တၢ်ဃုသ့ၣ်ညါ တၢ်မ့ၢ်တၢ်တီ
တၢ်သ့ၣ်ညါထီၣ်တၢ်မ့ၢ်တၢ်တီန့ၣ် အရ့ဒိၣ်လၢပသးသမူအဂီၢ်လီၤ. အဒိ, ဆိကမိၣ်ကွၢ် တၢ်ဆူးတၢ်ဆါတဖၣ် ရၤလီၤအသးဒ်လဲၣ်န့ၣ် ပသ့ၣ်ညါထီၣ် တၢ်သံကွၢ်အံၤအတၢ်စံးဆၢ ဒီးကဲဘျုးလၢ ပတၢ်အိၣ်မူဒ်လဲၣ်န့ၣ်လီၤ.
ဖဲပှၤတသ့ၣ်ညါ တၢ်သံကွၢ်အံၤအတၢ်စံးဆၢဒံးဘၣ်အခါ ပှၤကညီလၢအကကွဲၢ်တဖၣ် ဘၣ်သံဝဲလၢ တၢ်ဆါသံသတြိာ်အံၤအဃိလီၤ. လၢခံကတၢၢ်န့ၣ် ပှၤစဲအ့ၣ်ဖိတဖၣ် ထံၣ်န့ၢ်ဝဲအတၢ်စံးဆၢလီၤ. အဝဲသ့ၣ် သ့ၣ်ညါထီၣ်ဝဲလၢ တၢ်ဆူးတၢ်ဆါတဖၣ် ဟဲအိၣ်ထီၣ်ခီဖျိလၢ ဘဲးထံရံယါ ဒီးတၢ်ဆါဃၢ်တဖၣ်လၢ ပှၤထံၣ်အီၤလၢပှၤမဲာ်ချံတသ့ဘၣ် အဃိန့ၣ်လီၤ. ပှၤကူၣ်ဘၣ်ကူၣ်သ့တဖၣ် ထံၣ်န့ၢ်တၢ်စံးဆၢအဃိ ကဲထီၣ်တၢ်မၤစၢၤလၢ တၢ်ကူစါယါဘျါအဂီၢ် ဒီးတၢ်ဒီသဒၢတၢ်ဆူးတၢ်ဆါအါမံၤအဂီၢ်လီၤ. အဃိ ပှၤအကကွဲၢ် လၢအကထိတဖၣ်န့ၣ် အသးသမူထီထီၣ် ဒီးအတၢ်အိၣ်ဆူၣ်အိၣ်ချ့ဂ့ၤထီၣ်ဝဲလီၤ.
တၢ်သံကွၢ်လၢအရ့ဒိၣ် အဂၤတဖၣ်မီၤ. ဖဲနဃုထံၣ်န့ၢ် တၢ်မ့ၢ်တၢ်တီဘၣ်ဃးဒီး တၢ်သံကွၢ်လၢလာ်တဖၣ်အံၤအခါ နဆိကမိၣ်ကဲဘျုးလၢ နဂီၢ်ကသ့ဒ်လဲၣ်.
-
ကစၢ်ယွၤ မ့ၢ်မတၤလဲၣ်.
-
ယ့ၣ်ၡူးခရံာ် မ့ၢ်မတၤလဲၣ်.
-
ကစၢ်ယွၤအဘီအမုၢ် မ့ၢ်မနုၤလဲၣ်.
-
ခါဆူညါ တၢ်ကမၤအသးဒ်လဲၣ်.
ပှၤလၢအကကွဲၢ်တဖၣ် ဒိးန့ၢ်ဘၣ်ဝဲ တၢ်သံကွၢ်အံၤအတၢ်စံးဆၢ အဃိအဝဲသ့ၣ်တၢ်အိၣ်မူ ဆီတလဲ ဒီးဂ့ၤထီၣ်ဝဲန့ၣ်လီၤ. လၢတၢ်စံးဆၢတဖၣ်န့ၣ်အပူၤ နၤစ့ၢ်ကီး နဒိးန့ၢ်ဘၣ်အဘျုးအဖှိၣ်သ့ဝဲလီၤ.
