YU SI ɛni we aw yu tan lɛk dɛn prɔfɛt dɛn we bin de trade? Insay di New World Translation we dɛn pul insay 2013, di “Glossary of Bible Terms” (Baybul Wɔd dɛn Minin), gi dis minin fɔ prɔfɛt. I se: “Prɔfɛt na pɔsin we Gɔd de yuz fɔ mek pipul dɛn no wetin i want. Prɔfɛt kin tɔk fɔ Gɔd, i nɔ kin jɔs de tɔk bɔt wetin gɛt fɔ apin, bɔt i kin tich bak bɔt Jiova, in lɔ dɛn, ɛn in jɔjmɛnt mɛsej dɛn.” Pan ɔl we yu nɔ de tɔk bɔt wetin gɛt fɔ apin, yu de tɔk bɔt Gɔd ɛn wetin de insay in Wɔd.—Mat. 24:​14.

Na big big ɔnɔ wi gɛt fɔ tɛl pipul dɛn bɔt wi Gɔd, Jiova, ɛn fɔ tich dɛn bɔt wetin Gɔd want fɔ mɔtalman! Wi de jɔyn an fɔ du dis wok wit di “enjɛl [we] de flay ɔp ɔp.” (Rɛv. 14:​6) Sɔntɛnde, wi kin gɛt prɔblɛm dɛn we kin mek wi fɔgɛt bɔt di big big ɔnɔ we wi gɛt. Wetin na sɔm pan dɛn prɔblɛm ya? Wi kin taya, wi at kin pwɛl, ɔ wi kin fil se wi nɔ impɔtant. Di fetful prɔfɛt dɛn we bin de trade dɛnsɛf bin de gɛt dɛn sem kayn prɔblɛm ya, bɔt dat nɔ bin mek dɛn lɛf fɔ du wetin Gɔd want. Ɛn Jiova bin de ɛp dɛn fɔ mek dɛn ebul fɔ du di wok we i gi dɛn. Lɛ wi tɔk bɔt sɔm ɛgzampul dɛn, ɛn si aw wi go falamakata dɛn.

Sɔntɛnde di tin dɛn we wi kin du ɛvride kin mek wi taya ɛn wi kin fil lɛk se wi nɔ go ebul fɔ go prich. I kin fayn fɔ mek wi rɛst sɔntɛnde, ivin Jizɔs ɛn in apɔsul dɛn bin du dat. (Mak 6:​31) Bɔt tink bɔt Izikɛl we i bin de na Babilɔn ɛn di wok we i bin de du we i bin de wit di Izrɛlayt dɛn we dɛn pul kɔmɔt na Jɛrusɛlɛm. Gɔd bin tɛl Izikɛl fɔ tek wan kle blɔk we dɛn kin yuz fɔ bil os ɛn drɔ Jerusɛlɛm pan  am. Dɔn Izikɛl fɔ mek lɛk se i de atak di siti we i bin dɔn drɔ na di kle blɔk. Aw i go du dis? Na bay we i go ledɔm na in lɛft sayd fɔ 390 dez ɛn ledɔm na in rayt sayd fɔ 40 dez. Jiova bin tɛl Izikɛl se: “A go tay yu wit rop dɛn, so dat yu nɔ go ebul fɔ tɔn frɔm wan say to di ɔda, tete yu dɔn dɔn di nɔmba ɔf de dɛn pan yu blɔked we yu mek.” (Izi. 4:​1-8) Dis go dɔn mek di Izrɛlayt dɛn we bin de na Babilɔn want fɔ no mɔ. I bin pas wan ia we Izikɛl fɔ du dis, ɛn dis nɔ bin rili izi fɔ am. Aw Izikɛl go du wetin Gɔd want am fɔ du?

Izikɛl bin ɔndastand wetin mek Jiova bin sɛn am as prɔfɛt. We Gɔd bin de sɛn Izikɛl, i tɛl am se: “Wɛda [di Izrɛlayt] dɛn yɛri ɔ dɛn nɔ gri fɔ lisin . . . , dɛn go stil no se wan man we na prɔfɛt bin tap wit dɛm.” (Izi. 2:​5) I bin de tink bɔt di rizin we mek Jiova bin gi am dis wok. So i bin rili du wetin Jiova bin tɛl am fɔ du. I sho se in na rial prɔfɛt. Dɛn bin sɛn mɛsej to Izikɛl ɛn di Izrɛlayt dɛn we dɛn bin pul kɔmɔt na Jerusɛlɛm se: “Di big siti dɔn fɔdɔm”! So na da tɛm de di Izrɛlayt dɛn kam fɔ no se prɔfɛt bin de wit dɛn.—Izi. 33:​21, 33.

