Na kilumbu ya 7 Mars 2022, mize mosi ya yimpa zibukaka na Israël yina kena kumonisa kibakala ya Bambangi ya Yehova ntangu Banazi vuandaka niokola bau. Mize yango kele na Centre d’éducation humaniste de la Maison des combattants du ghetto na Galilée occidentale, mpe bakena kumonisa yau na Arabe, na Anglais, mpe na Hébreu. Yakevuanda kaka ya kuzibuka tii na Mars 2023. Na kuvuandaka na nguizani na bantu yina kesalaka na mize, bampangi ya babakala mpe ya banketo kuluta 50 ya yinza ya mvimba pesaka maboko na mambu metadila Istuare, graphisme, mpe mbangudulu.

Mize yango ya kitoko kele na nkumbu ya “Wedontdothat,” yina zola monisa «Beto kesalaka yau ve», babakaka nkumbu yango na nkumbu yina kisadi mosi yina ketadilaka mambu metadila kukotila yinsua ya bantu na Allemagne pesaka na mpangi Joachim Alfermann, mosi ya Bambangi ya Yehova yina Banazi niokolaka. a Atako na yinsi ya mpasi ya ngolo, kubulua, mpe kutulua na kisika na yandi mosi, mpangi Joachim mangaka kukota na kisalu ya kisoda ya Allemagne, yandi vuandaka tuba: “Beto kesalaka yau ve.” Na manima batindaka yandi na centre de concentration samu yandi mangaka kisalu ya kisoda. Komisere ya mize yango, Madame. Yaara Galor, tubaka: “Na pembeni ya Bayuda yina bakufuaka samu na bamfunu mutindu na mutindu vuandaka na bamilion ya bantu yankaka. . .  Konso grupe yango kele na Istuare na yau.”

Kilumbu bavuandaka zibula mize yango, profesere. Gideon Greif, yina mezaba mbote mambu ya Istuare ya Shoah mpe camp ya Auschwitz, yandi tubilaka diaka mutindu Bambangi ya Yehova mangaka kutula sinyatire na mikanda yina vuandaka lomba babika kiminu na bau. Yandi tubaka: “[Bambangi ya Yehova] lendaka baka kuandi kimpuanza kondua mpasi—balendaka kuandi kutula sinyatire kondua mpasi na miniti mosi ya pamba. Yau memonisa ti, ata na bantangu ya mpasi ya ngolo ya mambu metadila bantu na yinza ya mvimba, yakele na bantu yina nungaka kubikana ya kukuikama, yavuanda na bampova na bau, mpe na bisalu na bau. Na yau, yamebonga kutubila masolo ya Bambangi ya Yehova yango, kubambukila bau moyo, kulanda kifuani na bau, mpe kulonguka luzingu na bau samu na kubaka malongi.”

Mpangi mosi ya nketo yina kesalaka na filiale ya Israël mpe yina kuendaka na lukutakanu ya kuzibuka ya mize yango tubaka: “Maza meso bimaka munu na kumonaka ti beto mekuma na mize ya mutindu yayi, yina mezibuka awa na Israël samu na bantu nionso. . . Munu kezimbakana ve mutindu munu vuandaka kuwa bantu yina kesalaka na mize yango kena kutuba na ndinga ya hébreu na zulu ya estrade nkumbu ‘Bambangi ya Yehova’. Kondua ntembe, nkumbu ya Yehova pesamaka nkembo na lukutakanu yango.”

Beto mendimisama ti bantu yina kekuenda tala mize yango kebaka malongi samu na kibakala mpe kiminu ya bampangi na beto ya babakala mpe ya banketo na Allemagne na ntangu ya Banazi. Kifuani ya kiminu na bau lenda kindisa bisadi ya Yehova ya bilumbu na beto na kutatamana ‘kuzawula na kukanga ntima.’—Baebreo 12:1.