BAVERSE YA BIBLIA YINA BAMESASILA
Baroma 10:13—‘Kubokila nkumbu ya Mfumu’
‘Nkonso muntu yina kebokila nkumbu ya Yehova yandi kevuka.’—Baroma 10:13, Biblia Mbangudulu ya Nsi-Ntoto ya Mpa.
“Muntu na muntu yina kebokila nkumbu ya Mfumu yandi kevuka.”—Baroma 10:13, Biblia haut fleuve.
Nsasulu ya Baroma 10:13
Nzambi keponaka bilungi ve, mpe yandi mepesa bantu nionso diluaku ya kuvuka mpe ya kubaka luzingu ya mvula na mvula, yatadila ve dikanda, nkanda, bakalasi yina yandi metanga, yavuanda bakele bamvuama to bamputu. Kasi, samu beto baka mambote beto fueti bokila nkumbu ya Nzambi Nkua-Ngolo-Nionso. a—Nkunga 83:18.
Na Biblia, bampova ‘kubokila nkumbu ya Yehova’ monisa kaka ve kuzaba nkumbu ya Nzambi mpe kusadila yau na nsambudulu. (Nkunga 116:12-14) Yamelomba diaka kutudila Nzambi ntima, mpe kundima ti yandi kesadisa beto.—Nkunga 20:7; 99:6.
Nkumbu ya Nzambi vuandaka na mfunu mingi samu na Yesu Klisto. Bampova ya ntete na kisambu na yandi ya kifuani vuandaka: ‘Tata na beto yina kele na dizulu, nkumbu na nge zitisua,’ to yakuma ya nlongo. (Matayo 6:9) Yesu mpe monisaka ti beto fueti zaba, kuzitisa, mpe kuzola Yehova kana beto zola baka luzingu ya mvula na mvula.—Yoane 17:3, 6, 26.
Samu na yinki beto lenda tuba ti Yehova kele Mfumu yina Baroma 10:13 metubila na Biblia haut fleuve? Samu bampova ya verse yango vutukilaka bampova ya Yoele 2:32, kisika nkumbu ya Nzambi kele na masonukua ya Ebreo ya ntama, kasi yavuandaka ve titre “Mfumu”. b
Mambu yina bakena kutubila na Baroma 10:13
Na Baroma kikapu 10, Biblia memonisa ti konso muntu yina kele na nguizani ya mbote na Nzambi yandi fueti ndimina Yesu Klisto samu yandi vuka. (Baroma 10:9) Baverse mingi ya masonukua yina bakebokidilaka mbala mingi Testama ya ntama mendimisa dibanza yango. Muntu kemonisaka kiminu ntangu “yandi ketubaka puelele,” yazola tuba kusamunina bantu yina kele na kiminu ve nsangu ya mbote ya luvuluzu. Yau kepesaka bantu diluaku ya kumonisa kiminu yina kenataka na luzingu.—Baroma 10:10, 14, 15, 17.
Tanga Baroma kikapu 10 na noti na yinsi ya paje, nsasulu ya bampova yina nge zaba mbote ve.
a Nkumbu ya Nzambi kele mbala kana 7 000 na bamaniskri ya ntama ya Biblia. Na Ebreo, nkumbu ya Nzambi kesonamaka na baletre yiya (4), bakebokidilaka yau tetragrame. Mbala mingi bakebokidilaka nkumbu ya Nzambi “Yehova” na Kikongo ya Leta; kasi bantu yankaka ya mayele kemonaka mbote kubokidila yau “Yave.”
b Yamemonana lokola bantu yina sonikaka Biblia ya Buklisto sadilaka nkumbu ya Nzambi ntangu bavutukilaka bampova ya “Testama ya ntama” yina vuandaka na nkumbu yango. Diksionere mosi (The Anchor Bible Dictionary) Metuba: “Yakele na bidimbu yina memonisa ti tetragrame ya nkumbu ya Nzambi, Yave, yina vuandaka na masonukua yankaka to nionso ya Testama ya ntama vutukilaka diaka na Testama ya yimpa.” (Volimi 6, paje 392) Samu na kuzaba mambu yankaka, tala “Nkumbu ya Nzambi na kati ya masonukua ya Greki ya Buklisto” na Apendisi A5 na Biblia ya ndongokolo ya Biblia Mbangudulu ya Nsi-ntoto ya Mpa na francais. Apendisi C2 yakele na liste ya bambangudulu mingi ya Biblia yina mesadila nkumbu ya Nzambi na Baroma 10:13.
Tala diaka...
MALONGI YA BIBLIA
Bisadulu samu na kulonguka Biblia
Pona bisadulu ya ndongokolo ya Biblia yina kesala ti ndongokolo na nge vuanda ya mbote mpe yina kekuenda na ntuala.
MALONGI YA BIBLIA
Meka ndongokolo na beto ya Biblia
Banda ndongokolo ya Biblia ya ofele na wola mpe kisika yina nge kepona.