Tide, wi kin wɔn pipul dɛn bɔt di big trɔbul we gɛt fɔ kam dɔnawe wit di wɔl we Setan de kɔntrol. Pan ɔl we wi kin taya, wi kin stil yuz wi trɛnk fɔ prich bɔt Gɔd in Wɔd, mek ritɔn visit, ɛn stɔdi di Baybul wit pipul dɛn we want fɔ no mɔ. As di tin dɛn we di Baybul bin dɔn tɔk bɔt de apin tide, wi kin gladi fɔ no se wi na “pɔsin we Gɔd de yuz fɔ mek pipul dɛn no wetin i want.”

Jiova in spirit de ɛp wi fɔ du ɔl wetin wi ebul, bɔt sɔntɛnde wi at kin pwɛl bikɔs nɔto ɔlman kin gladi fɔ di mɛsej we wi kin prich. Bɔt i go fayn fɔ mek wi mɛmba di prɔfɛt Jɛrimaya in ɛgzampul. Di Izrɛlayt dɛn bin de laf am ɛn provok am bikɔs i bin de tɔk bɔt Gɔd in mɛsej to dɛn. Wan de, Jɛrimaya bin ivin tɔk se: “A nɔ go tɔk bɔt am, ɔ . . .  tɔk bɔt in nem igen.” Jɛrimaya na bin mɔtalman lɛk wisɛf. Bɔt pan ɔl dis, i bin stil tɔk bɔt Gɔd. Wetin mek? Di prɔfɛt insɛf bin se: “Sɔntin de insay mi at, we tan lɛk faya insay mi bon dɛm, ɛn a taya fɔ ol am insay, ɛn a nɔ ebul kip am igen.”—Jɛr. 20:​7-9.

Semweso, if wi at pwɛl bikɔs pipul dɛn nɔ de lisin to wetin wi de prich, wi fɔ tink gud wan bɔt di mɛsej we wi de prich so dat wi go kɔntinyu fɔ du wetin Gɔd want. I kin tan lɛk se na ‘faya de insay wi bon dɛn.’ So i go fayn fɔ lɛ wi mek am abit fɔ de rid di Baybul ɛvride so dat di faya go de bɔn insay wi.

Sɔm Kristian dɛn kin wɔri we dɛn gi dɛn wok we dɛn nɔ sabi fɔ du ɔ we dɛn nɔ no di rizin we mek dɛn gi dɛn da wok de. I go mɔs bi se di prɔfɛt Ozie insɛf bin fil da kayn we de. Jiova bin tɛl am fɔ “go fɛn wan rare gyal, mared am ɛn bɔn pikin wit am.” (Ozi 1:​2) Imajin aw yu go fil if yu want fɔ mared, dɔn Gɔd tɛl yu se yu fɔ go mared to wan rare gyal! Ozie bin du wetin Gɔd tɛl am fɔ du. I tek Goma as in wɛf ɛn bɔn bɔy pikin wit am. Afta sɔm tɛm, Goma bɔn gyal pikin ɛn bɔy pikin bak. I go mɔs bi se Goma bin bɔn dɛn tu las pikin ya wit ɔda man dɛn. Jiova bin tɛl Ozie se in wɛf we i gɛt fɔ mared go “rɔnata in man dɛn.” So dis sho se nɔto jɔs wan man i bin gɛt. Ɛn afta sɔm tɛm, Goma go tray fɔ kam bak to Ozie. Naw, if yu na bin Ozie, yu bin fɔ tek Goma bak as yu wɛf? Na dis Jiova bin tɛl Ozie fɔ du! Di prɔfɛt bin ivin gi bɔku mɔni fɔ gɛt Goma bak.—Ozi 2:​7; 3:​1-5.

Ozie go mɔs dɔn de tink bɔt us bɛnifit i go gɛt if i du wetin Jiova tɛl am fɔ du. Ozie in ɛgzampul ɛp wi fɔ no aw Jiova bin fil bɔt wetin di Izrɛlayt dɛn bin du. Ɛn sɔm Izrɛlayt dɛn we bin rili lɛk Gɔd bin bigin fɔ wɔship Gɔd bak.