နဃုထံၣ်န့ၢ် တၢ်မ့ၢ်တၢ်တီသ့ဧါ
ဘၣ်သ့ၣ်သ့ၣ် နကဆိကမိၣ်ဘၣ်လၢ ‘တၢ်ဂ့ၢ်တၢ်ကျိၤတမံၤဂ့ၤတမံၤဂ့ၤ လၢအဘၣ်ဃးဒီး တၢ်မ့ၢ်တၢ်တီန့ၣ် မ့ၢ်ယထံၣ်န့ၢ်အီၤ ကသ့ဒံးဧါ.’ မုၢ်မဆါတနံၤအံၤ နကဃုထံၣ်န့ၢ် တၢ်ဂ့ၢ်တၢ်ကျိၤအါမး လၢဘၣ်ဃးဒီးတၢ်မ့ၢ်တၢ်တီအဂီၢ်န့ၣ် တညီလၢၤဘၣ်. ဘၣ်မနုၤအဃိလဲၣ်.
ပှၤအါဂၤန့ၣ် တနာ်ဝဲဒၣ်ပဒိၣ်ပပှၢ်, တၢ်ပနံာ်တၢ်ကၤ မ့တမ့ၢ် တၢ်ကစီၣ်တဖၣ်လၢၤဘၣ်. တၢ်မ့ၢ်တၢ်တီဘၣ်ဃးဒီး ပှၤဂၤအတၢ်ထံၣ်န့ၣ် အဘၣ်ဧါ, အကမၣ်ဧါ ဒီးမ့ၢ်တၢ်တဲလံၣ်တဲလီတဖၣ်ဧါန့ၣ် နကနာ်အဂီၢ် ကီထီၣ်ဝဲလီၤ. ပစိၤခဲအံၤစ့ၢ်ကီး ပှၤကညီတဂၤဒီးတဂၤန့ၣ် တၢ်နာ်န့ၢ်လီၤသးတအိၣ်လၢၤဘၣ် ဒီးတၢ်ဂ့ၢ်တၢ်ကျိၤလၢပနၢ်ဟူအါတက့ၢ်န့ၣ် တမ့ၢ်တတီလၢၤဘၣ် အဃိတၢ်ဂ့ၢ်တၢ်ကျိၤ မ့ၢ်တီမ့ၢ်လိၤဒၣ်လဲာ် အဝဲသ့ၣ်တၢ်နာ်န့ၢ်လိာ်သး တအိၣ်လၢၤဘၣ်.
တၢ်အိၣ်သးမ့ၢ်ကီမ့ၢ်ခဲ ထဲလဲၣ်ဘၣ်ဆၣ် တၢ်သံကွၢ်အရ့ဒိၣ်ကတၢၢ် လၢဘၣ်ဃးဒီးတၢ်အိၣ်မူန့ၣ် နဃုထံၣ်န့ၢ် အတၢ်စံးဆၢသ့ဝဲလီၤ. ကသ့လၢကျဲဒ်လဲၣ်. ဂုာ်ကျဲးစၢး ဃုသ့ၣ်ညါအီၤဒ် နဃုသ့ၣ်ညါတၢ် ကိးနံၤဒဲးအသိးတက့ၢ်.
တၢ်ဃုသ့ၣ်ညါဘၣ်ဃးဒီး တၢ်မ့ၢ်တၢ်တီ
ကိးနံၤဒဲးန့ၣ် တၢ်ဂ့ၢ်တၢ်ကျိၤကအိၣ်လၢ နကဘၣ်ဃုသ့ၣ်ညါ တၢ်မ့ၢ်တၢ်တီအဂီၢ်လီၤ. ပကကွၢ်သကိးတၢ်အိၣ်သးတခါ, ကၠဲၤစံၤခၤ တဲဝဲလၢ “ယဖိမုၣ်န့ၣ်အီၣ် သဘ့ဟီၣ်လာ် (မြေပဲ) တန့ၢ်နီတစဲးဘၣ် ဒီးအမ့ၢ်အီၣ်ဘၣ်ထဲ တစဲးဖိဒၣ်လဲာ် သံဝဲသ့လီၤ.” ကၠဲၤစံၤခၤ သ့ၣ်ညါဆိဝဲ တၢ်အီၣ်လၢအဖိမုၣ် အီၣ်ဝဲတန့ၢ်ဘၣ်န့ၣ် အတပှ့ၤဝဲဒၣ်ဘၣ်. ဒီးအဆဲးတဲဝဲလၢ “အဆိကတၢၢ် လၢတၢ်အီၣ်အကျါ တၢ်မနုၤပၣ်ဃုာ်လဲၣ်န့ၣ် ယဘၣ်ဖးတၢ်ဂ့ၢ်လီၤတံၢ်လီၤဆဲး, ဝံၤဒီး ယဆဲးသံကွၢ်လီၤတံၢ်လၢအခီပနံာ် ဒ်သိးသဘ့ဟီၣ်လာ် ပၣ်ဧါ, တပၣ်ဧါန့ၣ်လီၤ. တကးဒံးဘၣ် ယဃုသ့ၣ်ညါအါထီၣ်စ့ၢ်ကီး တၢ်အီၣ်တဖၣ်လၢ ခီပနံာ်ထုးထီၣ်ဝဲန့ၣ် မ့ၢ်ယနာ်န့ၢ်အီၤ သ့ဧါ, တသ့ဧါန့ၣ်လီၤ.”
