Longoka Muna Nkand’a Nzambi

Ekuma Akristu Bevubilwanga?

Elongi diadi divovela yuvu olenda kala yau yo songa fulu olenda tangila mvutu muna Nkand’aku a Nzambi. Mbangi za Yave bekala ye kiese mu fimpa e yuvu yayi yo ngeye.

1. Luvubu lw’Akristu, nkia nsasa lwina?

Luvubu i diambu divavwanga mu kala ye ngwizani ambote yo Nzambi. Muna kuma kiaki, o Nkristu kafwete vubwa vava kelwaka muna ntel’a longoka oma ma Nzambi yo kituka nlongoki a Yesu, kansi ke muna kinsedia ko. (Mavangu 8:12; 1 Petelo 3:​21) Tukitukanga nlongoki a Yesu vava tulongokanga yo vanga mana kekutukanikinanga.​—Tanga Matai 28:​19, 20.

Muna lumbu ya ntumwa za Yesu, ndonga babaka e nzengo vana vau mu longoka mu kuma kia Nzambi yo Yesu. Kasikil’owu, vava muntu mosi kazaya vo lufwa lwa Yesu i lwaziula e nzil’a luvuluzu, vana vau wakituka nlongoki a Yesu. O unu, wantu ayingi akwa ntima miansongi bekitukanga alandi a Yesu.​—Tanga Mavangu 8:​26-31, 35-38.

2. Ekuma Yesu kavubilwa?

Yesu mvu 30 kakala miau vava Yoane wa Mvubi kamvuba muna maza ma Nkoko a Yodani. Luvubu lwa Yesu lwasonga e nzengo zandi za vanga luzolo lwa Nzambi. (Ayibere 10:7) Ediadi diavavanga vo kavana moyo andi se kimenga mu kuma kia masumu ma wantu. Kana nkutu una kayizidi ko ova ntoto, Yesu wazolanga yo lemvokela Yave wa S’andi.​—Tanga Maku 1:​9-11; Yoane 8:29; 17:5.

3. Ekuma Nkristu kafwete vubilwa?

Nswaswani yo Yesu, yeto mun’esumu tuwutukilanga. Kansi, o lufwa lwa Yesu lwaziula e nzila kimana twakala ye ngwizani ambote yo Nzambi. (Roma 5:​10, 12; 12:​1, 2) Owau tulenda kala amosi muna wan’andi. (2 Korinto 6:​18) Aweyi tulenda vwila elau diadi? Muna sambu kieto kuna beko, tukiyekolanga kwa Yave yo sia nsilu wa vanga luzolo lwandi muna zingu kieto kiawonso. I bosi, tuvubwanga muna maza mu songa sinsu kia kuyiyekola kweto vana meso ma wantu.​—Tanga Matai 16:24; 1 Petelo 4:2.

4.  Aweyi olenda kuyifwanisina mu vubwa?

Mbangi za Yave belongokanga Nkand’a Nzambi y’awana bazolele finama Nzambi. O longoka Nkand’a Nzambi yo kwenda muna tukutakanu tw’Akristu disiamisa o zola yo lukwikilu lwaku muna Nzambi. Ediadi dikusadisa mpe mu yima fu yambote. O song’o zola, lukwikilu ye fu yakaka ya Nzambi dikusadisa mu lungisa o nsilu aku wa sadila Yave yakwele mvu.​—Tanga Yoane 17:3; Ayibere 10:​24, 25.

Muna zaya diaka mambu makaka, tala kapu kia 18 kia nkanda wau, wavaikiswa kwa Mbangi za Yave. O Nkand’a Nzambi Adieyi Kieleka Kelonganga?