မ့ၢ်ပကြၢးဃ့ဘါထုကဖၣ်လၢ ယ့ၣ်ၡူးအအိၣ်ဧါ
မ့ၢ် ကစၢ်ခရံာ်န့ၣ် စံးဆၢဝဲတၢ်ထုကဖၣ်ဧါ. ပှၤဃုသ့ၣ်ညါတၢ်ဖိတဂၤ သံကွၢ်ဝဲပှၤသးစၢ်အဂၤ ၈၀၀ ဘျဲၣ်လၢအဟဲလၢ တၢ်ဘူၣ်တၢ်ဘါအကလုာ်ကလုာ်တဖၣ်အကျါ လၢအအါန့ၢ်ဒံးတဆံခံခါန့ၣ်လီၤ. ပှၤအဂၤ ၆၀ မျးကယၤဘျဲၣ်န့ၣ် စံးဆၢဝဲလၢအဝဲသ့ၣ်နာ်ဝဲလၢ ကစၢ်ခရံာ်န့ၣ် စံးဆၢဝဲတၢ်ထုကဖၣ်လီၤ. ဘၣ်ဆၣ်သနာ်က့, သးစၢ်ပိာ်မုၣ်တဂၤ တိၤသံဝဲယ့ၣ်ၡူးအမံၤလၢ တၢ်သံကွၢ်အလံာ်က့ပူၤဒီး လၢယ့ၣ်ၡူးအလီၢ်န့ၣ် အဝဲကွဲးက့ၤဝဲလၢ “ကစၢ်ယွၤ” လီၤ.
နဆိကမိၣ်ဒ်လဲၣ်. မ့ၢ်ပကြၢးဃ့ဘါထုကဖၣ်လၢ ယ့ၣ်ၡူးအအိၣ်ဧါ မ့တမ့ၢ်လၢကစၢ်ယွၤအအိၣ်ဧါ. * ပကထံၣ်န့ၢ်တၢ်စံးဆၢအဂီၢ် အဆိကတၢၢ်န့ၣ် ပကသမံသမိးကွၢ် တၢ်ထုကဖၣ်လၢ ယ့ၣ်ၡူးသိၣ်လိဝဲအပျဲၢ်အဘီၣ်တဖၣ်လီၤ.
ယ့ၣ်ၡူးသိၣ်လိပှၤလၢ ပကဘၣ်ဃ့ဘါထုကဖၣ်ဆူ မတၤတဂၤအအိၣ်လဲၣ်
ပကြၢးဃ့ထုကဖၣ်ဆူ မတၤအအိၣ်လဲၣ်န့ၣ် ယ့ၣ်ၡူးသိၣ်လိပှၤဒီး ပာ်ဖျါထီၣ်န့ၢ်ပှၤအဒိအတဲာ်လီၤ.
ဖဲယ့ၣ်ၡူးဃ့ဘါထုကဖၣ်ဆူ အပၢ်အိၣ်လၢမူခိၣ်အခါ အဝဲပာ်ဖျါထီၣ်ဝဲ တၢ်အဒိတဲာ် လၢပှၤကိးဂၤဒဲးကကွၢ်လိမၤဒိးအီၤ အဂီၢ်လီၤ
ယ့ၣ်ၡူးအတၢ်သိၣ်လိ– ဖဲယ့ၣ်ၡူးအပျဲၢ်တဂၤ စံးဘၣ်အီၤလၢ “သိၣ်လိပှၤလၢပဘါထုကဖၣ်တၢ်အဂ့ၢ်” အခါကစၢ်စံးဆၢက့ၤအီၤလၢ “တုၤသုဘါထုကဖၣ်တၢ်ဒီး, စံး, အိၣ်လၢမူခိၣ်ပပၢ်ဧၢ” န့ၣ်တက့ၢ်. (လူၤကၣ် ၁၁:၁, ၂) တကးဒံးဘၣ် ဖဲကစၢ်စံၣ်တဲၤတဲလီၤတၢ် လၢတၢ်လူၢ်ခိၣ်အခါ ဟ့ၣ်ဂံၢ်ဟ့ၣ်ဘါဝဲ ပှၤဒိကနၣ်တၢ်ဖိတဖၣ်လၢက ‘ဘါထုကဖၣ်တၢ်လၢပၢ်အအိၣ်’ လီၤ. ကစၢ်တဲစ့ၢ်ကီးဝဲလၢ– “သုတချုးဃ့ဒံးဘၣ်ဒီး, တၢ်လၢသုန့ၢ်ဘၣ်အီၤအလီၢ်အိၣ် တဖၣ်န့ၣ် သုပၢ်သ့ၣ်ညါဝဲလီၤ.” (မးသဲ ၆:၆, ၈) ဖဲယ့ၣ်ၡူးတချုးသံဒံးဘၣ်အနၤန့ၣ် အဝဲတဲဘၣ်အပျဲၢ်အဘီၣ်တဖၣ်လၢ– “ဖဲဒၣ်သုဃ့တၢ်လၢယမံၤလၢပၢ်န့ၣ်, ကဟ့ၣ်ဝဲလၢသုလီၤ.” (ယိၤဟၣ် ၁၆:၂၃) ယ့ၣ်ၡူးသိၣ်လိပှၤလၢ ပကဃ့ဘါထုကဖၣ်ဆူ အဝဲအပၢ်ဒီးပပၢ် လၢအမ့ၢ်ယဟိဝၤယွၤအအိၣ်လီၤ.—ယိၤဟၣ် ၂၀:၁၇.
