လၢတၢ်မၤလိအံၤအပူၤ ပကသ့ၣ်ညါဘၣ်လၢ

•  ဘၣ်မနုၤအဃိ ပဘၣ်တဲတၢ်ဒီးပှၤဂၤလၢ မဲာ်သကိးမဲာ်လဲၣ်

•  ယဘၣ်စးထီၣ်တဲတၢ်ဒီးပှၤဂၤ ဒ်လဲၣ်

•  နသကိးတဖၣ် တဲဝဲ

 ပှၤတနီၤတဲဝဲလၢ နမ့ၢ်တဲတၢ်ဒီး ပှၤဂၤလၢ မဲာ်သကိးမဲာ်န့ၣ် အကီ ဒီးနဘၣ်ဘၣ်ယိၣ်တၢ်အါမး. အဃိ နမ့ၢ်ကွဲးလၢလံာ်န့ၣ် ညီလီၤ.

 “နမ့ၢ်ကွဲးလၢ လံာ်ဟီဒုန့ၣ် နဘှီက့ၤ နတၢ်ကတိၤ မ့တမ့ၢ် နမၤလီၤမၢ်ကွံာ်အီၤန့ၢ်. ဘၣ်ဆၣ် နမ့ၢ်တဲတၢ်လၢ မဲာ်သကိးမဲာ်ဟီဒုန့ၣ် နမၤဒ်န့ၣ်တသ့ဘၣ်. အဃိ နဘၣ်ဘၣ်ယိၣ်တၢ်အါတစဲး.”—အဲနၤ.

 “နမ့ၢ်ကွဲးန့ၢ်ပှၤဂၤ မဲးစ့းန့ၣ် အလီၤဂာ်ဒ် ပှၤပၠးတၢ်ဂီၤမူလၢ ပှၤကတဲာ်ကတီၤဒီး ဒိဃာ်အီၤဂ့ၤဂ့ၤ. မ့မ့ၢ် နမ့ၢ်တဲတၢ်ဒီး ပှၤဂၤလၢ မဲာ်သကိးမဲာ်ဟီဒုန့ၣ် လီၤဂာ်ဒီး ပှၤဒိတၢ်ဂီၤမူတခီခီ ပၠးလီၤအီၤတခီခီ (live show). အဃိ ယမ့ၢ်တဲတၢ်ဒီး ပှၤတဂၤဂၤ လၢမဲာ်သကိးမဲာ်န့ၣ် ယဘၣ်ပလီၢ်သးထီဘိ.”—ကၠံ.

 လၢနတၢ်အိၣ်မူပူၤန့ၣ် နကဘၣ်တဲတၢ်ဒီးပှၤဂၤ လၢမဲာ်သကိးမဲာ်တဘျီဘျီ ကအိၣ်လီၤ, နဟးဆှဲးတန့ၢ်ဘၣ်. အဒိ နမ့ၢ်အဲၣ်ဒိးန့ၢ်ဘၣ် သကိးလၢအသီ, နမ့ၢ်လီကီတၢ်မၤ ဒီးအဲၣ်ဒိးဆဲးမၤ တၢ်မၤတခါ မ့တမ့ၢ် နမ့ၢ်ဘၣ်သး ပာ်တၢ်အဲၣ်တီန့ၣ် နကဘၣ်တဲတၢ်လၢ မဲာ်သကိးမဲာ်.

 နီၢ်ကီၢ်န့ၣ် နတလိၣ် ပျံၤတၢ်လၢ နကတဲတၢ်ဒီးပှၤဂၤ လၢမဲာ်သကိးမဲာ်ဘၣ်. နမ့ၢ်ကဲ ပှၤလၢအမဲာ်ဆှးသ့ သနာ်က့ နမၤလိသ့ထီၣ်နသးလၢ နကတဲတၢ်ဒီးပှၤဂၤ ဂ့ၤဂ့ၤအဂီၢ်သ့.

 “တဘျီတခီၣ်န့ၣ် နကတဲကမၣ်ဘၣ်တၢ် ဒီးနကမဲာ်ဆှးကဒါက့ၤ. တၢ်တခါအံၤ အကဲထီၣ်အသးဒီး ပှၤကိးဂၤဒဲးလီၤ. အဃိ တလိၣ်ဘၣ်ယိၣ်တၢ် အါတလၢဘၣ်, နပာ်က့ၤအီၤ ဒ်တၢ်လီၤနံၤအသိးသ့.”—န့.

•   သံကွၢ်တၢ်သံကွၢ်တဖၣ်. ဆိကမိၣ်ထီၣ် တၢ်ဂ့ၢ်လၢ ပှၤကနၣ်ဝဲမုာ် တခါခါ ဒီးစးထီၣ်တဲသကိး တၢ်ဂ့ၢ်အဝဲန့ၣ်. အဒိ

   “လၢအပူၤကွံာ်တနံၣ်န့ၣ် နလဲၤဟးလၢ တၢ်လီၢ်ဖဲလဲၣ်.”