နကဃုသ့ၣ်ညါ တၢ်မ့ၢ်တၢ်တီတဖၣ် အတၢ်စံးဆၢအဂီၢ်န့ၣ် ဘၣ်သ့ၣ်သ့ၣ် တကီထဲသိး ကၠဲၤစံၤခၤဃုသ့ၣ်ညါဝဲတၢ်အီၣ်အဂ့ၢ်ဘၣ်. ဘၣ်ဆၣ် ဒ်ကၠဲၤစံၤခၤအသိး နမၤပိာ်ထွဲ ဒ်လၢလာ်အံၤအသိးသ့ဝဲ–
-
ကဘၣ်သ့ၣ်ညါ တၢ်ဂ့ၢ်အမ့ၢ်အတီ.
-
ဃုကွၢ်အါထီၣ် တၢ်ဂ့ၢ်တၢ်ကျိၤ.
-
ဃုသ့ၣ်ညါ တၢ်ဂ့ၢ်အခီၣ်ထံးခီၣ်ဘိလၢ နနာ်န့ၢ်အီၤသ့.
တၢ်သံကွၢ်လၢအရ့ဒိၣ်တဖၣ်အံၤ အတၢ်စံးဆၢန့ၣ် နဃုထံၣ်န့ၢ်အီၤသ့ဝဲလီၤ. လၢကျဲဒ်လဲၣ်.
လံာ်တဘ့ၣ်လၢ အပာ်ဖျါထီၣ်တၢ်မ့ၢ်တၢ်တီ
ကၠဲၤစံၤခၤန့ၣ် ဖဲအဃုသ့ၣ်ညါဝဲလံာ်စီဆှံ တၢ်မ့ၢ်တၢ်တီအခါ အသူဝဲကျဲဒ်သိး အဃုသ့ၣ်ညါဝဲ တၢ်အီၣ်လၢအဖိမုၣ်အီၣ်ဝဲ တန့ၢ်ဘၣ်န့ၣ်လီၤ. အဃိ အတဲဝဲလၢ “ယမ့ၢ်ဖးဒီး ဃုသ့ၣ်ညါ တၢ်ဂ့ၢ်လီၤတံၢ်လီၤဆဲးန့ၣ် မၤစၢၤယၤလၢ ယကထံၣ်န့ၢ်တၢ်မ့ၢ်တၢ်တီလၢ လံာ်စီဆှံပူၤလီၤ.” ဒ်ကၠဲၤစံၤခၤအသိး ပှၤကညီလၢအကကွဲၢ်တဖၣ် သ့ၣ်ညါထီၣ်လံာ်စီဆှံအတၢ်စံးဆၢလၢ အဘၣ်ဃးဒီးတၢ်သံကွၢ်တဖၣ်အံၤ–
-
ဘၣ်မနုၤ ပဟဲအိၣ်မူဘၣ်လၢ ဟီၣ်ခိၣ်ချၢအံၤလဲၣ်.
-
ဖဲပသံအခါ တၢ်မၤအသးဒီးပှၤဒ်လဲၣ်.
-
ဘၣ်မနုၤအဃိ ပတူၢ်ဘၣ်တၢ်နးတၢ်ဖှီၣ်လဲၣ်.
-
ကစၢ်ယွၤကမၤကတၢၢ်ကွံာ် တၢ်နးတၢ်ဖှီၣ်ခဲလၢာ်ဒ်လဲၣ်.
-
ပအိၣ်ဒီးဟံၣ်မုာ်ဃီၤပၢၤ ကသ့ဒ်လဲၣ်.
နဃုထံၣ်န့ၢ် တၢ်စံးဆၢလၢအမ့ၢ်အတီတဖၣ်အံၤ ဒီးတၢ်သံကွၢ်အဂၤတဖၣ်သ့ ခီဖျိလၢ နဖးလံာ်စီဆှံ ဒီးနဃုသ့ၣ်ညါအါထီၣ်အီၤလၢ www.ps8318.com/ksw အပူၤသ့ဝဲလီၤ.