ယ့ၣ်ၡူးပာ်ဖျါထီၣ်ဝဲ တၢ်အဒိအတဲာ်– ဒ်ယ့ၣ်ၡူးသိၣ်လိပှၤဂၤအသိး အနီၢ်ကစၢ်စ့ၢ်ကီး ဃ့ဘါထုကဖၣ်ဝဲလၢ– “မူခိၣ်ဒီးဟီၣ်ခိၣ်အကစၢ်, ပၢ်ဧၢ, ယစံးထီၣ်ပတြၢၤနၤလီၤ.” (လူၤကၣ် ၁၀:၂၁) ဘၣ်တဘျီန့ၣ် “ယ့ၣ်ၡူးကျ့ထီၣ်အမဲာ်ဒီးစံးဝဲဒၣ်, ပၢ်ဧၢ, ယစံးထီၣ်ပတြၢၤနဘျုးနဖှိၣ်, လၢနကနၣ်ယကလုၢ်လီၤ.” (ယိၤဟၣ် ၁၁:၄၁) ဖဲအဝဲကသံဘူးထီၣ်အဆၢကတီၢ်န့ၣ် ဃ့ထုကဖၣ်ဝဲလၢ “ပၢ်ဧၢ, ယဟ့ၣ်လီၤယသးလၢနစုပူၤလီၤ.” (လူၤကၣ် ၂၃:၄၆) ဘၣ်ဃးဒီးတၢ်ထုကဖၣ်န့ၣ် ယ့ၣ်ၡူး ပာ်ဖျါထီၣ်ဝဲတၢ်အဒိအတဲာ်လၢ ပှၤကိးဂၤဒဲး ကကွၢ်လိမၤဒိးအီၤအဂီၢ်လီၤ. အဝဲဃ့ဘါထုကဖၣ်ဆူ အပၢ်အိၣ်လၢမူခိၣ်လၢအမ့ၢ် “မူခိၣ်ဒီးဟီၣ်ခိၣ်အကစၢ်” အအိၣ်န့ၣ်လီၤ. (မးသဲ ၁၁:၂၅; ၂၆:၄၁, ၄၂; ၁ ယိၤဟၣ် ၂:၆) ယ့ၣ်ၡူးအတၢ်သိၣ်လိနဲၣ်လိလၢ ဘၣ်ဃးဒီးတၢ်ထုကဖၣ်န့ၣ် အပျဲၢ်အဘီၣ်လၢညါတဖၣ် နၢ်ပၢၢ်ဝဲဒ်လဲၣ်.
ပှၤခရံာ်ဖိလၢညါတဖၣ်န့ၣ် ဃ့ဘါထုကဖၣ်ဆူ မတၤတဂၤအအိၣ်လဲၣ်
ဖဲယ့ၣ်ၡူးက့ၤထီၣ်ဆူမူခိၣ်စှၤနွံဝံၤအလီၢ်ခံ အပျဲၢ်အဘီၣ်တဖၣ်န့ၣ် ကွၢ်ဆၢၣ်မဲာ်ဘၣ်ဝဲ ပှၤထီဒုၣ်ထီဒါတၢ်တဖၣ် အတၢ်မၤတံာ်တာ်ဒီး တၢ်မၤပျံၤမၤဖုးန့ၣ်လီၤ. (မၤတၢ် ၄:၁၈) လၢတၢ်န့ၣ်အဃိ ယ့ၣ်ၡူးအပျဲၢ်အဘီၣ်တဖၣ် ဃ့ဘါထုကဖၣ်ဝဲလီၤ. ဘၣ်ဆၣ် အဝဲသ့ၣ်ဃ့ဘါထုကဖၣ်ဝဲဆူ မတၤအအိၣ်လဲၣ်. အဝဲသ့ၣ် “ဘါထုကဖၣ်ယွၤလၢအသးတဖျၢၣ်ဃီ” ခီဖျိလၢ ‘အခ့အပှၤစီဆှံ, ယ့ၣ်ၡူးအမံၤ’ ဒ်သိးကစၢ်ယွၤကမၤစၢၤအဝဲသ့ၣ်အဂီၢ်လီၤ. (မၤတၢ် ၄:၂၄, ၃၀) ယ့ၣ်ၡူးအပျဲၢ်အဘီၣ်တဖၣ်ဃ့ဘါထုကဖၣ်ဝဲဒ် ယ့ၣ်ၡူးသိၣ်လိအဝဲသ့ၣ်အသိးလီၤ. လၢတၢ်န့ၣ်အဃိ အဝဲသ့ၣ်တဃ့ဘါထုကဖၣ်ဝဲဆူ ယ့ၣ်ၡူးအအိၣ်ဘၣ်.
