NTU A DIAMBU WA FUKWA | AVO MUNTU OFWIDI
Adieyi Dibwilanga Muntu Avo Ofwidi?
“Yayindulanga vo vena ye fulu tatu bekwendanga wantu vava befwanga: Ku zulu, bilungi yovo kuna purgatório. Yazaya wo vo kikwenda ku zulu ko kadi kiakala kibeni muntu ambote ko, kansi yakala ye ziku vo masumu yavolanga ke madi kumfila ku bilungi ko. Kuna diak’e sambu, kiazayanga ko kana nki i purgatório. Kiasala mona malongi mama ko muna Bibila. Kwa wantu kaka yawilanga mo.”—Lionel.
“Yalongoka vo wantu awonso ku zulu bekwendanga vava befwanga, kansi kiakala ye ziku kia diambu diadi ko. Kadi yakwikilanga vo lufwa i mfoko a mambu mawonso, mafwa ka bena diaka ye vuvu kia zinga ko.”—Fernando.
Nanga wakiyuvula kala: ‘Adieyi dibwilanga muntu avo ofwidi? Nga azolw’eto afwa mpasi bemonanga? Nga tukubamona diaka? Aweyi tulenda kadila ye ziku kia diambu diadi?’ Tala dina Bibila kivovanga mu kuma kia yuvu yayi. Entete, yambula twafimpa mana Bibila kivovanga mu kuma kia lufwa. I bosi, tubadika e vuvu kiyikwanga muna Bibila mu kuma kia mafwa.
Adieyi dibwilanga muntu avo ofwidi?
MVUTU ZA NKAND’A NZAMBI: ‘Wantu bazeye wo vo fwa befwa, kansi afwa ke bazeye diambu ko, ngatu kala diaka yo nsendo, kadi o luyindwilu luau luvilakene. O koko kwaku, konso eki kusolol’o vanga, vanga kio ye ngolo zaku; kadi ke vena mfuntu ko yovo lukanu, yovo zayi yovo ngangu muna ziami, kun’okwenda.’ *—Kimpovi 9:5, 10.
E ziami i fulu kizikilwanga o wantu vava befwanga, i sia vo fulu kia kondwa zayi yovo salu. Aweyi Yobi wa selo kia kwikizi kabadikilanga e ziami? Yobi wavidisa mavua mandi mawonso yo wan’andi mu lumbu kimosi, wabakama kimbevo kia mavumbu mu nitu yawonso mantwasilanga ndunzi zayingi. Walomba kwa Nzambi vo: “Kele vo wansweka muna nsi a fwa [ziami] yo kundundila kuna sweki.” (Yobi 1:13-19; 2:7; 14:13) Kieleka, Yobi wabakula vo e ziami ke bilungi bia tiya ko kuna e mpasi zandi zadi sakila. Kansi, fulu kia luvevoko.
Vena ye mpila yankaka tulenda zayila dina dibwilanga muntu avo ofwidi. Yambula twafimpa lusansu lwa wantu nana beyikwanga muna Bibila ana bafutumuka.—Tala e babu, “ Wantu Nana Bafutumuka Beyikwanga mu Bibila.”
Ke mosi ko muna wantu awaya wavova vo ku fulu kiakiese yovo kiampasi katuka. Kele vo wantu awaya batuka ku fulu kiakiese yovo kiampasi nga ka badi wo vova ko vava bafulwa? Nga mana badi vova ka madi sonekwa ko muna Bibila kimana twazaya mo? Bibila ke kivovelanga diambu diadi ko. Wantu nana awaya ke bavova diambu ko mu kuma kiaki. Ekuma? E kuma kadi vava bafwa ka bazaya diaka diambu ko, bakala nze yau baleka. Ezak’e ntangwa, Bibila kitezanesanga lufwa ye tulu. Muna bonga e nona Davidi yo Setefano bakala vo akwa kwikizi, ‘baleka muna [lufwa].’—Mavangu 7:60; 13:36.
Akieyi i vuvu mu kuma kia wantu bafwa? Nga balenda sikameswa?
^ tini. 7 E Tradução do Novo Mundo das Escrituras Sagradas, isadilanga o mvovo “Ziami” muna sekola mvovo wa Kiyibere “Sheol” ye mvovo wa Kingerekia, “Hades.” E nsekola zankaka za Bibila zisekolanga o mvovo wau vo “bilungi,” kansi e longi dia bilungi bia tiya ke dina mu Bibila ko.
