Ku mbanz’a Acul yawutukila, kuna este ya Guatemala. Mase mame esi Ixil, kanda dia Maya. Ndinga zole yavovanga, Espanhol ye nding’ame ya kingutukila. Vava yawutuka, e nsi ya Guatemala mu vita yakala, e vita yayina mvu 36 yazingila. Esi kanda dia Ixil ayingi bafwa muna ntangwa yayina.

Vava yakala ye kimbuta kia mvu 4, o mpangi ame wakala ye mvu 7 wasakananga ye granada, i bosi yabuka. Yafwa meso muna sumbula kiakina, diankenda kikilu vo mpangi ame wafwa. Ke kolo ko, yayenda sansukila kuna sikola y’ampofo kuna mbanz’a Guatemala, i kuna yalongokela masono ma Braile. Kansi, kiabakulanga ko e kuma mfumu za sikola bampovesela vo kimokeninge ye aleke akaka ko. Kiabakulanga mpe ko e kuma akw’ame kuna sikola bantininanga. Kinsona yamonanga, yazolanga vo e ngonde zole yavewanga konso mvu mu kwenda kala yo ngudi ame zafwana mu nzaki, kadi ngudi ame watoma kunzolanga. Diankenda vo ngudi ame wafwa vava yakala ye mvu 10. Vava yamona vo ngudi ame ona watoma kunzolanga ofwidi, yakendalala kikilu.

Vava yalungisa mvu 11, yavutuka kuna mbanza yawutukila, yayenda zinga kumosi yo mbut’ame y’esi nzo andi. Bansadisanga muna kinsuni, kansi ke muntu ko walenda kunsadisa mu sunda lukendalalu. Ezak’e ntangwa yadilanga yo vova kwa Nzambi vo: “Ekuma ngudi ame kafwila? Ekuma yafwila meso?” Wantu bampovesa vo e sumbula yayi mu luzolo lwa Nzambi yavangamena. Ediadi diamfila mu yindula vo Nzambi nkwa nsoki yo ntim’a mbadi. Kiakivonda ko kadi kiakala ye una ndenda wo vangila ko.

Wau vo i mpofo, kialendanga kuyitanina ko, nkumbu miayingi wantu bampanganga mambu mansoni. Kiazayisa mambu mama kwa muntu ko, kadi yakala ye ziku vo wantu ke badi kunkwikila ko. Wau vo wantu ke bamokenanga yame ko, omono mpe kiamokenanga yo muntu ko. Yakivaulanga yo wantu yo kendalala, kiabundanga mpe wantu vuvu ko.

Vava yakala se toko, yakala dimosi yo nkento andi bakala vo Mbangi za  Yave bayiza mokena yame muna ntangw’a vundu kuna sikola. Mosi muna alongi ame wazaya e mpasi zame, yandi wabalomba bamokena yame. Banzayisa nsilu wa Nkand’a Nzambi wa lufuluku lwa mafwa ye w’ampofo besinga mona diaka. (Yesaya 35:5; Yoane 5:28, 29) Yayangalelanga mana bandonganga, kansi diampasi diakala mu mokena yau wau vo kiakala ye fu kia mokena ko. Kana una vo i wau, bakwamanana kunkingula muna kundonga o Nkand’a Nzambi. Akazi awaya bakangalanga vioka kilometa 10 yo tomboka miongo muna lwaka kuna mbanza yazingilanga.

O mpangi ame wanzayisa vo wantu awaya kana una vo batoma vuatanga ke bakala ye nzimbu zayingi ko. Kana una vo i wau, bansonganga e ngemba yo kunkayila e lekwa. Yabakula vo Akristu akieleka kaka balenda vanga e diambu diadi.

Nkanda mia masono ma Braile yasadilanga mu longoka Nkand’a Nzambi. Kana una vo yabakulanga mana yalongokanga, vakala ye mambu kiakwikilanga ko. Muna bonga e nona, kiakwikilanga ko vo Nzambi mfunu kikilu kamvuanga. Kiakwikilanga mpe ko vo wantu balenda kunzayisa Diambu dia Nzambi muna kumfiaulwisa. Yabakula e kuma Nzambi keyambulwilanga e mpasi mu fikolo, kansi diampasi diakala mu kwikila vo Nzambi Se dia nzolwa. *

Kuna kwalanda, mana yalongoka mu Nkand’a Nzambi mansadisa mu soba e ngindu zame. Muna bonga e nona, yalongoka vo Nzambi ofwilanga e nkenda awana bemonanga e mpasi. Nzambi wavova mu kuma kia asambidi andi bamweswanga e mpasi vo: “Mbwene mbangam’a nkangu ame . . . Kadi nzeye mpasi zau.” (Luvaiku 3:7) Vava yamona una Yave kesongelanga e fu yandi yambote, yabaka e nzengo za yekola e zingu kiame kwa yandi. Muna mvu wa 1998, yavubwa yo kituka se Mbangi a Yave.

Muna mvu walanda, yakota curso y’ampofo yavangamena lukufi ye mbanz’a Escuintla. Nkuluntu mosi wabakula e mpasi yamonanga za kwenda ku lukutakanu kuna vata diame. Muna kwenda ku lukutakanu diavavanga vo yakangala kilometa kumi nze zina bakangalanga akazi ana bandonganga Nkand’a Nzambi. Muna kunsadisa, o nkuluntu walomba kwa mpangi mosi kuna mbanz’a Escuintla kimana kantambula mu nzo andi yo kundatanga muna tukutakanu. Tuka lumbu kiakina, mpangi ndioyo wandunga-ndunganga nze mwan’andi.

Ngina ye nona yayingi isonganga o zola kwakieleka bekunsonganga ampangi muna nkutakani. Mawonso mama, mankwikidisa vo Mbangi za Yave i Akristu akieleka.—Yoane 13:34, 35.

Owau, kikendalalanga diaka ko yo kuyimwena vo kina mfunu ko. E zingu kiame se kiakiese. Wau vo ikuyivananga mu salu kia ntangwa ke ntangwa kia longa wantu e ludi kia Nkand’a Nzambi, kisianga diaka sungididi mu mpasi zame ko. Ngina mpe ye lau dia sala se nkuluntu muna nkutakani yo fila malongi ma Nkand’a Nzambi muna nkutakani zakaka. Ifilanga mpe malongi muna tukutakanu twampwena twa Mbangi za Yave.

Muna mvu wa 2010, yakota Sikola ya Nkubama ya Uselo (owau iyikilwanga vo Sikola ya Ateleki a Kintinu) yavangamena kuna El Salvador. Sikola yayi yansadisa mu toma lungisa kiyekwa kiame muna nkutakani. Yabakula vo Yave wa Nzambi mfunu kikilu kekumvuanga, okunzolanga ye olenda fwanisa konso muntu mu sala e salu kiandi.

Yesu wavova vo: ‘Edi diviokele e kiese, dia vana, ke mu tambula ko.’ (Mavangu 20:35) Kiese kiayingi imonanga kina kiamonanga ko, owau ndenda sadisa akaka.