နံၣ်တဖၣ်ပူၤကွံာ်အလီၢ်ခံ စီၤပီလူးပာ်ဖျါထီၣ်ဝဲလၢ အဝဲဒီးတၢ်မၢဖိအဂၤတဖၣ် ဃ့ဘါထုကဖၣ်ဝဲဒ်လဲၣ်အဂ့ၢ်န့ၣ်လီၤ. အဝဲကွဲးလံာ်ဆူခရံာ်ဖိအဂၤတဖၣ် အအိၣ်ဒီး စံးဝဲလၢ “ပဘါထုကဖၣ်တၢ်လၢသုဂီၢ်တဘိယူၢ်ဃီဒီး, ပစံးထီၣ်ပတြၢၤယွၤ ပကစၢ်ယ့ၣ်ၡူးခရံာ်အပၢ် အဘျုးအဖှိၣ်လီၤ.” (ကလီးစဲ ၁:၃) စီၤပီလူးကွဲးစ့ၢ်ကီးလံာ်ဆူ ပှၤလၢအတၢ်နာ်ဒ်သိးဒီးအီၤတဖၣ်အအိၣ် ဒီးစံးဝဲလၢ “စံးထီၣ်ပတြၢၤပၢ်ယွၤအဘျုးအဖှိၣ်တဘိယူၢ်ဃီ လၢတၢ်ခဲလၢာ်အဃိ, လၢပကစၢ်ယ့ၣ်ၡူးခရံာ်အမံၤန့ၣ်တက့ၢ်.” (အ့းဖ့းစူး ၅:၂၀) ပမ့ၢ်ကွၢ်တၢ်ကတိၤတဖၣ်အံၤန့ၣ် ပသ့ၣ်ညါဘၣ်လၢ စီၤပီလူးဟ့ၣ်ဂံၢ်ဟ့ၣ်ဘါပှၤဂၤလၢ ကဃ့ဘါထုကဖၣ်တၢ်ဆူ “ပၢ်ယွၤ” အအိၣ် ခီဖျိလၢယ့ၣ်ၡူးအမံၤလီၤ.—ကလီးစဲ ၃:၁၇.
ဒ်ခရံာ်ဖိလၢညါတဖၣ်မၤဝဲအသိး ပပာ်ဖျါထီၣ်ပတၢ်အဲၣ်ယ့ၣ်ၡူးသ့ခီဖျိ ပဒိကနၣ်အတၢ်သိၣ်လိလၢဘၣ်ဃးဒီးတၢ်ထုကဖၣ်န့ၣ်လီၤ. (ယိၤဟၣ် ၁၄:၁၅) စံးထီၣ်ပတြၢၤ ၁၁၆:၁, ၂ စံးဝဲ “ယအဲၣ်ယွၤကွံယွၤလီၤ. အဂ့ၢ်ဒ်အံၤ, ကနၣ်ယကလုၢ်, . . . ယကကိးထီၣ်အီၤတစိၤဒၣ်ယၤလီၤ.” လၢတၢ်န့ၣ်အဃိ ပမ့ၢ်ဃ့ဘါထုကဖၣ်ထဲလၢ ပၢ်အိၣ်လၢမူခိၣ်တဂၤအအိၣ်န့ၣ် ပှၤကွဲးထါစံးထီၣ်ပတြၢၤအတၢ်ကတိၤအံၤ အခီပညီကအိၣ်လၢပဂီၢ်လီၤ. *
^ လံာ်အဆၢ. 3 လံာ်စီဆှံသိၣ်လိဝဲလၢ ယ့ၣ်ၡူးဒီးကစၢ်ယွၤန့ၣ်တဒ်သိးလိာ်အသးဘၣ်. နမ့ၢ်အဲၣ်ဒိးသ့ၣ်ညါအါထီၣ်န့ၣ် ကွၢ်လံာ်လၢယဟိဝၤပှၤအုၣ်အသးတဖၣ် ထုးထီၣ်ဝဲလၢအမ့ၢ် လံာ်စီဆှံ သိၣ်လိတၢ် နီၢ်နီၢ် န့ၣ်မ့ၢ်မနုၤလဲၣ် တၢ်နီၤဖး ၄ တက့ၢ်.
^ လံာ်အဆၢ. 11 ပမ့ၢ်အဲၣ်ဒိးလၢ ကစၢ်ယွၤဒိကနၣ်ပတၢ်ထုကဖၣ်န့ၣ် ပကဘၣ်ဂုာ်ကျဲးစၢးအိၣ်မူဒ် တၢ်ဘၣ်ကစၢ်ယွၤအသးလီၤ. နမ့ၢ်အဲၣ်ဒိးသ့ၣ်ညါအါထီၣ်န့ၣ် ကွၢ်လံာ်လၢယဟိဝၤပှၤအုၣ်အသးတဖၣ် ထုးထီၣ်ဝဲလၢအမ့ၢ် လံာ်စီဆှံ သိၣ်လိတၢ် နီၢ်နီၢ် န့ၣ်မ့ၢ်မနုၤလဲၣ် တၢ်နီၤဖး ၁၇ တက့ၢ်.
