Kimbevo kia Ntelamw’a Moyo Kisayananga mu Nza Yawonso
“Nkumbu miayingi itokananga kana nkutu vo kina ye kuma kiasikila ko.”
“Vava ikalanga kiambote, vana vau imonanga o wonga. Nzeye wo vo vava imonanga e kiese kiayingi, ke veviokanga kolo ko ikendalalanga kwayingi.”
“Ivanganga mawonso muna zinga konso lumbu lembi tokanena oma mambazi. Kansi ezak’e ntangwa, mambu mawonso mu nkumbu mosi melwakanga.”
E mvovo miami mia wantu ana benuananga ye kimbevo kia ntelamw’a moyo. Nga ngeye mpe i wau omonanga? Nga ozeye muntu ankaka yovo ngeye kibeni onuananga mpe ye kimbevo kiaki?
Kala ye ziku vo kuna ngeye mosi ko. O unu, wantu ayingi mpe benuananga ye kimbevo kia ntelamw’a moyo, kiakala yau kibeni yovo awana betoma zolanga.
Kalukatikisu ko vo mu “nsungi zampasi ye vonza” tuzingilanga ezi zikututwasilanga ntokani zasaka. (2 Timoteo 3:1) Lufimpu lumosi lusonganga vo, vana vena wantu nana omu nza, mosi muna yau onuananga ye kimbevo kia ntelamw’a moyo. Muna mvu wa 2020, e vuku kia COVID-19, kiawokesa o lutangu lwa wantu bakala ye ntokani zasaka ye kimbevo kia lukendalalu lwasaka ke mu mvu wa 2019 ko. Se vioka 78 lwa milhões ma wantu babakama e kimbevo kiaki.
Diamfunu mu zaya o lutangu lwa wantu beyelanga e kimbevo kia ntelamw’a moyo. Kansi edi disundidi o mfunu, i zaya una ngeye ye awana ozolanga numonanga ye una nunatinanga e zingu kieno.
Nki i kimbevo kia ntelamw’a moyo?
O muntu kena yo ntelamw’a moyo ko okalanga kiambote muna nitu ye otoma lungisanga e salu yandi. Olendanga zizidila e ntokani, sala mu mpila yambote ye oyangalelanga e zingu kiandi.
Ntokani zasaka . . .
-
Ke disongele ko vo o muntu diambu diambi kavangidi yovo ntovoki.
-
Ke foti a muntu ko kansi i kimbevo kifilalanga o muntu mu kala ye ntokani zasaka, ngindu zabendomoka muna yandi kibeni, lembi kala ye tezo ye kadilu kialembi songa.
-
Zilenda fila o muntu mu lembi kala ye ngwizani ambote ye akaka yo lembi toma lungisa e salu yandi ya lumbu ke lumbu.
-
E kimbevo kiaki kilenda lwakila wantu a ntela zawonso, kisi nsi, se kia nitu kiaswaswana, makanda, ye dibundu.
Lusadisu kwa awana beyelanga e kimbevo kia ntelamw’a moyo
Avo ngeye yovo yitu kiaku oyantikidi mona e nsobani muna kadilu kiandi nze, leka kwayingi yovo vempoka o tulu, dia kwayingi yovo kondwa kwa té, tokana kwayingi yovo kendalala mu kolo kiayingi, nanga ediadi divava vo wavava lusadisu mu zaya kana vo una ye kimbevo kiaki yo tambula mawuku. Kansi akweyi olenda vavila o lusadisu lwalu?
Yesu Kristu wa muntu osundidi e ngangu wazinga kala, wavova vo: ‘Awana bena yo vimpi ke bevuanga ngang’a mawuku mfunu ko, kansi ambevo yau bevuanga anganga o mfunu.’ (Matai 9:12) Awana benuananga ye kimbevo kiampasi, avo bawukilu mu mpila yambote, balenda kulula e mpasi yo vutukila e kiese kiau. Diambote kwa wantu awaya mu vava lusadisu lwa madotolo vana vau vava beyantikanga mona e sinsu ya kimbevo kiaki. a
Kana una vo e Bibila ke nkanda wa mawuku ko, mana kivovanga malenda kutusadisa mu kulula o ntelamw’a moyo. Tulombele watanga e malongi malende mesonganga una e Bibila kilenda kutusadisila mu zizidila e kimbevo kia ntelamw’a moyo.
a Eyingidilu ke diyikanga mawuku masikididi ko mana o muntu kafwete baka. Konso muntu kafwete baka e nzengo yandi kibeni mu kuma kia mpila mawuku kevava.
Nanga Oyangalela Mpe Malongi Mama
MVUTU ZA YUVU YA BIBILA
Nga Bibila Kilenda Kunsadisa Muna Ntangw’a Lukendalalu?
Vena ye mambu tatu kevananga o Nzambi kuna mvevo mesadisanga muna sunda lukendalalu lwa saka.
ESSENTIAL BIBLE TEACHINGS
Ekuma Nzambi Keyambulwilanga e Mpasi?
Wantu ayingi beyuvulanga e kuma e nza izadidi ye kimpala ye mpasi. E Bibila kivananga e mvutu za kiese ye lufiaulwisu muna kiuvu kiaki.
KWAMANANA YINGILA!
O Ntelamw’a Moyo Kuna kwa Aleke mu Wokela Kaka Wina—E Bibila Adieyi Kivovanga?
E Bibila kivanga malongi malenda sadisa aleke mu sunda ntelamw’a moyo.
TU AKI NANI
Lomba Beza Kukingula
Zaya e mvutu za Bibila mu kuma kia kiuvu kiaku, yovo zaya mayingi mu kuma kia Mbangi za Yave.
