ထံလုၢ်ဘၢတၢ် လၢစီၤနိအၤအစိၤဝံၤ အိၣ်ဝဲအနံၣ် ၃၅၀ ဃၣ်ဃၣ်န့ၣ် စီၤအၤဘြၤဟၣ် အိၣ်ဝဲဆိးဝဲ ဖဲဝ့ၢ်အူၢ် လၢအမ့ၢ်ဝ့ၢ်လၢအထူးအတီၤတဖျၢၣ်အပူၤလီၤ. ဝ့ၢ်အဝဲန့ၣ် အိၣ်သူၣ်လီၤတ့ၢ်အသးလၢကီၢ် လၢမုၢ်မဆါတနံၤညါအံၤဘၣ်တၢ်ကိးအီၤလၢ ကီၢ်အၣ်ရးအပူၤန့ၣ်လီၤ. စီၤအၤဘြၤဟၣ်မ့ၢ် ပှၤတဂၤလၢအိၣ်ဒီး တၢ်စူၢ်တၢ်နာ်လၢ အလီၤဆီဒိၣ်မးန့ၣ်လီၤ. ဘၣ်ဆၣ်ခဲအံၤ အတၢ်စူၢ်တၢ်နာ် ဘၣ်တၢ်မၤကွၢ်အီၤလံ.

ယဟိဝၤယွၤစံးဘၣ် စီၤအၤဘြၤဟၣ်လၢ ကဘၣ်ဟးထီၣ်လၢ ကီၢ်လၢအဝဲအိၣ်ဖျဲၣ်လၢ အပူၤန့ၣ်လီၤ. ဒီးအဝဲကဘၣ်သုးအသးဆူ ထံကီၢ်အဂၤတဘ့ၣ် လၢဘၣ်တၢ်ကိးအီၤလၢ ကီၢ်ကနၤဧၣ်န့ၣ်လီၤ. စီၤအၤဘြၤဟၣ် ဒိကနၣ်ဝဲဒီး တမၤယံာ်မၤနီၣ်အသးဘၣ်. အမါနီၢ်စၤရါ, အဖိဒိၣ်ခွါစီၤလိာ် ဒီးအကုၢ်အပှၤတဖၣ်န့ၣ် လဲၤဃုာ်တၢ်ဒီးအီၤလီၤ. လဲၤတၢ်ဒ့ၣ်စၢၤ ဖးယံၤဝံၤဒီးတုၤ လၢကီၢ်ကနၤဧၣ်န့ၣ်လီၤ. ဒီးသူၣ်ထီၣ်ဒဲလၢ ကအိၣ်ဝဲဆိးဝဲလၢအပူၤလီၤ. ယဟိဝၤယွၤအၢၣ်လီၤအီလီၤ စီၤအၤဘြၤဟၣ်လၢ ကဒုးကဲထီၣ်အီၤလၢ ပှၤကလုာ်ဖးဒိၣ်, ကဆိၣ်ဂ့ၤ ပှၤဟီၣ်ခိၣ်ဖိ ခဲလၢာ်ခီဖျိလၢအီၤ, ဒီးကဟ့ၣ်လီၤ အချံအသၣ်လၢ ကီၢ်ကနၤဧၣ်န့ၣ်လီၤ.

စီၤအၤဘြၤဟၣ် ဒီးစီၤလိာ်ထူးထီၣ်တီၤထီၣ်ဝဲလီၤ. အဝဲသ့ၣ်အသိ, မဲာ်တဲးလဲးဒီးဂီၤဘုၣ်ဂီၤဖံးတဖၣ် အါထီၣ်ဂီၢ်ထီၣ်လီၤ. စီၤအၤဘြၤဟၣ် တမ့ၢ်ပှၤလၢ အအဲၣ်လီၤထဲအသးဘၣ်အဃိ ပျဲဝဲစီၤလိာ်လၢကဃုထၢဝဲ တၢ်လီၢ်လၢအဝဲဘၣ်အသးန့ၣ်လီၤ. ဒီးစီၤလိာ်ဃုထၢဝဲ ဟီၣ်ခိၣ်လၢအထူးအစီဂ့ၤ လၢထံကျိယၢ်ဒ့ၣ်အဃၢၤ ဒီးအိၣ်ဆိးဝဲဖဲတၢ်လီၢ်လၢအဘူးဒီး ဝ့ၢ်စဒိၣ်န့ၣ်လီၤ. ဘၣ်ဆၣ် ပှၤပိာ်ခွါတဖၣ်လၢ ဝ့ၢ်စဒိၣ်အပူၤ မ့ၢ်ပှၤတဖၣ်လၢ အမၤကမၣ်မုၣ်မၤကမၣ်ခွါဒီးမၤတၢ်ဒဲးဘးအၢအၢသီသီလၢ ယဟိဝၤယွၤအမဲာ်ညါန့ၣ်လီၤ.

