ဒ်သိးပကနၢ်ပၢၢ် လံာ်စီဆှံအဂီၢ် ပကဘၣ်မၤဒ်လဲၣ်န့ၣ် လံာ်စီဆှံပာ်ဖျါထီၣ်န့ၢ်ပှၤ တၢ်ဟ့ၣ်ကူၣ်အါမး. သုတၢ်အိၣ်သးမ့ၢ်အိၣ် ဒ်လဲၣ်ဂ့ၤဒ်လဲၣ်ဂ့ၤ ကစၢ်ယွၤကလုၢ်ကထါန့ၣ်အ “တကီတလၢ လၢသုဂီၢ်ဘၣ် ဒီးတအိၣ်ယံၤတလၢ” ဒီးသုဘၣ်.—၅ မိၤၡ့ ၃၀:၁၁.

ပကနၢ်ပၢၢ်လံာ်စီဆှံအဂီၢ် ပကဘၣ်မၤဒ်လဲၣ်

1.  ၁. အိၣ်ဒီးတၢ်ပာ်သူၣ်ပာ်သး လၢအဂ့ၤ. နာ်လၢလံာ်စီဆှံမ့ၢ် ကစၢ်ယွၤကလုၢ်ကထါ. မ့ၢ်လၢကစၢ်ယွၤသးဟ့ ပှၤပာ်ထီၣ်ထီသးအဃိ ပကဘၣ်အိၣ်ဒီး တၢ်ဆီၣ်လီၤသး. (၁ သ့းစၤလနံ ၂:၁၃; ယၤကိာ် ၄:၆) ဒီးတၢ်လၢသုဖး ဒီးနၢ်ဟူဘၣ်တဖၣ် မ့ၢ်တအိၣ်ဒီး တၢ်အုၣ်အသးဘၣ်န့ၣ် တဘၣ်နာ်ကြီအီၤတဂ့ၤ. ကစၢ်ယွၤအဲၣ်ဒိးလၢ သုက “သူသုတၢ်သ့တၢ်ဘၣ်လၢ သုကပဲာ်ထံနီၤဖးတၢ်.”—ရိမ့ၤ ၁၂:၁, ၂.

2.  ၂. ဃ့ထုကဖၣ်လၢနကအိၣ်ဒီး တၢ်ကူၣ်သ့အဂီၢ်. ကတိၤဒိ ၃:၅ တဲဝဲလၢ “တဘၣ် သန့ၤနသးလၢ နနီၢ်ကစၢ် အတၢ်နၢ်ပၢၢ်တဂ့ၤ.” ဒီး “ဆဲးဃ့တၢ်လၢ ကစၢ်ယွၤအအိၣ်” ဒ်သိးနကနၢ်ပၢၢ်လံာ်စီဆှံအဂီၢ်.—ယၤကိာ် ၁:၅.

3.  ၃. မၤလိလံာ်စီဆှံထီဘိ. နမ့ၢ်မၤလိလံာ်စီဆှံထီဘိန့ၣ် ကကဲဘျုးလၢနဂီၢ်ဒိၣ်မး. ဒီးတဘၣ်မၤလိလံာ်စီဆှံလၢ နအဲၣ်ဒိးမၤလိအခါမၣ် တဂ့ၤ.—ယိၤၡူ ၁:၈.

4.  ၄. ဃုသ့ၣ်ညါတၢ်ဂ့ၢ် တခါဝံၤတခါ. နမ့ၢ်ဃုသ့ၣ်ညါတၢ်ဂ့ၢ် တခါဝံၤတခါန့ၣ် နကသ့ၣ်ညါထီၣ် လံာ်စီဆှံမူာ်မူာ်နီၢ်နီၢ်. စးထီၣ်ဃုသ့ၣ်ညါအီၤလၢ “တၢ်သိၣ်လိ အခီၣ်ထံးခီၣ်ဘိ” ဒီး “လဲၤဆူညါတုၤလၢ တၢ်ဒိၣ်တုာ်ခိၣ်ပှဲၤ” ခီဖျိဃုသ့ၣ်ညါ တၢ်ဂ့ၢ်လၢအဒိၣ်အယိာ်. (ဧ့ၤဘြံၤ ၆:၁, ၂) ထိၣ်သတြီၤကွၢ်လံာ်စီဆှံ တဆၢဒီးတဆၢ. နမ့ၢ်မၤဒ်န့ၣ်န့ၣ် နကသ့ၣ်ညါဘၣ် လံာ်စီဆှံတဆၢဒီးတဆၢ ဘၣ်ထွဲလိာ်သးဒ်လဲၣ် ဒီးနကနၢ်ပၢၢ်ထီၣ် “တၢ်ဂ့ၢ်လၢ ပှၤနၢ်ပၢၢ်အီၤကီ” စ့ၢ်ကီး.—၂ ပ့းတရူး ၃:၁၆.

5.  ၅. မၢပှၤဂၤမၤစၢၤနၤ. လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ ပကတူၢ်လိာ် ပှၤလၢအနၢ်ပၢၢ်လံာ်စီဆှံတဖၣ် အတၢ်မၤစၢၤ. (မၤတၢ် ၈:၃၀, ၃၁) ယဟိဝၤပှၤအုၣ်အသးတဖၣ် သးအိၣ်မၤလိလံာ်စီဆှံဒီးနၤ ဒီးနတလိၣ်ဟ့ၣ်စ့ဘၣ်. ဒ်ခရံာ်ဖိလၢညါတဖၣ်အသိး ယဟိဝၤပှၤအုၣ်အသးတဖၣ်န့ၣ် သူဝဲလံာ်စီဆှံအဆၢတဖၣ် ဒ်သိးကမၤစၢၤပှၤဂၤလၢ ပှၤကနၢ်ပၢၢ် တၢ်လၢလံာ်စီဆှံသိၣ်လိဝဲနီၢ်ကီၢ်.—မၤတၢ် ၁၇:၂, ၃.

တၢ်လၢနတလိၣ်ဘၣ်ယိၣ်ဘၣ်န့ၣ် မ့ၢ်မနုၤလဲၣ်

1.  ၁. တလိၣ်လၢနကဘၣ်အိၣ်ဒီး တၢ်ကူၣ်ဘၣ်ကူၣ်သ့လၢ အပတီၢ်ထီဘၣ်. ယ့ၣ်ၡူးအတၢ်မၢဖိ ၁၂ ဂၤန့ၣ် ပှၤထံၣ်အဝဲသ့ၣ်လၢ အဝဲသ့ၣ် “တမ့ၢ် ပှၤကူၣ်ဘၣ်ကူၣ်သ့ဘၣ်, မ့ၢ်ဒၣ် ပှၤမုၢ်ဆ့ၣ်မုၢ်ဂီၤဖိ.” ဘၣ်ဆၣ်အဝဲသ့ၣ် နၢ်ပၢၢ်လံာ်စီဆှံ ဒီးသိၣ်လိပှၤဂၤလံာ်စီဆှံ.—မၤတၢ် ၄:၁၃.

2.  ၂. တလိၣ်နဟ့ၣ်စ့ဘၣ်. ယ့ၣ်ၡူးတဲဘၣ်အပျဲၢ်တဖၣ်လၢ “သုန့ၢ်ဘၣ်ကလီတၢ်အဃိ ဟ့ၣ်ကလီတၢ်.” အဃိနမ့ၢ်မၤလိလံာ်စီဆှံဒီး ယဟိဝၤပှၤအုၣ်အသးန့ၣ် တလိၣ်နဟ့ၣ်စ့ဘၣ်.—မးသဲ ၁၀:၈.