   “ဝဲးပဆဲး တခါအံၤဂ့ၤမး, နလဲၤကွၢ်ဘၣ်အီၤ တဘျီဘျီဧါ.”

   “နနၢ်ဟူဘၣ်ကၠ့ၤဧါ, ပှၤတဲဝဲဒၣ်လၢ . . .”

   နမ့ၢ်အဲၣ်ဒိးတဲ တၢ်ဂ့ၢ်လီၤလီၤဆီဆီန့ၣ် နတဲတၢ်ဂ့ၢ်လၢ အဘၣ်ဃးဒီး နၤဒီးအီၤသ့. အဒိ နမ့ၢ်ထီၣ်ဘၣ်ကၠိဒီးအီၤ ဒ်သိးသိး မ့တမ့ၢ် မၤတၢ်မၤ ဒ်သိးဒီးအီၤန့ၣ် နတဲကၠိအဂ့ၢ် မ့တမ့ၢ် တၢ်မၤအဂ့ၢ်သ့. နသံကွၢ်အီၤ အတၢ်ဂ့ၢ်အဂၤလၢ အလီၤဂာ် ဒ်သိးနၤတဖၣ် သ့စ့ၢ်ကီး.

   “ဆိကမိၣ်ထီၣ် တၢ်သံကွၢ်လၢ နအဲၣ်ဒိးသ့ၣ်ညါ ဒီးနအဲၣ်ဒိးလၢ အကတဲဖျါထီၣ် အတၢ်ထံၣ်.”—မရံစၤ.

   တၢ်ဟ့ၣ်ပလီၢ်– တဘၣ်သံကွၢ် တၢ်သံကွၢ် တဖျၢၣ်ဝံၤတဖျၢၣ် အါတလၢတဂ့ၤ. ဒီးတဘၣ် သံကွၢ် ပှၤနီၢ်ကစၢ် တၢ်ဂ့ၢ်တၢ်ကျိၤ အါတလၢတဂ့ၤ. နမ့ၢ်သံကွၢ် တၢ်သံကွၢ်ဒ်သိးဒီး “လၢနတၢ်အိၣ်မူပူၤန့ၣ် နပျံၤတၢ်မနုၤ အဒိၣ်ကတၢၢ်လဲၣ်” မ့တမ့ၢ် “ဘၣ်မနုၤအဃိ နသိးတၢ်အလွဲၢ်တခါန့ၣ် ထီဘိလဲၣ်” န့ၣ်ဘၣ်သ့ၣ်သ့ၣ် အဝဲသ့ၣ် တူၢ်ဘၣ်တမုာ်ဘၣ်. နမ့ၢ်သံကွၢ် အဝဲသ့ၣ် တၢ်သံကွၢ် ဒ်သိးဒီး တၢ်သံကွၢ် ခံဖျၢၣ်တဖျၢၣ်န့ၣ် ဘၣ်သ့ၣ်သ့ၣ် အဝဲသ့ၣ် ကတူၢ်ဘၣ်လၢ နပာ်ဒ့ၣ်ပာ်ကမၣ် အဝဲသ့ၣ်.

   ဒ်သိး နတသံကွၢ်ဘၣ် တၢ်သံကွၢ် တဖျၢၣ်ဝံၤတဖျၢၣ် အါတလၢ တဂ့ၤအဂီၢ် နသံကွၢ် တၢ်သံကွၢ် မ့ၢ်ဝံၤန့ၣ် နတဲဖျါထီၣ် နတၢ်ထံၣ်သ့ မ့တမ့ၢ် အစံးဆၢနၤ မ့ၢ်ဝံၤန့ၣ် နတဲဖျါထီၣ် နတၢ်ထံၣ်သ့ ဝဲစ့ၢ်ကီး. နမ့ၢ်မၤဒ်န့ၣ်န့ၣ် အကလီၤဂာ်ဒ်သိး နတဲသကိးတၢ်ဒီးအီၤ ဒီးအတလီၤဂာ်ဒ်သိး နသမံသမိးအီၤဘၣ်.

   လံာ်စီဆှံ အတၢ်ဟံးစုနဲၣ်ကျဲ– “ပှၤတဂၤ အတၢ်ဆိကမိၣ် လၢအသးပူၤန့ၣ် လီၤဂာ်ဒ်သိးဒီး ထံလၢ ထံယိာ်ပူၤ ဘၣ်ဆၣ် ပှၤလၢ အသ့ပဲာ်ထံနီၤဖးတၢ် တဂၤန့ၣ် စဲၤထီၣ်ဝဲလီၤ.”—ကတိၤဒိ ၂၀:၅.

