«Әз мәкʹтәбе нәфрʹәт дькьм». Дьбәкә тӧ жи ӧса дьфькьри у дьхԝази жь мәкʹтәбе дәрейи. Ве готареда һьнә ширәтед баш һатьнә дайине кӧ ве дәрәщеда чь бьки.

•  Чьрʹа һьнә щаһьл дьхԝазьн мәкʹтәбе бьһельн

•  Ахьрийа сафикьрьна тә

•  Сафикьрьна рʹаст

•  Һьнә щаһьл чь дьбежьн

Вьра чәнд мәʹни һатьнә дайине кӧ чьрʹа һьнә щаһьл дьхԝазьн мәкʹтәбе бьһельн:

• Чәтьнайед һинбунева гьредайи: «Нишанед дәрсед мьн дьһа хьраб дьбьн».

• Бетʹалаши: «Йәкә кʹара һинбуне тʹӧнә».

• Чәтьнайед материали: «Әз гәрәке бьхәбьтьм ԝәки али малбәте бькьм».

Кʹьтеба Пироз дьбежә: «Йе аԛьл дина хԝә дьдә гавед хԝә» (Мәтʹәлок 14:15). Әм чь дькарьн жь ве йәке һин бьн? Һәрге тӧ дьхԝази мәкʹтәбе бьһели, ԝе баш бә бьфькьри кӧ әв йәк ԝе чь ахьри пәй хԝә бинә.

Хԝә бьпьрсә:

• «Һәрге әз мәкʹтәбе бьһельм, ахьрийеда әзе бькарьбьм һеса хәбатәкә баш хԝәрʹа бьвиньм?»

  «Бьфькьрә, кӧ рʹожәке тӧйе бьхԝази хәбате хԝәрʹа бьвини, кӧ әʹбура малбәта хԝә бьки. Гәләк мәзьне хәбате дьхԝазьн кӧ щәм ԝан мәрьвед хԝәнди бьхәбьтьн. Ле тӧйе ча бькарьби хәбате бьвини һәрге хԝәндьна тә тʹӧнә бә?» (Щулйа).

• «Һәрге әз мәкʹтәбе бьһельм, гәло ахьрийеда әзе бькарьбьм һеса чәтьнайа сафи кьм?»

  «Мәкʹтәб тә бона жийина ахьрийе һазьр дькә. Ахьрийеда, һәләԛәтийа тә тʹәви мәрьва, щерʹьбандьнед тә у хәбата кӧ тӧ бьки, ԝе мина дәрәщед мәкʹтәбе бьн» (Данийел).

• «Һәрге әз мәкʹтәбе бьһельм, ахьрийеда фәрәсәтед мьнә ӧса ԝе һәбьн, кʹижан кӧ ԝе мьнрʹа лазьм бьн»?

  «Дьбә кӧ тәрʹа һинбуна мәкʹтәбеда бекер те кʹьфше, ле чахе тӧ 23 сали би у гәрәке пʹәра рʹаст хәрщ ки, ԝи чахи тӧйе ша би кӧ мәкʹтәбеда математикайе рʹьнд һин дьбуйи» (Анна).

• Аликʹарийе бьхԝазә. Кʹьтеба Пироз дьбежә: «Бь к’ома шеԝьркьра» мәрьв пешда дьчә (Мәтʹәлок 11:14). Һәрге нишанед тә ньмьз дьбьн, жь де-баве хԝә, дәрсдар йан жи мәрьвәки дьн, аликʹарийе бьхԝазә кӧ дьһа рʹьнд һин би.

  «Һәрге һинбун тәрʹа чәтьн ә, ԝе баш бә тʹәви дәрсдаре хԝә хәбәр ди. Щарна дьбә кӧ тӧ дьфькьри, ԝәки чәтьнайед тәда дәрсдар ә нәһәԛ. Ле те бькарьби дәрәще рʹаст ки, һәрге дәрсдаррʹа хәбәр ди» (Едԝард).

• Дәрәще бь тʹәмами бьдә бәр чʹәʹве хԝә. Кʹьтеба Пироз дьбежә: «Даԝийа тьштәки жь дәстпека ԝе ԛәнщтьр ә» (Ԝаиз 7:8). Чахе тӧ мәкʹтәбе хьлаз ки, ԝе хәйсәт-һʹӧнӧр у фәрәсәтед тәйә ӧса һәбьн, кʹижан кӧ жийина тәда ԝе кери тә бен.

  «Паши мәкʹтәбе дьбә кӧ дәрс у екзаминед тә ида тʹӧнә бьн, ле әв йәк кӧ тә мәкʹтәбеда әԝ чәтьнайи дәрбаз дькьр, ԝе али тә бькә кӧ жийина хԝәда һеса бәр чәтьнайа тәйах ки у нәкʹәви стресе» (Вера).

• Сафикьрьнед хԝә әʹнәнә кә. Кʹьтеба Пироз дьбежә: «Һәр кәсе ләз к’әти ә’сә зьраре тинә» (Мәтʹәлок 21:5). Ләз нәкʹәвә у нәфькьрә, ԝәки мәщаләкә тәйә дьн тʹӧнә у гәрәке мәкʹтәбе бьһели. Тӧ дькари бь онлайне йан жи малда тʹәви дәрсдар, һинбуна хԝә бәрдәԝам ки.

  «Мәкʹтәб тә һин дькә хәбатһʹьз би, проблема сафи ки, у шьхӧлкʹарийе тʹәви мәрьва бьки. Кʹара һинбуне ԝе бадиһәва нибә. Ләма жи һежа йә мәкʹтәбе нәһели» (Бенжамин).

Фькьра сәрәкә: Мәкʹтәбе хьлаз кә, чьмки ӧса тӧйе дьһа рʹьнд һазьр би, кӧ ахьрийеда щабдарийа һьлди сәр хԝә.