Na kilumbu ya 19 Juin 2022, mpangi Patrick Hecker, yina kele na komite ya filiale ya Mozambique, tubilaka kubimisama ya Biblia Mbangudulu ya yinza ya yimpa ya Masonukua ya Greki ya Buklisto na ndinga ya Lomwe. Programe yango yina vuandaka luta na nzila ya video, tubilaka kubimisama ya Biblia yango na mutindu ya kutanga na bapareyi. Mingi ya bansamuni ya bimvuka ya ndinga ya Lomwe landaka programe yango na Bayinzo ya Kimfumu na bau, mpe konso muntu yina vuandaka na lukutakanu yango bakaka Biblia na yandi mosi ya papie.

Babiblia ya ndinga ya Lomwe kevuandaka deja banda mvula 1930, kasi yakelombaka mbongo mingi samu na kubaka yau mpe yakele na ntubulu ya ntama. Diaka, yakevuandaka ntangu nionso puelele ve. Na kifuani, bambangudulu yina kevuandaka deja, mebangula Luka 23:43 mutindu yayi: “Ya kedika, munu kena kutubila nge bubu yayi, nge kevuanda na munu na dizulu.” Mbangudulu ya yinza ya yimpa mebangula verse yango na mutindu ya puelele mpenza, ya metuba: ‘Ya kedika munu kena kutubila nge bubu yayi ti, nge kevuanda na munu na Paradiso.’

Mosi ya bambangudi metuba mutindu yayi samu na Biblia: “Mbangudulu ya yinza ya yimpa ya Masonukua ya Greki ya Buklisto na ndinga ya Lomwe kele puelele mpe yakele mpasi ve samu na kutanga. Kondua ntembe bampangi kebakusa mbotembote mfunu ya Masonukua mpe yau ketinda bau basadila mambu yina bakena kulonguka.”

Beto mendimisama ti Biblia yango kesadisa bampangi na beto ya babakala mpe ya banketo batatamana kupusana penepene na Yehova mpe basadisa bantu yina bakena kukutana na bau na kisalu ya kusamuna.—Matayo 5:3.