Sɔntɛm di tin we mek wi difrɛn frɔm ɔda rilijɔn dɛn na wi prichin wok. Wi kin prich frɔm os to os, say dɛn we pipul dɛn bɔku, ɛn ɛni ɔda say dɛn we pipul dɛn de. Wetin mek wi kin prich?

Jiova Witnɛs dɛn kin prich fɔ prez Gɔd ɛn fɔ mek ɔlman no in nem.(Di Ibru Pipul Dɛn 13:15) Wi want bak fɔ obe Jizɔs. Jizɔs bin tɛl wi se: “Una go ɛn mek pipul dɛn bi mi disaypul dɛn na ɔl di neshɔn dɛn, . . . una tich dɛn fɔ du ɔl di tin dɛn we a dɔn tɛl una.”—Matyu 28:19, 20.

Apat frɔm dat, wi de prich bikɔs wi lɛk wi kɔmpin mɔtalman. (Matyu 22:39) Wi no se bɔku pan di pipul dɛn we wi de prich to gɛt dɛn yon rilijɔn ɛn wi nɔ bak se nɔto ɔlman want fɔ yɛri wi mɛsej. Bɔt stil, wi no se di advays dɛn na di Baybul go sev pipul dɛn layf. Na dat mek wi de kɔntinyu, ɛn wi nɔ de “taya fɔ tich ɛn prich di gud nyus bɔt Krays, Jizɔs,” jɔs lɛk aw di Kristian dɛn we bin de trade trade bin de du.—Di Apɔsul Dɛn Wok [Akt] 5:41, 42.

Bɔku pan di pipul dɛn we de rid we buk ɛn magazin dɛn nɔto Jiova Witnɛs dɛn. Ɛn bɔku pan di pipul dɛn we de stɔdi di Baybul wit wi de na ɔda rilijɔn dɛn. Bɔt stil dɛn pipul ya gladi we Jiova Witnɛs dɛn de ɛp dɛn wit di Baybul.

Na tru se yu go gɛt ɔda kwɛstyɔn dɛn bɔt Jiova Witnɛs dɛn. Fɔ gɛt ansa to yu kwɛstyɔn dɛn wi de invayt yu fɔ

• Aks wan pan Jiova Witnɛs dɛn.

• Go na wi Wɛbsayt we na, www.ps8318.com.

• Go na wi mitin dɛn. Wi mitin dɛn na fri ɛn ɔlman wɛlkɔm.