လၢခံန့ၣ် ယဟိဝၤယွၤစံးဘၣ်ကဒီး စီၤအၤဘြၤဟၣ်လၢ ကမၤအါထီၣ်ဝဲ အချံအသၣ်ဒ် မူခိၣ်ဆၣ်ဧိၤဖီဧိၤတဖၣ် အသိးန့ၣ်လီၤ. စီၤအၤဘြၤဟၣ်နာ်ဝဲ တၢ်စံးပာ်အဝဲန့ၣ်လီၤ. ဘၣ်ဆၣ် အမါသးဘိ နီၢ်စၤရါတခီ မ့ၢ်ပှၤတူာ်ဖိန့ၣ်လီၤ. ဖဲစီၤအၤဘြၤဟၣ် အသးအိၣ် ၉၉ နံၣ်ဒီး, နီၢ်စၤရါအိၣ်အနံၣ် ၉၀ ဃၣ်ဃၣ်အခါ, ယွၤစံးဘၣ်အဝဲသ့ၣ်လၢ ကဒိးန့ၢ်ဘၣ်ဖိခွါတဂၤန့ၣ်လီၤ. ဒ်ယွၤစံးဝဲအသိး နီၢ်စၤရါအိၣ်ဖျဲၣ်ထီၣ် အဖိခွါစီၤအံၤစဲးန့ၣ်လီၤ. စီၤအၤဘြၤဟၣ် အဖိအဂၤအိၣ်ဘၣ်ဆၣ် တၢ်အုၣ်က့ၤခီၣ်က့ၤကစၢ်လၢ ဘၣ်တၢ်စံးပာ်အီၤလၢ ဧ့ၤဒ့ၣ်အပူၤန့ၣ် ကဟဲအိၣ်ဖျဲၣ်ထီၣ်လၢ စီၤအံၤစဲးအစၢၤအသွဲၣ်န့ၣ်လီၤ.

အခါဖဲန့ၣ်, စီၤလိာ်ဒီးအဟံၣ်ဖိဃီဖိ အိၣ်ဝဲဆိးဝဲဖဲ ဝ့ၢ်စဒိၣ်အပူၤန့ၣ်လီၤ. ဘၣ်ဆၣ်စီၤလိာ်လၢအမ့ၢ် ပှၤတီပှၤလိၤန့ၣ် တအိၣ်မူဝဲဒ်သိးဒီး ပှၤဝ့ၢ်ဖိတဖၣ်လၢ အမၤတၢ်မၤကမၣ်မုၣ်မၤကမၣ်ခွါန့ၣ်ဘၣ်. ဖဲယဟိဝၤယွၤ ပာ်လီၤအသးလၢ ကမၤဟးဂီၤ ဝ့ၢ်စဒိၣ်အခါ, ဆှၢလီၤဝဲ မူခိၣ်ကလူးတဖၣ်ဒ်သိး ကဟ့ၣ်ပလီၢ်ဝဲစီၤလိာ်ဘၣ်ဃးဒီး တၢ်စံၣ်ညီၣ်လၢ အကဟဲအဂ့ၢ်န့ၣ်လီၤ. မူခိၣ်ကလူးတဖၣ် ဆီၣ်ထွဲစီၤလိာ်ဒီး အဟံၣ်ဖိဃီဖိလၢ ကဃ့ၢ်ထီၣ်ကွံာ်လၢ ဝ့ၢ်စဒိၣ်အပူၤ ဒီးဒ်သိးအသုတကွၢ်ကဒါက့ၤ အလီၢ်ခံတဂ့ၤန့ၣ်လီၤ. တၢ်န့ၣ်အလီၢ်ခံ, ယွၤဒုးစူၤလီၤ ကးဒီးမ့ၣ်အူ လၢဝ့ၢ်စဒိၣ်ဒီး ဝ့ၢ်လၢအအၢအသီ ဂမိရၤအဖီခိၣ် ဒီးမၤဟးဂီၤကွံာ် ပှၤဝ့ၢ်ဖိတဖၣ်ခဲလၢာ်လီၤ. စီၤလိာ်ဒီးအဖိမုၣ်ခံဂၤ ပူၤဖျဲးကွံာ်ဝဲလီၤ. ဘၣ်ဆၣ်ဒီး စီၤလိာ်အမါကွၢ်ကဒါက့ၤအလီၢ်ခံလီၤ. ဘၣ်သ့ၣ်သ့ၣ် အဝဲလီကီထွဲက့ၤတၢ်လၢ အပာ်တ့ၢ်ဝဲတဖၣ်အဃိန့ၣ်လီၤ. အဝဲတဒိကနၣ်တၢ်အဃိ ဘၣ်သံဝဲဒၣ်လီၤ.

​—ဘၣ်တၢ်ဒိးသန့ၤထီၣ်အီၤလၢ ၁ မိၤၡ့ ၁၁:၁၀-၁၉, ၃၈ န့ၣ်လီၤ.