•   ဒိကနၣ်တၢ်လၢ တၢ်သးအိၣ်အပူၤ. နတဲသကိးတၢ်ဒီးပှၤဂၤ ကသ့ဂ့ၤဂ့ၤအဂီၢ် နကဘၣ်ဒိကနၣ်န့ၢ်ပှၤ ဂ့ၤဂ့ၤန့ၣ် အရ့ဒိၣ်န့ၢ်ဒံး နကဲပှၤလၢအတဲတၢ်သ့ဒံး.

   “ယပာ်လီၤယသးလၢ ယကဃုသ့ၣ်ညါအါထီၣ် ပှၤလၢယတဲသကိးတၢ်ဒီးအီၤ တဂၤအဂ့ၢ်. ဝံၤဒီး ယဂုာ်ကျဲးစၢး တိၢ်နီၣ်ဃာ် တၢ်လၢအတဲဝဲ ဒ်သိးလၢခံတဘျီ ယဆဲးတဲတၢ်ဒီးအီၤ ကသ့အဂီၢ်.”—ထဲမရၤ.

   တၢ်ဟ့ၣ်ပလီၢ်– တလိၣ်ဘၣ်ယိၣ်လၢ နကဘၣ်က့ၤတဲဆၢက့ၤ အဝဲသ့ၣ် ဒ်လဲၣ်တဂ့ၤ. နမ့ၢ်ဒိကနၣ်အီၤထံထံန့ၣ် နကဘၣ်က့ၤတဲအီၤ ဒ်လဲၣ်န့ၣ် နကသ့ၣ်ညါထီၣ်.

   လံာ်စီဆှံ အတၢ်ဟံးစုနဲၣ်ကျဲ– “သးအိၣ် ဒိကနၣ်တၢ် ဘၣ်ဆၣ် တဘၣ်ကရီတဲတၢ်ဘၣ်.”—ယၤကိာ် ၁:၁၉.

•    ပာ်ဖျါထီၣ် တၢ်သူၣ်အိၣ်သးအိၣ်နီၢ်ကီၢ်. နမ့ၢ်သးအိၣ်ပှၤလၢ နတဲတၢ်ဒီးအီၤတဂၤန့ၣ် နတဲသကိးတၢ်ဒီးအီၤ ကမုာ်ဒိၣ်ထီၣ်.

   “ဖဲပှၤတဲတၢ်အခါ ပှၤမ့ၢ်တူၢ်ဘၣ်လၢ နဒိကနၣ်န့ၢ်အီၤဂ့ၤဂ့ၤန့ၣ် နတဲတၢ် မ့ၢ်တဘၣ်အါအါနာ်က့ ပှၤတဲသကိးတၢ်ဒီးနၤ ကမုာ်ဝဲ.”—မၤရံၤ.

   တၢ်ဟ့ၣ်ပလီၢ်– တဘၣ်သံကွၢ် တၢ်ဂ့ၢ်တနီၤလၢ ပှၤတအဲၣ်ဒိးတဲဘၣ်တဂ့ၤ. ဘၣ်သ့ၣ်သ့ၣ် ပှၤတနီၤနီၤန့ၣ် တအဲၣ်နသံကွၢ် အဝဲသ့ၣ်လၢ “နဆ့ကၤတဘ့ၣ်အံၤ ဂ့ၤမးဒၢး နလဲၤပှ့ၤဖဲလဲၣ်” န့ၣ်ဘၣ်.

   လံာ်စီဆှံ အတၢ်ဟံးစုနဲၣ်ကျဲ– “တဘၣ်ကွၢ်လီၤထဲလၢ သုနီၢ်ကစၢ် အဘျုးတဂ့ၤ. ဆိကမိၣ်န့ၢ်တၢ်လၢ ပှၤဂၤအဂီၢ် စ့ၢ်ကီး.”—ဖံလံးပံၤ ၂:၄.

 နဘၣ်မၤကတၢၢ်ကွံာ် တၢ်တဲသကိးတၢ်ဒ်လဲၣ်. ဂုာ်ကျဲးစၢးမၤကတၢၢ်ကွံာ် တၢ်တဲသကိးတၢ်လၢ တၢ်ကတိၤလၢ အကဲထီၣ်တၢ်ဂံၢ်တၢ်ဘါ. ဒီပုၢ်ဝဲၢ် သးစၢ် လၢအမံၤမ့ၢ် ကၠီဒၢၣ်န့ၣ် ဟ့ၣ်ကူၣ်ဝဲလၢ “ဖဲနမၤကတၢၢ်ကွံာ် တၢ်ကတိၤသကိးတၢ်အခါ နတဲဒ်အံၤသ့ဝဲ. အဒိ နတဲအီၤလၢ ‘တဲသကိးတၢ်ဒီးနၤ မုာ်မးဒၢး’ မ့တမ့ၢ် ‘လဲၤဂ့ၤဂ့ၤနီၤ.’ နမ့ၢ်မၤဒ်န့ၣ်န့ၣ် နမ့ၢ်ထံၣ်အီၤ လၢခံတဘျီန့ၣ် နတဲသကိးဘၣ်တၢ်ဒီးအီၤ ကညီ.”