Lyuk 24:1-53
24 Bɔt di fɔs de insay di wik, dɛn go ali mɔnin na di grev,* ɛn dɛn kɛr di spays* dɛn we dɛn bin dɔn mek.
2 Bɔt dɛn mit dɛn dɔn pul di ston na di grev* in domɔt,
3 ɛn we dɛn go insay, dɛn nɔ si Masta Jizɔs in bɔdi.
4 So dɛn kɔnfyuz. Dɛn de pan dis, na in tu man dɛn we wɛr klos we de shayn apia to dɛn.
5 Di uman dɛn fred ɛn butu dɛn ed. So di man dɛn aks dɛn se: “Wetin mek una de luk fɔ pɔsin we gɛt layf, usay dayman dɛn de?
6 I nɔ de ya, i dɔn gɛt layf bak. Una mɛmba wetin i bin tɛl una we i bin de na Galili.
7 I bin se dɛn go an ova mɔtalman Pikin to pipul dɛn we de sin, ɛn dɛn go nel am pan tik, bɔt i go gɛt layf bak di tɔd de.”
8 So dɛn mɛmba wetin i bin se,
9 ɛn dɛn kɔmɔt na di grev* ɛn go tɛl di 11 apɔsul dɛn ɛn ɔl di ɔda disaypul dɛn bɔt wetin apin.
10 Di uman dɛn na bin Meri Magdalin, Joana, ɛn Meri we na Jems in mama. Dɔn di ɔda uman dɛn we bin de wit dɛn bin de tɛl di apɔsul dɛn bɔt wetin apin.
11 Bɔt i bin tan lɛk se na nɔnsɛns di uman dɛn de tɔk, ɛn dɛn nɔ biliv dɛn.
12 Bɔt Pita grap ɛn rɔn go na di grev.* We i rich de, i butu fɔ luk insay, bɔt na di linin nɔmɔ i si. So i bin de go ɛn wɔnda wetin dɔn apin.
13 Da sem de de, tu disaypul dɛn bin de go na wan vilej we nem Ɛmeɔs. Dis vilej bin de lɛk sɛvin mayl* so frɔm Jerusɛlɛm.
14 Dɛn bin de go ɛn tɔk bɔt ɔl di tin dɛn we dɔn apin.
15 We dɛn bin de tɔk bɔt dɛn tin ya, Jizɔs kam nia dɛn ɛn bigin fɔ waka wit dɛn,
16 bɔt i bin tan lɛk se dɛn yay lɔk, so dɛn nɔ ebul no se na in.
17 I aks dɛn se: “Wetin una de go ɛn tɔk bɔt?” Nain dɛn tinap dɛn pwɛlat wan.
18 Na de di wan we nem Kliopas aks am se: “Fɔ se yu na strenja na Jerusɛlɛm, we de usay nɔbɔdi nɔ de we mek yu nɔ no* di tin dɛn we jɔs apin?”
19 I aks dɛn se: “Us tin dɛn?” Dɛn tɛl am se: “Di tin dɛn we apin to Jizɔs di Nazarin, we sho se in na pawaful prɔfɛt bifo Gɔd ɛn ɔl di pipul dɛn bay di tin dɛn we i du ɛn se;
20 ɛn aw wi edman dɛn fɔ di prist dɛn ɛn rula dɛn an ova am fɔ mek dɛn kil am, ɛn dɛn nel am pan tik.
21 Bɔt wi bin de op se na dis man go sev Izrɛl. Apat frɔm dat, na di tɔd de dis frɔm we dɛn tin ya apin.
22 Pantap dat, sɔm uman dɛn we de wit wi mek wi sɔprayz. Dɛn go ali mɔnin na di grev,*
23 bɔt we dɛn nɔ si in bɔdi, dɛn kam tɛl wi se wɔndaful tin apin, dɛn si enjɛl dɛn we se i dɔn gɛt layf bak.
24 Na de sɔm pipul dɛn we de wit wi go na di grev,* ɛn na wetin di uman dɛn se, na in dɛn si, bɔt dɛn nɔ si Jizɔs.”
25 So i tɛl dɛn se: “E una we nɔ gɛt sɛns ɛn we at fɔ biliv ɔl wetin di prɔfɛt dɛn bin dɔn tɔk!
26 Una nɔ tink se di Krays bin nid fɔ sɔfa dis kayn we ɛn gɛt glori?”
27 Dɔn i ɛksplen to dɛn ɔl di tin dɛn we di Skripchɔ dɛn tɔk bɔt am. I bigin frɔm Mozis ɛn ɔl di Prɔfɛt dɛn.
28 We dɛn rich nia di vilej usay dɛn de go, i mek lɛk se i de go bifo.
29 Bɔt dɛn beg am mek i nɔ go. Dɛn tɛl am se: “De wit wi, bikɔs na ivintɛm de kam so, ɛn di ples go dak jisnɔ.” So i go insay wit dɛn.
