MOKO KIA MAMBU MA NZAMBI
Nga Nzambi Otokananga mu Kuma kia Mpasi Zeto?
Tala e mpila moko kina Mbangi za Yave balenda mokena ye mfinangani zau. Yindula vo Mbangi a Yave nkumbu andi Maria, wele kuna nzo a Sofia.
EKUMA NZAMBI KEYAMBULWILANGA E DIADI?
Maria: Finkanda-nkanda fiafi yikayanga kwa wantu awonso mu zunga kiaki, fina yo ntu a diambu vo: Nga Zolele Zaya e Ludi? E fiafi i fiaku.
Sofia: Nga diambu dia Nzambi fivovelanga?
Maria: Ingeta. Tala yuvu sambanu yina mu lukaya lwantete. Nkia kiuvu—
Sofia: Vingila. Ntangwa ankatu una viokesa mu mokena yame.
Maria: Ekuma ovovele wau?
Sofia: E kuma kadi kina ye ziku ko kana vo ikwikilanga muna Nzambi.
Maria: Ntondele muna ngindu zaku. Tuka kolo i wau oyindulanga?
Sofia: Ve, munkwikizi yakala. Kansi, se kolo yayambula kwenda ku nzo a nzambi.
Maria: Mbakwidi. Kansi, yambula yazayisa e nkumbu ame. E nkumbu ame Maria.
Sofia: Omono nkumbu ame Sofia.
Maria: Ngyangalele muna kuzaya.
Sofia: Mono mpe ngyangalele.
Maria: E Sofia, kizidi kukomekena ko kimana wakwikila muna mana ikwikilanga. Kansi, unzayisa. Nga vena ye diambu diafila mu katikisa kana vo Nzambi una?
Sofia: Ingeta. O ngudi ame wadiatwa kwa kalu se vioka mvu 17.
Maria: Eh, nkenda! Nga wavanguka?
Sofia: Ingeta. Wakituka se koka.
Maria: Diankenda kikilu. Ka lukatikisu ko vo mpasi dikuvanganga.
Sofia: Mpasi kibeni. E kiaki i kuma ikatikisilanga kana vo Nzambi una. Ikiyuvulanga, ekuma Nzambi keyambulanga vo twamona e mpasi?
NGA DIAMBI MU YUVULA E KIUVU KIAKI?
Maria: E ngindu zaku ke zambi kwandi ko. Vava tumonanga e mpasi ke diambi ko mu vava zaya e kuma. Kana nkutu selo ya Nzambi kuna nz’ankulu bavava o zaya e kuma Nzambi keyambulwilanga e mpasi.
Sofia: Kinga?
Maria: Ingeta. Nga ozolele mona e ziku kia diambu diadi muna Nkand’a Nzambi?
Sofia: Ingeta.
Maria: Tala dina Kabakuke wa selo kia kwikizi kayuvula kwa Nzambi muna nkanda Kabakuke, kapu kia 1 tini kia 2 ye kia 3: “E Yave, nkia kolo mboka, ngeye kuwe? Ikukazila muna ngungula, kuvuluza ko. Nkia kum’okunsongela bi?” Nga yuvu yayi ke yafwanana ko ye yuvu tuvanganga o unu?
Sofia: Ingeta, yafwanana kikilu.
Maria: Nzambi katumba Kabakuke ko mu kuma kia yuvu yayi ngatu kuvovesa vo lukwikilu lwakete kakala lwau.
Sofia: Diakiese mu zaya ediadi.
YAVE KE YANGALELANGA MPASI ZA WANTU KO
Maria: Nkand’a Nzambi ulonganga vo Nzambi omonanga e mpasi zeto ye otokanenanga zo.
Sofia: Adieyi ozolele vova?
Maria: Yambula yasonga e diambu diadi muna Luvaiku 3:7. Nga olenda tanga e sono kiaki?
Sofia: Ingeta. Kivovele vo: “O Yave oku vo: Mbwene mbangam’a nkangu ame wina muna Engipito, ngwidi kazu kiau muna kuma kia mbuta za salu, kadi nzeye mpasi zau.”
