EKUMA AKAKA BEKATIKISILANGA? Lufimpu lumosi lwavangwa lusonganga vo muna buka kia ntetembwa kina mfinangani ye ntoto, muna ye malundu 100 (100 bilhões) ma planeta. Ayingi vava bemonanga o nene wa nsema beyindulanga vo ‘Mvangi wa Mpungu-ngolo kalendi lunga-lunga mpasi wantu ko.’

NKAND’A NZAMBI ADIEYI ULONGANGA? Nzambi katuvana kaka Nkand’a Nzambi ko yo kutumbembola. Kansi, okutusilanga nsilu vo: “Ikulongesela, yo kusia meso.”—Nkunga 32:8.

Badika nona kia Anga wa nkento a mwisi Engipito ona wazinga muna tandu kia 20 vitila tandu kieto (V.T.K.). Anga wakondwa Sarai wa mfumu andi o luzitu, muna kuma kiaki Sarai wanyinga, vo i Anga watina kuna makanga. Nga Nzambi wabembola Anga wau vo vilwa kavanga? Nkand’a Nzambi uvovanga vo: “O mbasi a Yave owananini yandi.” Wavovesa Anga vo: “Yave owidi mpasi zaku.” Anga wavova kwa Yave vo: “Onge u Nzambi amoni.”—Etuku 16:4-13.

“Nzambi amoni,” mona mpe kekumonanga. Muna bonga e nona, ngudi anzolwa otoma sianga sungididi kwa mwan’andi musungula avo wakete, kadi eyayi i ntangwa ketoma vwanga mase mandi o mfunu. Diau adimosi mpe, Nzambi okutulunga-lunganga musungula vava tukalanga twayoya yo kendalala. Yave wavova vo: ‘Ikalanga muna fulu kiazanguka ye kiavauka, yo nkwa mwand’akosomoka, anlembami, yavutula mwand’a nlembami, yavutula ntima mi’awana bakosomoka.’—Yesaya 57:15.

Kansi, olenda kiyuvula: ‘Aweyi Nzambi kekumbwenanga? Nga okumfundisanga mun’owu wa mpw’ame yovo osianga sungididi muna kiwuntu kiame yo vava kumbakula?’