Zasoneka Luka 17:1-37
17 I bosi, ovovese alongoki andi vo: “O mambu malenda tesa o wantu e sakuba kwiza kaka mekwiza. Kansi, tâtu kwa ndiona mekwizila!
2 Diambote kwa yandi kazembelekwa tadi dianene muna nsingu, katubwa muna mbu, ke mu tesesa sakuba ko kwa mosi mun’awaya andwelo.+
3 Nutoma kuyilunga-lunga kweno. Avo mpangi aku usumukini, untumba,+ avo ovilukilu o ntima, unloloka.+
4 Avo nsumuka nsambwadi kekusumukina muna lumbu kimosi, yo kuvutukila nkumbu nsambwadi, oku vo: ‘Mpilukidi o ntima,’ ofwete kunloloka.”+
5 Antumwa bavovese Mfumu vo: “Utukudikila lukwikilu.”+
6 O Mfumu ovovele vo: “Kele vo o nene wa lukwikilu lweno ukala nze mbongo yakete-kete,* nuadi vovesa nti* wau vo: ‘Vuzuka, wayikuna muna kalunga!’ wadi kunulemvokela.+
7 “Nani vovo nuina, una ye ntaudi ovatanga yovo ovungulanga e kambi, avo otombokele muna mpatu, kamvovesa vo: ‘Wiza nswalu oku meza wadia’?
8 Ozevo, nga ke kumvovesa ko vo, ‘Nda kubika madia mame, vuata nlele aku a salu, wansadila yavana idia yo nua, i bosi ongeye odia yo nua’?
9 Nga matondo kevutula kwa ntaudi yayina, wau kavangidi dina kavoveso e?
10 Diau dimosi mpe, oyeno avo nuvangidi mawonso nuvoveso, nuvova vo: ‘Yeto tu mpasi ntaudi. Tuvangidi mana tufwete vanga.’”+
11 Ekolo kelenge kuna Yerusaleme, oviokele muna mwingilu a Samaria ye Ngalili.
12 Ekolo kakotelenge muna vata dimosi, kumi dia wantu, akwa wazi bezidi kunkika, batelamene kuna vala.+
13 Batumbwidi e ndinga, oku vo: “E Yesu, e Nlongi, utufwil’e nkenda!”
14 Vava kabamwene, ubavovese vo: “Nuenda kuyisonga kwa anganga.”+ I bosi, ekolo bekwendanga, bavelele.+
15 Mosi muna yau, vava kamwene vo osasukidi, ovutukidi, okembelele Nzambi muna nding’angolo.
16 Ofukamene vana malu ma Yesu, untondele, kana una vo musi Samaria kakala.+
17 Yesu ovutwidi vo: “Nga ke kumi ko diveleleso e? Ozevo, evua akweyi dina?
18 Ke mosi ko ovutukidi mu kembelela Nzambi, muntu ndioyu kaka wa musi kanda diankaka?”
19 I bosi, umvovese vo: “Telama, wenda kwaku; o lukwikilu lwaku lusaswidi.”+
20 Vava kayuvuilu kwa Afarisi kana nkia ntangwa kikwiza e Kintinu kia Nzambi,+ ubavutwidi vo: “E Kintinu kia Nzambi vava kikwiza ke kimoneka ko;
21 ngatu wantu bavova vo: ‘Tala, eki!’ yovo ‘Tala, kuna kina!’ Kadi, e Kintinu kia Nzambi ova kati kweno i kina.”+
22 I bosi, ovovele kw’alongoki vo: “Vekala ye lumbu ina nukala ye tima dia mona lumbu kimosi muna lumbu ya Mwan’a muntu, kansi ke numona kio ko.
23 Wantu bekunuvovesa vo: ‘Tala kuna!’ yovo ‘Tal’oku!’ Ke nuvaiki ko, ke nubalandi ko.+
24 Kadi nze una nsemo utemenanga kuna sambu dimosi dia zulu yo mwesesa yakuna sambu diankaka dia zulu, i una ukal’o Mwan’a muntu+ muna lumbu kiandi.+
25 Kansi, kafwete teka mona mpasi zayingi, yo bembolwa kwa mbandu yayi.+
26 Wauna wakala muna lumbu ya Noa,+ i una mpe ukala muna lumbu ya Mwan’a muntu:+
27 o wantu badianga, banuanga, akala basompanga, akento basompeswanga, yamuna lumbu kiakota Noa muna nzaza,+ e Kizalu kiayiza yo fwasa yau awonso.+
28 Diau adimosi mpe muna lumbu ya Loti:+ badianga, banuanga, basumbanga, batekanga, bakunanga, batunganga.
29 Kansi e lumbu kina Loti kiavaika muna Sodoma, mwanoka tiya ye lengo diatuka kuna zulu, wafwasa yau awonso.+
30 I wau mpe ukala muna lumbu kisengomoka o Mwan’a muntu.+
31 “Muna lumbu kiakina, ndiona una vana nludi a nzo, kakulumuki ko mu kwenda bonga e salanganu yandi ina muna nzo, diau dimosi mpe, ndiona owanuka kuna mpatu, kavutukila ko ina kasisidi ku nima.
32 Nuyindula nkaz’a Loti.+
33 Konso ona ovava vuluza o moyo andi, vidisa kevidisa wo, kansi konso ona ovidisa wo, vuluza kevuluza wo.+
34 Inusamunuini vo, muna fuku wauna, wantu wole bekala vana mfulu mosi; mosi obongwa, kansi wankaka obembolwa.+
35 Akento wole betuta muna su kimosi; mosi obongwa, kansi wankaka obembolwa.”
36 * ——
37 Bamvutwidi vo: “Akweyi, e Mfumu?” Ubavovese vo: “Konso kuna kwina e vimbu, i kûna kulungalakena e ngo-zulu.”+
Mvovo vana yand'a lukaya
^ Yovo “mbongo a mutade.” E mbongo yayi ikunuanga kuna Palestina. Ikulanga vioka meta 4 yo vaikisa tayi yayingi.
^ O nti wau uyikilwanga vo sikamina.
