TIDE, bɔku prɔblɛm dɛn de na di wɔl. Pipul dɛn de fɛt wɔ, dɛn ebi ren ɛn big briz kin kil pipul dɛn ɛn pwɛl dɛn prɔpati dɛn, pipul dɛn de sik, bɔku pipul dɛn po, bɔku pipul dɛn kɔrɔpt, ɛn ɔda bad tin dɛn de apin we kin ambɔg bɔku pipul dɛn. Yusɛf go mɔs gɛt tin dɛn we go de mek yu wɔri ɛnide. Udat go ebul fɔ ɛp wi? Yu tink se ɛnibɔdi de we bisin bɔt wi?

Yɛs, wi biliv se Gɔd rili bisin bɔt wi. Gɔd in Wɔd tɔk se: “Kombra go fɔgɛt in pikin we de sɔk bɔbi, we i nɔ go sɔri fɔ di bɔypikin we kɔmɔt nain bɛlɛ? Dɛn sɛf kin fɔgɛt, bɔt mi, nɔ go fɔgɛt yu.” *

We yu dɔn no dis, dat nɔ ɛnkɔrej yu? Mama dɛn rili lɛk dɛn pikin dɛn. Bɔt Gɔd lɛk wi pas di we aw kombra lɛk in pikin. Gɔd nɔ go ɛva lɛf wi! Fɔ tru, Gɔd dɔn ɛp wi di bɛst we. Aw i du dat? Gɔd dɔn sho wi di men tin we wi fɔ gɛt we go mek wi rili gladi; dis men tin na rial fet.

We yu gɛt tru tru fet dat go mek yu gladi. Dis kayn fet go mek yu avɔyd bɔku prɔblɛm dɛn ɛn i go ɛp yu fɔ sɔlv sɔm prɔblɛm dɛn we yu nɔ go ebul fɔ avɔyd. I go mek bak yu kam nia Gɔd, ɛn i go gi yu kol at. Rial fet go mek yu gɛt layf we go de sote go tumara bambay na Paradays!

Wetin na rial fet? Aw wi go gɛt da kayn fet de?