Щәжьна Дәрбазбуне щәжьна Щьһуди йә, кʹижан кӧ һатьбу кʹьфшкьрьне, сәва Щьһу бир нәкьн, ԝәки Хԝәде чаԝа сала 1513 Б.Д.М. щьмәʹта Исраел жь дилтийа Мьсьре аза кьр. Хԝәде тʹәми дабу ԝан, ԝәки һәр сал рʹожа 14 мәһа Ибранийә Абибе, кӧ паше һатьбу навкьрьне Нисан, әԝ дәрәща мәхсус дәрбаз кьн (Дәркʹәтьн 12:42; Ԛануна Кʹаһинтийе 23:5).

Әв щәжьн чьрʹа һатийә навкьрьне Щәжьна Дәрбазбуне?

Хәбәра «Щәжьна Дәрбазбуне» жь хәбәра Ибрани пешда һатийә, чь кӧ те һʹәсабе «бәррʹа дәрбаз бьн». Әԝ ԛәԝьмандьн ԝи ԝәʹдәйива гьредайи йә, чахе Хԝәде һʹәму ньхӧрийед Мьсьре ԛьрʹ кьр, ле Исраели жь ве бәлайе хьлаз кьрьн (Дәркʹәтьн 12:27; 13:15). Хԝәде пешийа кӧ әве бәлайе бинә сәре ԝан, готьбу Исраелийа ԝәки хуна бәрх йан бьзьне, һәр дӧ рʹәхдәрийа у «дәрәзунге» дәрийа хьн (Дәркʹәтьн 12:21, 22). Ԝәʹде ԝе бәлайе Хԝәде ԝе әв нишан бьдита у бәр ԝан дәрийарʹа дәрбаз буйа у ӧса ньхӧрийед ԝан хьлаз буна (Дәркʹәтьн 12:7, 13).

Ԝәʹде бәре Щәжьна Дәрбазбуне чаԝа дәрбаз дькьрьн?

Хԝәде рʹебәри да Исраелийа, кӧ Щәжьна Дәрбазбунейә a пешьн чаԝа дәрбаз кьн. Жере жь Кʹьтеба Пироз те шьровәкьрьне, кӧ әв щәжьн чаԝа дәрбаз дьбу.

• Ԛӧрбана Щәжьна Дәрбазбуне: Һәр малбәтәкә Исраели гәрәке рʹожа дәһа йа мәһа Абибе (Нисане), бәрха йәксали йа пез йан жи йа бьзьне бьжбарта у рʹожа 14 әв сәржекьрана. Ԝәʹде Щәжна Дәрбазбунейә пешьн, Исраелийа әв хун рʹәхдәрийа у дәрәзунге дәре мала хԝә дьхьстьн (Дәркʹәтьн 12:3-9).

• Шива Щәжьна Дәрбазбуне: Ԝәʹде дәрбазкьрьна Щәжьна Дәрбазбуне, Исраелийа тʹәви гоште бәрха пез йан бьзьне, нане шкәва у пʹьнщарʹа тәʹл дьхԝарьн (Дәркʹәтьн 12:8).

• Щәжьн: Исраелийа паши Щәжьна Дәрбазбуне һʹәфт рʹож Щәжьна Нане Шкәва дәрбаз дькьрьн. Ԝәʹде ԝе щәжьне ԝана нане бе һәвиртьрʹшк дьхԝар (Дәркʹәтьн 12:17-20; 2 Дирок 30:21).

• Һинкьрьн: Де-бав ԝәʹде Щәжьна Дәрбазбуне зарʹед хԝә дәрһәԛа Йаһоԝа Хԝәде һин дькьрьн (Дәркʹәтьн 12:25-27).

• Рʹевити: Ԝәʹдә шунда Исраели дьчунә Оршәлиме, ԝәки Щәжьна Дәрбазбуне дәрбаз кьн (Ԛануна Дӧщари 16:5-7; Луԛа 2:41).

• Әʹдәтед дьн: Гава Иса сәр әʹрде бу, ԝәʹде Щәжьна Дәрбазбуне шәрав дьданә хәбате у кʹьламед пәсьндайине дьстьран (Мәтта 26:19, 30; Луԛа 22:15-18).

Ньһерʹандьна нәрʹаст дәрһәԛа Щәжьна Дәрбазбуне

Ньһерʹандьна нәрʹаст: Мәсиһ гәрәке Щәжьна Дәрбазбуне дәрбаз кьн.

Избати: Паши ԝе йәке кӧ ча Иса 14 Нисане сала 33 Д.М. Щәжьна Дәрбазбуне дәрбаз кьр, әԝи щәжьнәкә тʹәзә дәстур кьр, демәк Шива Хӧдан (Луԛа 22:19, 20; 1 Корьнтʹи 11:20). Әԝ шив дәԝса Щәжьна Дәрбазбуне бу, чьмки әԝ тинә бира мә ԝәки «бәрхе мәйи Щәжьна Дәрбазбуне, аԝа готи Мәсиһ» ә (1 Корьнтʹи 5:7). Ԛӧрбанбуна Иса жь ԛӧрбанбуна Щәжьна Дәрбазбуне мәзьнтьр ә, чьмки әв инсанәте жь гӧнә у мьрьне аза дькә (Мәтта 20:28; Ибрани 9:15).