? Һәла һе һәрге тә гӧнед гьран жи кьрийә, гәло тӧ жь Йаһоԝа ӧса дур кʹәти, ԝәки әԝе тʹӧ щар нәбахшинә тә? На, ӧса нинә!
«Ньһа Ԝәрьн у Әм ль Доза Хԝә Бьнерʹьн»
Йаһоԝа пьшта хԝә надә ԝан, кʹе тʹобә дькә. Дәԝсе әԝ дәсте хԝә чаԝа аликʹари, дьрежи ԝан дькә! Иса, мәтʹәлока хԝәда Йаһоԝа бәрамбәри ԝи баве һʹьзкьри кьр, кӧрʹе кʹижани жь мал чу у хԝә рʹийа нәрʹаст гьрт. Һьнә ԝәхт шунда кӧрʹ сафи дькә пашда вәгәрʹә мал. «Ле гава һе дурва баве [кӧрʹ] дит, дьле ԝи сәр шәԝьти, бәрбь ԝи бәзи, әԝ һʹәмез кьр у рʹамуса» (Луԛа 15:11-20). Дьԛәԝьмә тӧ дьфькьри, ԝәки жь Йаһоԝа гәләк дур кʹәти, ле хԝәстьна тә һәйә пашда вәгәрʹи? Мина ԝи баве жь мәтʹәлока Иса, Йаһоԝа жи бь һʹьзкьрьне, дьлшәԝатийе у бь сәбьре һивийе йә, гава тӧ диса вәгәрʹи щәм ԝи.
Ле дьԛәԝьмә тӧ дьфькьри, ԝәки гӧнед тә гәләк мәзьн у гьран ьн у тӧ һежа нини, ԝәки Йаһоԝа бьбахшинә тә? Жь кʹәрәма хԝә дина хԝә бьдә тʹәглифкьрьна Йаһоԝа жь Ишайа 1:18: «Ньһа ԝәрьн у әм ль доза хԝә бьнерʹьн; гәр сущед ԝә мина ԛьрмьз бьн жи ԝе мина бәрфе сьпи бьбьн». Йаһоԝа һәла һе жи гӧнед ӧса дьбахшинә, йед кӧ мина ләкʹе сәр пʹәрчʹе сьпи нә.
Йаһоԝа нахԝазә, ԝәки исафа тә тʹәмамийа әʹмьре тәда, тә бьчәрчьринә. Ле тӧ чь гәрәке бьки, сәва кӧ Хԝәде тә бьбахшинә у исафа тә тʹәмьз бә? Бьфькьрә дәрһәԛа дӧ гава, йед кӧ Даԝьд Пʹадша кьр. Йа пешийе, әԝи гот: «Әзе шашийа хԝә ль бәр Хӧдан бьдьмә рʹуйе хԝә» (Зәбур 32:5). Бир нәкә, ԝәки Йаһоԝа һивийа тә йә, кӧ тӧ бь дӧа незики ԝи би у бь готьна ԝи доза хԝә, демәк һәләԛәтийа хԝә тʹәви ԝи рʹаст ки. Тʹәглифкьрьна ԝи ԛәбул кә. Гӧне хԝә бьдә рʹуйе хԝә у дьле хԝә бь тʹәмами Йаһоԝарʹа вәкә. Даԝьд гәләк щар дьлрʹәмтийа Йаһоԝа әʹмьре хԝәда дитьбу у ләма жи бь баԝәрийе дӧа дькьр: «Мьн паԛьж кә жь гӧнәйед мьн . . . дьле мьлук ә, кӧ Хԝәде тʹәхсир накә» (Зәбур 51:2, 17).