30 We i de it* wit dɛn, i tek di bred ɛn pre pan am. Dɔn i brok am ɛn gi am to dɛn.
31 Na de dɛn yay rili opin, ɛn dɛn kam no se na in; bɔt i lɔs pan dɛn.
32 So dɛn aks dɛnsɛf se: “Di we aw i bin de tɔk to wi na rod ɛn ɛksplen di Skripchɔ dɛn klia wan bin rili tɔch wi at, nɔto so?”
33 Dɛn grap da sem tɛm de ɛn go bak na Jerusɛlɛm, ɛn dɛn go mit di 11 apɔsul dɛn ɛn di wan dɛn we dɛn ɔl bin gɛda togɛda.
34 Di 11 apɔsul dɛn ɛn di wan dɛn we dɛn ɔl gɛda togɛda tɛl dɛn se: “Fɔ tru, di Masta dɔn gɛt layf bak, ɛn i apia to Saymɔn!”
35 Dɔn dɛn tɛl dɛn bɔt wetin bin apin na rod ɛn aw dɛn no se na in we i brok di bred.
36 We dɛn de tɔk bɔt dɛn tin ya, nain Jizɔs tinap midul dɛn ɛn tɛl dɛn se: “Mek una gɛt pis.”
37 Bɔt dɛn bin so skyad ɛn fred dat dɛn imajin se na spirit dɛn de si.
38 So i aks dɛn se: “Wetin mek una de fred ɛn wetin mek una gɛt dawt na una at?
39 Una luk mi an ɛn mi fut, fɔ lɛ una no se na mi; una tɔch mi ɛn si, bikɔs spirit nɔ gɛt bɔdi ɛn bon lɛk aw una si se a gɛt.”
40 As i de tɔk dis, i sho dɛn in an ɛn in fut.
41 Bikɔs dɛn bin rili gladi ɛn de wɔnda, dɛn nɔ stil biliv, so i aks dɛn se: “Una gɛt sɔntin na ya fɔ it?”
42 So dɛn gi am wan ros fish;
43 i tek am ɛn it am bifo dɛn.
44 Dɔn i tɛl dɛn se: “We a bin de wit una, a bin tɛl una se ɔl wetin dɛn rayt bɔt mi na Mozis in Lɔ ɛn di Prɔfɛt dɛn ɛn na di Sam dɛn go apin.”
45 Dɔn i ɛp dɛn fɔ rili ɔndastand wetin di Skripchɔ dɛn min,
46 ɛn i tɛl dɛn se, “Dɛn bin rayt se: di Krays go sɔfa ɛn gɛt layf bak di tɔd de,
47 ɛn bikɔs ɔf in nem, dɛn go bigin na Jerusɛlɛm ɛn go na ɔl di neshɔn dɛn fɔ prich se pipul dɛn fɔ ripɛnt so dat Gɔd go fɔgiv dɛn sin dɛn.
48 Una tɔk bɔt dɛn tin ya.
49 A de sɛn fɔ una wetin mi Papa prɔmis. Bɔt una de na di siti te pawa kɔmɔt ɔp ɛn kam pan una.”
50 Dɔn i go wit dɛn te rich Bɛtani, ɛn i es in an ɔp ɛn blɛs dɛn.
51 As i de blɛs dɛn, na de Gɔd tek am go ɔp na ɛvin.
52 Dɛn sho am rɛspɛkt,* ɛn dɛn bin rili gladi we dɛn de go bak na Jerusɛlɛm.
53 Dɛn bin de na di tɛmpul ɔltɛm de prez Gɔd.
Futnot
^ Ɔ “di grev we Gɔd de mɛmba.”
^ Dis na pawda ɔ lif dɛn, ɛn ɔyl dɛn we dɛn kin yuz fɔ pripia dedebɔdi fɔ bɛr am.
^ Ɔ “di grev we Gɔd de mɛmba.”
^ Ɔ “di grev we Gɔd de mɛmba.”
^ Ɔ “di grev we Gɔd de mɛmba.”
^ Lɛk 11 kilomita so. Insay Grik, “60 stedia.” Wan stediɔm ikwal to 185 mita (606.95 fit).
^ Ɔ i kin bi, “Fɔ se na yu nɔmɔ kam na Jerusɛlɛm we nɔ no?”
^ Ɔ “di grev we Gɔd de mɛmba.”
^ Ɔ “di grev we Gɔd de mɛmba.”
^ Ɔ “i ling nia di tebul.”
^ Ɔ “butu bifo am.”