Tide Gɔd nɔ de tɛl ɛnibɔdi fɔ “go fɛn wan rare gyal” ɛn “mared am.” Bɔt ɛni lɛsin de we wi kin lan frɔm di rɛdi we Ozie bin rɛdi fɔ du wetin Gɔd bin tɛl am? Wan lɛsin we wi kin lan na fɔ mek wisɛf rɛdi fɔ du wetin Jiova want, ivin if wi si am se i nɔ izi fɔ prich di gud nyus bɔt Gɔd in Kiŋdɔm na “ples we ɔlman kin gɛda” ɔ na pipul dɛn “os” dɛn.  (Di Apɔsul Dɛn Wok [Akt] 20:​20) Sɔntɛm sɔm we dɛn we wi kin prich nɔ izi fɔ yu. Bɔku pipul dɛn we de stɔdi di Baybul wit Jiova Witnɛs dɛn kin se dɛn de ɛnjɔy fɔ stɔdi di Baybul bɔt dɛn nɔ go ɛva prich frɔm os to os fɔ lɛ ɔlman gɛt di mɛsej. Bɔt leta plɛnti pan dɛn kin bigin fɔ du di tin we dɛn bin tink se dɛn nɔ go ɛva ebul fɔ du. Yu si ɛni lɛsin we wi kin lan?

Wan ɔda lɛsin de we wi kin lan frɔm Ozie. I bin rɛdi fɔ du di wok we Jiova gi am pan ɔl we i nɔ bin izi fɔ am. Ozie bin gɛt bɔku rizin fɔ mek i nɔ tek Goma as in wɛf. Udat bin fɔ no bɔt wetin Jiova bin tɛl Ozie fɔ du if i nɔ bin rayt am? Sɔm tin dɛn kin apin na wi layf we kin gi wi di chans fɔ tɛl sɔmbɔdi bɔt Jiova ɛn nɔbɔdi nɔ go no bɔt da chans de we wi bin gɛt. Dis bin apin wit Ana, we bin de sɛkɔndari skul na Amɛrika. In ticha bin tɛl dɛn ɔl na di klas fɔ rayt bɔt ɛnitin we dɛn biliv tranga wan ɛn dɛn fɔ tray fɔ mek dɛn kɔmpin dɛn na klas biliv wetin dɛn rayt. If Ana bin want, i nɔ bin fɔ yuz dis chans fɔ tɔk bɔt Jiova. Bɔt i si am se dis na chans Gɔd dɔn gi am. Bikɔs i bin no aw in kɔmpin dɛn go biev, i pre to Jiova, ɛn Jiova ɛp am fɔ mek i ebul fɔ tɔk bifo in kɔmpin dɛn. Di tin we Ana bin rayt bin gɛt di taytul “Tin dɛn we De Sho se Ɔltin Nɔ Jɔs Kam Bay Chans.”

We Ana bin de tɛl di klas bɔt wetin i rayt, wan titi we biliv se ɔltin jɔs kam bay chans bin aks bɔku kwɛstyɔn fɔ sho se Ana rɔng. Ana bin ebul fɔ ansa in kwɛstyɔn dɛn fayn fayn wan bay we i ɛksplen wetin in biliv. Ana in ticha bin gladi ɛn gi am prayz bikɔs in kɔmpin dɛn bin biliv wetin i rayt. Frɔm da tɛm de, Ana kɔntinyu fɔ tɔk mɔ bɔt di tin dɛn we Gɔd mek, to dis titi we bin de aks am bɔku kwɛstyɔn. Bikɔs Ana bin du wetin Jiova tɛl am, i se: “Naw a gɛt maynd fɔ prich, ɛn a nɔ de fred sɛf.”

Pan ɔl we wi nɔto prɔfɛt dɛn lɛk di prɔfɛt dɛn we bin de trade, we wi falamakata di fayn we we Izikɛl, Jɛrimaya, ɛn Ozie bin rɛdi fɔ du ɛnitin we Jiova tɛl dɛn, wisɛf go ebul fɔ du wetin Jiova want wi fɔ du tide! Insay yu famili wɔship ɔ we yu wangren de stɔdi, yu nɔ tink se i go fayn mek yu rid bɔt ɔda prɔfɛt dɛn we bin dɔn de trade trade ɛn tink gud wan bɔt aw yu go falamakata dɛn ɛgzampul?