Йа дӧда, Даԝьд аликʹарийа Натʹан пʹехәмбәр ԛәбул кьр (2 Самуйел 12:13). Рʹожа иройин щьватед мәда жи һәнә рʹуспи, йед кӧ бь сайа һинкьрьна Йаһоԝа дькарьн аликʹарийе бьдьнә ԝан, йед кӧ гӧне хԝә дьдьнә рʹуйе хԝә, сәва кӧ диса бьбьнә досте Йаһоԝа. Чахе тӧ незики рʹуспийа би, әԝана ԝе тʹәви тә фькьред жь Ньвисаред Пироз шеԝьр кьн у бона тә бь дьл Хԝәдерʹа дӧа бькьн. Әԝ йәк ԝе али тә бькә рʹьһʹәтийа дьл бьстини, баре хԝә сьвьк ки у рʹӧһʹанида ԛәнщ би (Аԛуб 5:14-16).
Йаһоԝа дьхԝазә, ԝәки тӧ дьлрʹьһʹәтийе бьстини жь бо исафа тʹәмьз
«Хԝәзи ль Ԝи Бәндәйи, кӧ Нәһәԛийед Ԝи Һатьнә Афукьрьне»
Дьбәкә тӧ дьфькьри, ԝәки тьштәки лапи чәтьн әԝ ә, кӧ гӧне хԝә бәр Хԝәде Йаһоԝа у рʹуспийа бьди рʹуйе хԝә. Дьԛәԝьмә Даԝьд жи ӧса дьфькьри. Ԝәʹдәки әԝи «гӧнәйе хԝә нәда рʹуйе хԝә» (Зәбур 32:3). Ле ахьрийе әԝи фәʹм кьр, ԝәки чьԛас фәрз ә гӧне хԝә бьдьнә рʹуйе хԝә у тʹобә кьн.
Гава Даԝьд әԝ йәк кьр, шабунәкә мәзьн станд. Әԝи ньвиси: «Хԝәзи ль ԝи бәндәйи, кӧ нәһәԛийед ԝи һатьнә афукьрьне у гӧнәйед ԝи һатьнә бахшандьне!» (Зәбур 32:1). Даԝьд тʹьме дӧа дькьр: «Хԝәйо, левед мьн Тӧ жь һәв вәкә у дәве мьне рʹумәта Тә бьльнд кә» (Зәбур 51:15). Гава исафа Даԝьд ида ԝи сущдар нәдькьр, әԝ бь рʹазибуне тʹьжә бу у дьхԝәст дәрһәԛа Йаһоԝа мәрьварʹа гьли кә.
Йаһоԝа дьхԝазә, ԝәки исафа тә жи тә нәчәрчьринә у тӧ пе исафа тʹәмьз ԝирʹа хьзмәт ки. Әԝ ӧса жи дьхԝазә, ԝәки тӧ хԝә сущдар нәки, ле пе шабуне у бь дьл у щан дәрһәԛа ԝи у нормед ԝи мәрьварʹа гьли ки (Зәбур 65:1-4). Бир нәкә дәрһәԛа ве тʹәглифкьрьне: «Бәрбь Хԝәде вәгәрʹьн, кӧ гӧнед ԝә бенә рʹәситкьрьне» (Кʹаред Шандийа 3:19).
Әԝ йәк һатә сәре Мартʹайе жи. Әԝ гьли дькә: «Кӧрʹе мьн һәртʹьм мьнрʹа ‹Бьрща Ԛәрәԝьлийе› у ‹Һʹьшйар Бьн!› дьшанд. Ахьрийе әз һеди-һеди незики Йаһоԝа бум. Дьһа чәтьн әԝ бу, кӧ жь Йаһоԝа бахшандьне бьхԝазьм бона һәр гӧнәйед хԝә. Ле йәкә ахьрийе мьн Хԝәдерʹа дӧа кьр у жь ԝи бахшандьн хԝәст. Чәтьн ә баԝәр кьм, ԝәки 40 сал дәрбаз бу у паше әз вәгәрʹийамә бал Йаһоԝа. Мәсәла мьн дьдә кʹьфше, ԝәки һәла һе паши һаԛас сал жи мәрьв диса дькарә вәгәрʹә щәм Йаһоԝа, ԝирʹа хьзмәт кә у һʹьзкьрьна ԝи сәр хԝә тʹәхмин кә».
