WETIN MEK SƆM PIPUL DƐN DE DAWT? Sayɛnsman dɛn we jɔs dɔn stɔdi bɔt di galaksi dɛn dɔn kam fɔ no se, wi yon galaksi nɔmɔ gɛt lɛk 100 bilyɔn planɛt dɛn so. Bikɔs di planɛt dɛn so bɔku, plɛnti pipul dɛn kin aks se, ‘Wetin mek Papa Gɔd we gɛt pawa pas ɔlman go de wach wetin wi, ɔdinari mɔtalman de du insay dis smɔl planɛt?’

WETIN GƆD IN WƆD SE? Gɔd nɔ jɔs gi wi di Baybul ɛn lɛf fɔ bisin bɔt wi. Bifo dat, Jiova prɔmis wi se, ‘I go tich wi ɛn tɛl wi wetin fɔ du, ɛn in yay go fala wi ɛnisay we wi go.’—Sam 32:8.

Lɛ wi tɔk smɔl bɔt wan Ijipshian uman we nem Ega, we bin liv lɛk 1,900 ia bifo Krays. Ega nɔ bin de rɛspɛkt in misis, Seray, so Seray bigin trit am bad ɛn dis bin mek Ega rɔnawe go na wan say usay pɔsin nɔ go ebul fɔ liv. We Ega mek dis mistek, Gɔd bin lɛf fɔ bisin bɔt am? Di Baybul se: “PAPA GƆD in enjɛl mit am.” Di enjɛl tɛl Ega se: “PAPA GƆD dɔn si yu waala.” We di enjɛl dɔn tɔk dɔn, Ega tɔk se Jiova na “GƆD We De Si.”—Jɛnɛsis 16:4-13.

“PAPA GƆD We De Si,” de si wetin de apin to yusɛf. Fɔ ɛgzampul, mama we lɛk in pikin kin pe atɛnshɔn to am mɔ di tɛm we i smɔl, bikɔs di tɛm we pikin smɔl na in mɔ i nid in mama ɛn papa dɛn atɛnshɔn. Semweso, Gɔd kin pe atɛnshɔn to wi mɔ di tɛm we wi at pwɛl ɛn we wi nɔ kin gɛt ɛnibɔdi fɔ ɛp wi. Jiova se: “A tap na di ay ɛn oli ples, wit di wan we . . . gɛt sɔri ɛn ɔmbul spirit, fɔ gi layf bak to di ɔmbul pɔsin in spirit, ɛn fɔ gi layf bak to di sɔri pɔsin in at.”—Ayzaya 57:15.

Bɔt stil, yu go de wɔnda: ‘Aw Gɔd de si mi? I de jɔj mi bay aw i de si mi ɔ i de rili luk insay mi at ɛn tray fɔ ɔndastand mi?’