Maria: Ntondele. Nze una otangidi, nga Nzambi omonanga e mpasi za nkangu andi?
Sofia: Ingeta, omonanga zo.
Maria: Zaya dio vo Nzambi kemonanga kaka mpasi zibwanga ko. Tala e mvovo miansuka mia sono kiaki. Nzambi ovovele vo: “Nzeye mpasi zau.” Nga e mvovo miami misonganga vo Nzambi nkwa nsoki ye ke kutuvwanga mfunu ko?
Sofia: Ve kikilu.
Maria: O Nzambi kemonanga kaka mpasi zeto ko, kansi okendalalanga vava tumonanga e mpasi.
Sofia: Dialudi.
Maria: Yambula twatanga diaka sono kia Yesaya 63:9 kisonganga una kamona o Nzambi vava nkangu andi bamonanga e mpasi. E tini kiantete kivovele vo: “Muna mpasi zau zawonso i kamwene mpasi.” Nga Nzambi wamona e mpasi za nkangu andi?
Sofia: Ingeta, wamona zo.
Maria: E Sofia, e ziku kia diambu i kiaki: Nzambi okutuvwanga kieleka o mfunu. Omenganga e mpasi tumonanga. Vava tukendalalanga, yandi mpe okendalalanga.
EKUMA KEZINGILANGA MU FOKOLA E MPASI?
Maria: Vitila ngienda, nzolele kusonga sono kiakaka.
Sofia: Ka diambu ko.
Maria: Badika dina Nkand’a Nzambi ulonganga mu kuma kia nkuma wa Nzambi. E sono i kiaki, Yeremiya 10:12. Nga olenda tanga?
Sofia: Ingeta. Kivovele vo: “Oyandi wasemena nza mun’efuka diandi, wasikidisila yo muna ngangu, wayalumwin’ezulu muna umbakuzi.”
Maria: Ntondele. Yambula twabadika e sono kiaki. Nga ke diavavanga ko vo Nzambi kakala yo nkuma wafwana muna vanga lekwa yawonso?
Sofia: Nkuma kikilu diavavanga.
Maria: Avo Nzambi una yo nkuma wavanga lekwa yawonso yituzungidi, nga kena yo nkuma wa lunga-lunga e vangwa yandi ko?
Sofia: Ingeta, una wau.
Maria: Yindula dina diabwila ngudi aku. Ekuma okendalalanga mu kuma kia mpasi za ngudi aku?
Sofia: E kuma , zola itoma kunzolanga. Oyandi i ngudi ame.
Maria: Kele vo wakala yo nkuma wa kunwuka, nga kwadi wo vanga ko?
Sofia: Elo.
Maria: Yindula ediadi. Nkand’a Nzambi ulonganga vo Nzambi ozeye mpasi zeto, omonanga e ntantu mu kuma kieto ye una yo nkuma wafwana. Ozevo, ekuma Nzambi kekangilanga o ntima yo lembi fokola e mpasi zeto yamu unu?
Sofia: Kiasidi yindula yo diambu diadi mu mpila yayi ko.
Maria: Ediadi nga ke disonganga ko vo Nzambi una ye kuma kiampwena mu lembi fokola e mpasi zeto? *
Sofia: Huu, nanga kuma kiampwena kikilu kena kiau.
Maria: E telefone aku mu bokela ina, ozevo, mfwete vutuka lumbu kiakaka muna kwamanana e moko kieto.
Sofia: Ntondele. Bosi ikuvingila. *
Nga una ye kiuvu kina ovavilanga zaya e mvutu muna Nkand’a Nzambi? Nga ozolele zaya dina Mbangi za Yave bekwikilanga? Avo i wau, kukadi ye lukatikisu ko lwa yuvula kwa mosi muna Mbangi za Yave. Yandi okala ye kiese kia mokena yaku mambu mama.
^ tini. 61 Elongi dilanda disonga ekuma Nzambi keyambulwilanga e mpasi.
^ tini. 64 Muna zaya diaka mambu makaka, tala kapu kia 11 kia nkanda, O Nkand’a Nzambi Adieyi Kieleka Kelonganga? wavaikiswa kwa Mbangi za Yave.
